ໃນຕອນເຊົ້າ ຂອງວັນທີ 14 ກໍລະກົດ 2020, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີຕ່າງປະເທດ, ທັງເປັນຫົວໜ້າເຈົ້າໜ້າທີ່ອາວຸໂສອາຊຽນ ສປປ ລາວ ໄດ້ເຂົ້າຮ່ວມກອງປະຊຸມປຶກສາຫາລື ວ່າດ້ວຍການສຸມບັນດາຂອບການຮ່ວມມືຂົງເຂດອະນຸພາກພື້ນແມ່ນໍ້າຂອງ ໃຫ້ສອດຄ່ອງກັບເປົ້າໝາຍຂອງອາຊຽນ (ASEAN Forum on Sub-regional Development:Converging Mekong Sub-regional Cooperation with ASEAN Goals). ໃນກອງປະຊຸມຄັ້ງນີ້, ທ່ານຮອງລັດຖະມົນຕີ ໄດ້ເປັນກຽດເປັນຜູ້ສະເໜີໃນພາກທີ 3 ພາຍໃຕ້ຫົວຂໍ້ “ການເພີ່ມທະວີບົດບາດຂອງອາຊຽນ ໃນການພັດທະນາອະນຸພາກພື້ນ”, ເຊິ່ງນອກຈາກສະແດງຄວາມຊົມເຊີຍ ສສ ຫວຽດນາມ ທີ່ໄດ້ຈັດກອງປະຊຸມທີ່ສໍາຄັນນີ້ແລ້ວ, ຍັງໄດ້ຕີລາຄາສູງຕໍ່ການປະກອບສ່ວນອັນສໍາຄັນຂອງບັນ ດາຂອບການຮ່ວມມືອະນຸພາກພື້ນແມ່ນໍ້າຂອງ ໃນການພັດທະນາເສດຖະກິດ-ສັງຄົມ ຂອງປະເທດສະມາຊິກ, ການຫລຸດຜ່ອນຄວາມທຸກຍາກ, ການເຊື່ອມຈອດ ແລະ ການຮັດແຄບຄວາມແຕກໂຕນດ້ານການພັດທະນາລະຫວ່າງ ປະເທດສະມາຊິກອາຊຽນ ແລະ ສະເໜີໃຫ້ສືບຕໍ່.
ພິເສດ, ທ່ານຮອງລັດຖະມົນຕີ ໄດ້ຢໍ້າຄືນ ແລະ ສະແດງຄວາມພໍໃຈຕໍ່ບົດບາດຄວາມເປັນແກນກາງຂອງອາຊຽນ ໃນໄລ ຍະຜ່ານມາ, ເຊິ່ງສະແດງອອກໃນການຮ່າງ, ອອກແບບ ແລະ ສ້າງແຜນງານ/ໂຄງການ ພາຍໃຕ້ແຕ່ລະຂອບການຮ່ວມມືອະນຸພາກພື້ນແມ່ນໍ້າຂອງ ກໍຄືອະນຸພາກພື້ນອື່ນຂອງອາຊຽນ ລ້ວນແຕ່ບົນພື້ນຖານຫລັກການອາຊຽນ, ບົດບາດເປັນຜູ້ ນໍາຂອງອາຊຽນ ແລະ ສອດຄ່ອງກັບບັນດາແຜນແມ່ບົດໃນການພັດທະນາອາຊຽນ ລວມທັງແຜນປະຕິບັດງານ ໄອເອໄອ ສະບັບທີ III, ແຜນແມ່ບົດການເຊື່ອມຈອດອາຊຽນ 2025 ແລະ ວິໃສທັດການສ້າງປະຊາຄົມອາຊຽນ 2025.
ສຸດທ້າຍ, ທ່ານຮອງລັດຖະມົນຕີ ຍັງໄດ້ສະແດງຄວາມຂອບໃຈ ຕໍ່ປະເທດອາຊຽນເກົ່າ, ບັນດາປະເທດຄູ່ຮ່ວມເຈ ລະຈາ, ຄູ່ຮ່ວມມືພາຍນອກອາຊຽນ ແລະ ອົງການຈັດຕັ້ງສາກົນອື່ນໆ ທີ່ໄດ້ໃຫ້ການຊ່ວຍເຫລືອ ຜ່ານບັນດາຂອບການຮ່ວມມືອະນຸພາກພື້ນແມ່ນໍ້າຂອງ, ເຊິ່ງໄດ້ປະກອບສ່ວນອັນໃຫຍ່ຫລວງເຂົ້າໃນການພັດທະນາເສດຖະກິດ-ສັງ ຄົມ ຂອງ ສປປ ລາວ ແລະ ສະເໜີໃຫ້ສືບຕໍ່.