ໃນວັນທີ 22 ມິຖຸນາ 2020 ທີ່ ກະຊວງການຕ່າງປະເທດ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງ​ການ​ຕ່າງ​ປະ​ເທດ, ທັງເປັນຫົວໜ້າເຈົ້າໜ້າທີ່ອາວຸໂສອາຊຽນຂອງ ສປປ ລາວ ໄດ້​ນຳພາຄະນະ ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສອາຊຽນ, ກອງ​ປະ​ຊຸມ​ໜ່ວຍ​ງານວິຊາການສະພາ​ປະ​ສານ​ງານ​ອາ​ຊຽນ ວ່າດ້ວຍ ການຊ່ວຍເຫຼືອສຸກເສີນດ້ານສາທາລະນະສຸກ ຄັ້ງທີ 2 ແລະ ກອງປະຊຸມປຶກສາຫາລືຮ່ວມ ແບບທາງໄກ, ເຊິ່ງໄດ້ປຶກສາຫາລືການກະກຽມທາງດ້ານເນື້ອໃນ, ພາລະທິການ ແລະ ພິທີການ ໃຫ້ແກ່ກອງປະຊຸມສຸດຍອດອາຊຽນ ຄັ້ງທີ 36 ແລະ ກອງປະຊຸມກ່ຽວຂ້ອງ ແບບທາງ ໄກ ໃນວັນທີ 24 ມິຖຸນາ 2020 ແລະ 26 ມິຖຸນາ 2020 ຕາມລໍາດັບ.

ກອງປະຊຸມເຈົ້າໜ້າທີ່ອາວຸໂສອາຊຽນຄັ້ງນີ້, ນອກຈາກສຸມໃສ່ກະກຽມໃຫ້ແກ່ກອງປະຊຸມສຸດຍອດອາຊຽນ ຄັ້ງທີ 36 ແລະ ກອງປະຊຸມກ່ຽວຂ້ອງທີ່ກ່າວມາແລ້ວ ຍັງໄດ້ຕີລາຄາສູງຕໍ່ການຈັດຕັ້ງປະຕິບັດວຽກງານຂອງອາຊຽນໃນປີ 2020 ພາຍໃຕ້ການເປັນປະທານຂອງຫວຽດນາມ ໂດຍສະເພາະການປ້ອງກັນ, ຮັບມື ແລະ ແກ້ໄຂການແຜ່ລະບາດພະຍາດໂຄວິດ-19, ການສືບຕໍ່ຮ່ວມມືກັບແຕ່ລະຄູ່ເຈລະຈາອາຊຽນ ແລະ ການພິຈາລະນາຂໍ້ສະເໜີຂອງປະເທດຕ່າງໆ ເພື່ອເຂົ້າເປັນພາຄີສົນ​​ທິ​ສັນ​ຍາໄມ​ຕີ​ຈິດແລະການ​ຮ່ວມ​ມື​ໃນ​ອາ​ຊີ​ຕາ​ເວັນ​ອອກ​ສ່ຽງ​ໃຕ້ ລວມທັງຂໍ້ສະເໜີເພື່ອເຂົ້າເປັນຄູ່ຮ່ວມມືທາງການຂອງອາຊຽນ.

ກອງປະຊຸມໜ່ວຍງານວິຊາການສະພາປະສານງານອາຊຽນ ວ່າດ້ວຍການຊ່ວຍເຫຼືອສຸກເສີນດ້ານສາທາລະນະສຸກຄັ້ງທີ 2 ແບບທາງໄກໄດ້ຕີລາຄາສູງຕໍ່ຜົນສໍາເລັດໃນການຈັດຕັ້ງປະຕິບັດບັນດາຂໍ້ສະເໜີແນະຂອງກອງປະຊຸມສຸດຍອດອາຊຽນ ແລະ ກອງປະຊຸມສຸດຍອດອາຊຽນບວກສາມ ສະໄໝພິເສດກ່ຽວກັບການຕ້ານ, ຮັບມື ແລະ ແກ້ໄຂການແຜ່ລະບາດຂອງພະຍາດໂຄວິດ-19 ໃນວັນທີ 14 ເມສາ 2020 ຜ່ານມາ ເປັນຕົ້ນ: ຄວາມຄືບໜ້າໃນການສ້າງຕັ້ງກອງທຶນສຸກເສີນ ແລະ ຄັງແຮສຸກເສີນອຸປະກອນການແພດ/ຢາປົວພະຍາດ ເພື່ອຕ້ານ, ຮັບມື ແລະ ແກ້ໄຂການລະບາດຂອງພະຍາດໂຄວິດ-19 ດັ່ງກ່າວ ແລະ ການຈະຮ່າງແຜນຟື້ນຟູເສດຖະກິດຮອບດ້ານ ຫຼັງໂຄວິດ-19.

ກອງປະຊຸມປຶກສາ​ຫາລື​ຮ່ວມ​ ລະຫວ່າງ ​ສາມ​ເສົາ​ຄໍ້າ​ປະຊາ​ຄົມ​ອາຊຽນຄັ້ງນີ້ ໄດ້ພ້ອມກັນກະກຽມທັງທາງດ້ານເນື້ອໃນ, ພາລະທິການ ແລະ ພິທີການໃຫ້ແກ່ກອງປະຊຸມສຸດຍອດອາຊຽນຄັ້ງທີ 36 ແລະກອງປະຊຸມທີ່ກ່ຽວຂ້ອງອື່ນໆ, ເຊິ່ງຈະຈັດຂຶ້ນໃນວັນທີ 24 ແລະ 26 ມິຖຸນາ 2020 ແບບທາງໄກ. ພ້ອມນີ້, ກອງປະຊຸມ ຍັງ​ໄດ້​ຮັບຊາບ​ຄວາມ​ຄືບ​ໜ້າ​ໃນການກະກຽມດຳເນີນການທົບທວນຄືນກາງສະໄໝທັງ 3 ເສົາຄໍ້າປະຊາຄົມອາຊຽນຮອດປີ 2025 ແລະ ການຈະເລີ່ມຕົ້ນຂະບວນການຮ່າງວິໄສທັດປະຊາຄົມອາຊຽນ ຫຼັງປີ 2025. ​ດ້