ໃນວັນທີ 1 ກໍລະກົດ 2020, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ທັງເປັນຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ໄດ້ນຳພາຄະນະ ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສ ອາຊຽນ-ຈີນ ຄັ້ງທີ 26 ແບບທາງໄກ ທີ່ ກະຊວງການຕ່າງປະເທດ ພາຍໃຕ້ການເປັນປະທານຮ່ວມ ຂອງ ຟີລິບປິນ ແລະ ຈີນ. ເຂົ້າຮ່ວມກອງປະຊຸມຄັ້ງນີ້ຍັງມີບັນດາຫົວໜ້າເຈົ້າໜ້າທີ່ອາວຸໂສອາຊຽນ, ຮອງເລຂາທິການໃຫຍ່ອາຊຽນ ແລະ ວິຊາການກ່ຽວຂ້ອງຈຳນວນໜຶ່ງ.
ກອງປະຊຸມຄັ້ງນີ້ໄດ້ຕີລາຄາສູງ ຕໍ່ຜົນສຳເລັດການຈັດຕັ້ງປະຕິບັດການຮ່ວມມື ອາຊຽນ-ຈີນ ໃນໄລຍະຜ່ານມາ ໂດຍສະເພາະການຈັດຕັ້ງປະຕິບັດ ແຜນປະຕິບັດງານ ອາຊຽນ-ຈີນ 2016-2020 ແລະ ການຜັນຂະຫຍາຍຜົນກອງປະຊຸມສຸດຍອດຜູ້ນຳ ອາຊຽນ-ຈີນ ຄັ້ງທີິ 22 ໃນປີ 2019 ທີ່ ບາງກອກ, ປະເທດໄທ, ເຊິ່ງກວມເອົາທັງສາມເສົາຄໍ້າການສ້າງປະຊາຄົມອາຊຽນ (ການເມືອງຄວາມໝັ້ນຄົງ, ເສດຖະກິດ ແລະ ວັດທະນະທຳສັງຄົມ) ເປັນຕົ້ນ: ໄດ້ສຳເລັດພິທີເປີດປີ 2020 ເປັນປີແຫ່ງການຮ່ວມມືດ້ານເສດຖະກິດດີຈີຕອນ ອາຊຽນ-ຈີນ, ການຈັດຕັ້ງປະຕິບັດແຜນແມ່ບົດການເຊື່ອມຈອດອາຊຽນ 2025 ແລະ ແຜນຂໍ້ລິເລີ່ມໜຶ່ງແລວ, ໜຶ່ງເສັ້ນທາງ, ການຮ່ວມມືເຄືອຂ່າຍຕົວເມືອງອັດສະລິຍະອາຊຽນ, ການຮ່ວມມືດ້ານການສຶກສາ, ການກະກຽມງານວາງສະແດງສິນຄ້າ ອາຊຽນ-ຈີນ ປະຈຳປີ 2020 ແລະ ອື່ນໆ. ພິເສດ, ກອງປະຊຸມຍັງໄດ້ແຈ້ງໃຫ້ກັນ ແລະ ກັນ ຊາບ ກ່ຽວກັບ ສະພາບການ ກໍ່ຄື ມາດຕະການຂອງແຕ່ລະປະເທດ ສະມາຊິກອາຊຽນ ແລະ ສປ. ຈີນ ໃນການສະກັດກັ້ນ, ເຝົ້າລະວັງ, ຄວບຄຸມ ແລະ ແກ້ໄຂ ການແຜ່ລະບາດຂອງພະຍາດ ໂຄວິດ-19 ແລະ ກໍານົດທິດທາງແຜນການຮ່ວມມື ອາຊຽນ-ຈີນ ໃນຕໍ່ໜ້າ ໃນການສືບຕໍ່ຮັບມື ແລະ ແກ້ໄຂພະຍາດໂຄວິດ-19 ດັ່ງກ່າວ.
ພ້ອມນີ້, ກອງປະຊຸມສະແດງຄວາມເພິງພໍໃຈຕໍ່ຄວາມຄືບໜ້າໃນການຮ່າງແຜນປະຕິບັດງານ ອາຊຽນ-ຈີນ ສະບັບໃໝ່ 2021-2025 ເພື່ອໃຫ້ສາມາດນໍາສະເໜີ ຕໍ່ກອງປະຊຸມລັດຖະມົນຕີຕ່າງປະເທດ ອາຊຽນ-ຈີນ ທີ່ຈະມີຂຶ້ນໃນເດືອນສິງຫາ 2020 ທີ່ ຫວຽດນາມ ພິຈາລະນາຮັບຮອງເອົາ ແລະ ນຳສະເໜີຕໍ່ກອງປະຊຸມສຸດຍອດອາຊຽນ-ຈີນ ໃນເດືອນພະຈິກ 2020 ທີ່ ຫວຽດນາມ ຮັບຊາບ. ນອກຈາກນີ້, ກອງປະຊຸມຍັງໄດ້ປຶກສາຫາລືການຈະຖືເອົາ ປີ 2021 ເປັນປິແຫ່ງການຮ່ວມມືພັດທະນາແບບຍືນຍົງ ອາຊຽນ-ຈີນ ແລະ ຄວາມຄືບໜ້າການຮ່ວມມືຂອບແມ່ນ້ຳຂອງ-ແມ່ນ້ຳລ້ານຊ້າງຕື່ມ.
ນອກນັ້ນ, ກອງປະຊຸມຄັ້ງນີ້ ໄດ້ແລກປ່ຽນຄວາມຄິດເຫັນ ຕໍ່ບັນຫາພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ ເພື່ອປະກອບສ່ວນເຂົ້າໃນການຮັກສາສັນຕິພາບ ແລະ ຄວາມໝັ້ນຄົງໃນພາກພື້ນ ກໍ່ຄື ໃນໂລກ ເປັນຕົ້ນແມ່ນ ການສືບຕໍ່ສົ່ງເສີມລະບົບການຄ້າຫຼາຍຝ່າຍ ແລະ ຮັດແໜ້ນກົນໄກການຮ່ວມມື ທີ່ອາຊຽນເປັນຜູ້ນຳພາ.
ກອງປະຊຸມຄັ້ງນີ້ຍັງໄດ້ປຶກສາຫາລື ການກະກຽມໃຫ້ແກ່ ກອງປະຊຸມລັດຖະມົນຕີຕ່າງປະເທດ ອາຊຽນ- ຈີນ ທີ່ຈະມີຂຶ້ນ ໃນເດືອນສິງຫາ 2020 ນີ້ ທີ່ ຫວຽດນາມ.