ກະຊວງການຕ່າງປະເທດ ແລະ ກະຊວງແຜນການ ແລະ ການລົງທຶນ ໃນນາມເປັນ ກອງເລຂາຄະນະຊີ້ນໍາລະດັບຊາດ ເພື່ອການຈັດຕັ້ງ ປະຕິບັດເປົ້າໝາຍການພັດທະນາແບບຍືນຍົງໄດ້ຈັດກອງປະຊຸມປະຈໍາໄຕມາດຂອງຄະນະຈຸດປະສານງານເພື່ອຈັດຕັ້ງປະຕິບັດເປົ້າໝາຍການພັດທະ ນາ ແບບຍືນຍົງ (ປພຍ) ຢູ່ ສປປ ລາວ, ໃນວັນທີ 12 ມິຖຸນາ 2020 ທີ່ ສູນການຮ່ວມມືສາກົນ ແລະ ການຝຶກອົບຮົມ (ICTC), ນະຄອນຫຼວງວຽງຈັນ.

     ກອງປະຊຸມໃນຄັ້ງນີ້ແມ່ນໄດ້ຮັບກຽດກ່າວເປີດໂດຍ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີ ກະຊວງການຕ່າງປະເທດ ແລະ ມີຜູ້ເຂົ້າຮ່ວມ ຂອງຈຸດປະສານງານ ປພຍ ແຫ່ງຊາດ ຈາກບັນດາກະຊວງ, ອົງການລັດທຽບເທົ່າກະຊວງ ແລະ ຂະແໜງການອ້ອມຂ້າງສູນກາງ ທີ່ກ່ຽວຂ້ອງຈໍານວນ 60 ທ່ານ. ກອງປະຊຸມຄັ້ງນີ້ເປັນກອງປະຊຸມປະຈໍາໄຕມາດທີ່ຈັດຂື້ນທຸກປີຂອງຄະນະຈຸດປະສານງານ ຊຶ່ງມີຈຸດປະສົງເພື່ອປຶກສາຫາລື ທົບທວນ ການຈັດຕັ້ງ ປະຕິບັດວຽກງານໃນໄລຍະຕົ້ນປີທີ່ຜ່ານມາ ແລະ ວາງແຜນກະກຽມການຈັດຕັ້ງປະຕິບັດວຽກງານ ໃນຕໍ່ໜ້າ ໂດຍສະເພາະ ການກະກຽມ ໃຫ້ແກ່ການຈັດກອງປະຊຸມຂັ້ນສູງຂອງຄະນະຊີ້ນໍາລະດັບຊາດ ຄົບຮອບວຽນ 3 ປີ ທີ່ມີແຜນຈະຈັດຂື້ນໃນປີນີ້ ແລະ ແຜນງານໃນ ຊຸມປີຕໍ່ໜ້າ ເຊັ່ນ: ແຜນການເຊື່ອມສານ ປພຍ ເຂົ້າໃນແຜນພັດທະນາ ເສດຖະກິດ-ສັງຄົມແຫ່ງຊາດ ຄັ້ງທີ IX ແລະ ການກະກຽມການຮ່າງບົດລາຍງານ ແບບສະໝັກໃຈ ສະບັບທີ 2 ຂອງ ສປປ ລາວ.
       ໃນໂອກາດນີ້, ທ່ານ ທອງຜ່ານ ສະຫວັນເພັດ, ໄດ້ເນັ້ນໜັກເຖິງຄວາມຄືບໜ້າ ແລະ ຜົນງານອັນພົ້ນເດັ່ນການຈັດຕັ້ງປະຕິບັດວຽກງານ ປພຍ ທີ່ຜ່ານມາ ຢູ່ ສປປ ລາວ, ເພື່ອສຸມໃສ່ແກ້ໄຂສິ່ງທ້າທາຍຕ່າງໆທີ່ໄດ້ຮັບຜົນກະທົບຈາກການແຜ່ລະບາດຂອງພະຍາດ ຂອງພະຍາດ ໂຄວິດ-19  ເພື່ອຫັນ ວິກິດໃຫ້ກາຍເປັນກາລະໂອກາດ, ສ້າງເງື່ອນໄຂທີ່ສາມາດຮັບປະກັນ ແລະ ເອື້ອອໍານວຍໃຫ້ແກ່ການຈັດຕັ້ງປະຕິບັດເປົ້າໝາຍການພັດທະນາ ແບບ ຄວາມຍືນຍົງໃຫ້ມີຄວາມຕໍ່ເນື່ອງ ແລະ ການສ້າງຄວາມເຂັ້ມແຂງ ແລະ ຂີດຄວາມສາມາດຂອງຂະແໜງການໃຫ້ສາມາດແກ້ໄຂ ແລະ ປັບຕົວ ກັບສະພາບການປ່ຽນແປງດັ່ງກ່າວ ໂດຍໝູນໃຊ້ເຕັກໂນໂລຊີ ແລະ ຫັນສູ່ຍຸກດິຈິຕັນ ຫຼື Digitalization ໃຫ້ຫຼາຍຂື້ນ. ນອກນັ້ນ, ກອງປະຊຸມຍັງໄດ້ມີການສົນທະນາ ແລະ ປະກອບຄໍາເຫັນກ່ຽວກັບຂະບວນການຮ່າງບົດລາຍງານແຫ່ງຊາດແບບສະມັກໃຈສະບັບທີ 2 ຂອງ ສປປ ລາວ ທີ່ຄາດວ່າຈະນໍາສະເໜີຢູ່ ໃນກອງປະຊຸມຂັ້ນສູງເພື່ອການພັດທະນາແບບຍືນຍົງໃນປີ 2021 ທີ່ ນີວຢອກ. ພ້ອມກັນນັ້ນ, ກໍ່ໄດ້ຮັບຟັງການນໍາສະເໜີກ່ຽວກັບ SDG Mobile Application ຊຶ່ງ ກອງເລຂາ ປພຍ ແຫ່ງຊາດ ໄດ້ພັດທະນາຂື້ນແນ່ໃສ່ການເພິ່ມຊ່ອງທາງໂຄສະນາ, ເຜີຍແຜ່ ແລະ ການເຂົ້າເຖິງຂໍ້ມູນ ແລະ ຂ່າວສານຂອງທຸກພາກສ່ວນໃນສັງຄົມກ່ຽວກັບການຈັດຕັ້ງປະຕິບັດ ປພຍ ຢູ່ ສປປ ລາວ ອີກດ້ວຍ.
    ການຈັດກອງປະຊຸມໃນຄັ້ງນີ້ແມ່ນສ່ວນໜຶ່ງຂອງກົນໄກການຈັດຕັ້ງປະຕິບັດ ປພຍ ພາຍຫຼັງທີ່ ສປປ ລາວ ໄດ້ຮັບຮອງເອົງວາລະ 2030 ເພື່ອການພັດທະນາແບບຍືນຍົງ​ຂອງ ອົງການ ສປຊ ໃນປີ 2015, ລັດຖະບານກໍ່​ໄດ້ສືບຈັດຕັ້ງປະຕິບັດ ແລະ ຜັນຂະຫຍາຍວາລະດັ່ງກ່າວ, ໂດຍຄຽງຄູ່ກັບ 17 ເປົ້າໝາຍຂອງອົງການ ສປຊ ລັດຖະບານ ໄດ້ຕົກລົງຮັບຮອງເອົາເປົ້າໝາຍ ປພຍ ແຫ່ງຊາດ, ເປົ້າໝາຍທີ 18: ຊີວິດປອດໄພຈາກລະເບີດ ບໍ່ທັນແຕກ ໃນປີ 2016. ພ້ອມກັນນັ້ນ, ສປປ ລາວ ໄດ້ສ້າງຕັ້ງກົນໄກການຈັດຕັ້ງປະຕິບັດວຽກງານ ປພຍ ເພື່ອຮັບປະກັນຜົນສໍາເລັດຕາມເປົ້າໝາຍ ແລະ ຄາດໝາຍທີ່ວາງໄວ້, ຊຶ່ງປະກອບມີ: 1) ຄະນະຊີ້ນໍາລະດັບຊາດ, ໂດຍມີ​ທ່ານນາຍົກລັດຖະມົນຕີ ​ເປັນປະທານ, ລັດຖະມົນຕີກະຊວງການຕ່າງປະເທດ ແລະ ລັດຖະມົນຕີ ກະຊວງແຜນການ ແລະ ການລົງທຶນ ເປັນຮອງປະທານ, ມີບັນດາທ່ານລັດຖະມົນຕີ, ຮອງລັດຖະມົນຕີ ຂອງບັນດາກະຊວງທີ່ກ່ຽວຂ້ອງ ແລະ ການນໍາຂອງອົງການຈັດຕັ້ງມະຫາຊົນປະກອບເປັນຄະນະ;  2) ຄະນະຈຸດປະສານງານ ໂດຍມີຜູ້ຕ່າງໜ້າຈາກບັນດາກະຊວງ ແລະ ຂະແໜງການຕ່າງໆ ຂອງລັດປະກອບເປັນສະມາຊິກ ແລະ 3) ກອງເລຂາ ປພຍ ແຫ່ງຊາດ (ຊຶ່ງມີຫ້ອງການຕັ້ງຢູ່ ກົມອົງການຈັດຕັ້ງສາກົນ, ກະຊວງການຕ່າງປະເທດ)