ໃນຕອນບ່າຍຂອງວັນທີ 14 ກໍລະກົດ 2020 ທີ່ ກະຊວງການຕ່າງປະເທດ, ນະຄອນຫຼວງວຽງຈັນ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງ​ການ​ຕ່າງ​ປະ​ເທດ, ທັງເປັນຫົວໜ້າເຈົ້າໜ້າທີ່ອາວຸໂສອາຊຽນຂອງ ສປປ ລາວ ​ໄດ້​ນຳພາຄະນະ ເຂົ້າຮ່ວມກອງປະຊຸມປຶກສາຫາລືທາງໄກເຈົ້າໜ້າທີ່ອາວຸໂສຂະແໜງການກ່ຽວຂ້ອງຂອງອາຊຽນ ກ່ຽວກັບ ຮ່າງແຜນຟື້ນຟູຮອບດ້ານອາຊຽນ ຫຼັງໂຄວິດ-19 ພາຍໃຕ້ການເປັນປະທານຂອງຫວຽດນາມ ໃນຖານະປະທານໝູນວຽນອາຊຽນ ປີ 2020.

ກອງປະຊຸມ ໄດ້ປຶກສາຫາລື ແລະ ແລກປ່ຽນຄວາມຄິດເຫັນເບື້ອງຕົ້ນ ຕໍ່ຮ່າງແຜນຟື້ນຟູຮອບດ້ານຂອງອາຊຽນ ຫຼັງໂຄວິດ-19 ທີ່ຮ່າງຂື້ນໂດຍກອງເລຂາອາຊຽນ ໂດຍໄດ້ລົງເລິກປຶກສາຫາລືຈຸດປະສົງ, ລະດັບຄາດ ໝາຍ, ວິທີິການ, ຮູບແບບ, ແຜນການ ແລະ ກຳນົດເວລາໃນການຈັດຕັ້ງປະຕິບັດ. ພ້ອມນີ້, ຍັງໄດ້ມີຄຳເຫັນຕໍ່ບັນດາຂະແໜງຍຸດທະສາດທີ່ຈະບັນຈຸເຂົ້າໃນຮ່າງແຜນຟື້ນຟູດັ່ງກ່າວ ເຊັ່ນ: ສາທາລະນະສຸກ, ສົ່ງເສີມການຄ້າພາຍໃນອາຊຽນ, ການຫັນໄປສູ່ດີຈິຕອນ; ການສະໜອງແບບຕ່ອງໂສ້ດ້ານການເຊື່ອມຈອດ ແລະ ສົ່ງເສີມເສດຖະກິດດິຈີຕອນ, ການຮັດແໜ້ນຄວາມໝັ້ນຄົງມະນຸດ ແລະ ສ້າງອາຊຽນໃຫ້ມີຄວາມຍືນຍົງ ແລະ ເຂັ້ມແຂງ. ກອງປະຊຸມຄັ້ງນີ້, ໄດ້ເຫັນດີມອບໃຫ້ບັນດາຂະແໜງການກ່ຽວຂ້ອງ ຂອງສາມເສົາຄໍ້າປະຊາຄົມອາຊຽນ ສືບຕໍ່ເຮັດວຽກຮ່ວມກັນ ແລະ ມີຄຳເຫັນເພີ່ມເຕີມໃສ່ຮ່າງແຜນຟື້ນຟູຮອບດ້ານອາຊຽນ ຫຼັງໂຄວິດ-19 ເພື່ອໃຫ້ມີເນື້ອໃນຄົບຖ້ວນ ແລະ ຮອບດ້ານ ແລ້ວນຳສະເໜີຕໍ່ກອງປະຊຸມສະພາປະສານງານອາຊຽນ ພິຈາລະນາກ່ອນນຳສະເໜີໃຫ້ຜູ້ນຳອາຊຽນ ຮັບຮອງໃນໂອກາດກອງປະຊຸມສຸດຍອດອາຊຽນ ຄັ້ງທີ 37 ໃນເດືອນ ພະຈິກ 2020 ທີ່ຈະມາເຖິງ ຢູ່ ສສ. ຫວຽດນາມ.

ໃນກອງປະຊຸມດ່ັງກ່າວ, ທ່ານ ຮອງລັດຖະມົນຕີ ທອງຜ່ານ ສະຫວັນເພັດ ກໍໄດ້ປະກອບຄຳເຫັນເບື້ອງຕົ້ນຕໍ່ຮ່າງແຜນຟື້ນຟູຮອບດ້ານອາຊຽນ ໂດຍໄດ້ເນັ້ນວ່າ: ໃນສະພາບຊີວິດແບບໃໝ່ນີ້ ອາຊຽນ ມີຄວາມຈຳເປັນຕ້ອງໄດ້ຫັນໄປສູ່ການນຳໃຊ້ລະບົບດິຈີຕອນ ເປັນຕົ້ນແມ່ນ ການຄ້າຜ່ານທາງເອເລັກໂຕຣນິກ, ການສຶກສາຜ່ານທາງອອນລາຍ ແລະ ອື່ນໆ. ສະນັ້ນ, ຕ້ອງໄດ້ສຸມໃສ່ການລົງທຶນດ້ານພື້ນຖານໂຄງລ່າງດ້ານເອເລັກໂຕຣນິກ ພ້ອມທັງພັດທະນາຊັບພະຍາກອນມະນຸດໃນດ້ານດັ່ງກ່າວ. ນອກນັ້ນ, ແຜນຟື້ນຟູຮອບດ້ານດ່ັງກ່າວ ຄວນສອດຄ່ອງ ແລະ ເສື່ອມສານກັບແຜນແມ່ບົດຂອງສາມເສົາຄໍ້າປະຊາຄົມອາຊຽນ ທີກຳລັງຈະດຳເນີນການທົບທວນກາງສະໄໝ ລວມທັງ ແຜນວຽກຂໍ້ລິເລີ່ມເພື່ອການເຊື່ອມໂຍງອາຊຽນ ໄລຍະສາມ ແລະ ໄລຍະສີ່ທີ່ກຳລັງຮ່າງ, ແຜນແມ່ບົດເພື່ອການເຊື່ອມຈອດອາຊຽນ 2025 ແລະ ເຄືອຂ່າຍຕົວເມືອງອັດສະລິຍະອາຊຽນ. ສ່ວນການຈັດຕັ້ງປະຕິບັດນັ້ນ ຈະຕ້ອງເພີ່ມທະວີການລະດົມທຶນຈາກຄູ່ຮ່ວມມືພາຍນອກຂອງອາຊຽນ ເຊັ່ນ: ອາຊຽນບວກໜື່ງ, ອາຊຽນບວກສາມ ລວມທັງຈາກພາກເອກະຊົນ ແລະ ຮູບແບບຄູ່ຮ່ວມລັດ-ເອກະຊົນ (PPP).