ກອງປະຊຸມເຈົ້າໜ້າທີ່ອາວຸໂສອາຊຽນ ແບບທາງໄກ

ໃນຕອນເຊົ້າຂອງວັນທີ 16 ກໍລະກົດ 2020 ທີ່ ກະຊວງການຕ່າງປະເທດ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງ​ການ​ຕ່າງ​ປະ​ເທດ ທັງເປັນຫົວໜ້າເຈົ້າໜ້າທີ່ອາວຸໂສອາຊຽນຂອງ ສປປ ລາວ ໄດ້​ນຳພາຄະນະ ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສອາຊຽນ ແບບທາງໄກ, ພາຍໃຕ້ການເປັນປະທານຂອງ ສ.ສ. ຫວຽດນາມ ໃນຖານະປະທານໝູນວຽນອາຊຽນປີ 2020.

ກອງປະຊຸມ ໄດ້ປຶກສາຫາລືການກະກຽມທາງດ້ານເນື້ອໃນ, ພາລະທິການ ແລະ ພິທີການ ໃຫ້ແກ່ກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 53, ກອງປະຊຸມລັດຖະມົນຕີຕ່າງປະເທດອາຊຽນບວກນຶ່ງ, ກອງປະຊຸມລັດຖະມົນຕີຕ່າງປະເທດອາຊຽນບວກສາມ ຄັ້ງທີ 21, ກອງປະຊຸມລັດຖະມົນຕີຕ່າງປະເທດ ຂອງກອງປະຊຸມສຸດຍອດອາຊີຕາເວັນອອກ ຄັ້ງທີ 10 ແລະ ກອງປະຊຸມເວທີພາກພື້ນອາຊຽນ ຄັ້ງທີ 27, ເຊິ່ງຈະຈັດຂຶ້ນໃນເດືອນ ກັນຍາ 2020.

ພ້ອມນີ້, ກອງປະຊຸມ ຍັງໄດ້ຕີລາຄາສູງຕໍ່ຜົນການຈັດຕັ້ງປະຕິບັດບັນດາບູລິມະສິດການເປັນປະທານອາຊຽນຂອງຫວຽດນາມ ສົກປີ 2020 ໂດຍສະເພາະຄວາມຄືບໜ້າໃນການປ້ອງກັນ, ຮັບມື ແລະ ແກ້ໄຂການແຜ່ລະບາດພະຍາດ ໂຄວິດ-19, ການສ້າງຕັ້ງກອງທຶນອາຊຽນ ເພື່ອຮັບມືກັບການແຜ່ລະບາດຂອງພະຍາດດັ່ງກ່າວ, ການສ້າງຄັງແຮຢາປົວພະຍາດ ແລະ ອຸປະກອນການແພດ ສໍາລັບຮັບມື ແລະ ແກ້ໄຂພາວະສຸກເສີນດ້ານສາທາລະນະສຸກພາກພື້ນອາຊຽນ ແລະ ຮ່າງແຜນຟື້ນຟູຮອບດ້ານຂອງອາຊຽນ ຫຼັງໂຄວິດ-19. ນອກຈາກນີ້, ກໍໄດ້ປຶກສາຫາລືການສືບຕໍ່ຮ່ວມມືກັບແຕ່ລະຄູ່ເຈລະຈາອາຊຽນ ແລະ ການພິຈາລະນາຂໍ້ສະເໜີຂອງປະເທດຕ່າງໆ ເພື່ອເຂົ້າເປັນພາຄີສົນ​​ທິ​ສັນ​ຍາໄມ​ຕີ​ຈິດ ແລະ ການ​ຮ່ວມ​ມື​ໃນ​ອາ​ຊີ​ຕາ​ເວັນ​ອອກ​ສ່ຽງ​ໃຕ້ ກໍຄືເຂົ້າເປັນຄູ່ຮ່ວມມືທາງການຂອງອາຊຽນ.

ກອງປະຊຸມເຈົ້າໜ້າທີ່ອາວຸໂສອາຊຽນ-ອິນເດຍ ຄັ້ງທີ 22 ແບບທາງໄກ

ໃນຕອນບ່າຍຂອງວັນດຽວກັນ, ທ່ານຮອງລັດຖະມົນຕີ ຍັງໄດ້ສືບຕໍ່ນຳພາຄະນະ ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສອາຊຽນ-ອິນເດຍ ຄັ້ງທີ 22 ແບບທາງໄກ ພາຍໃຕ້ການເປັນປະທານຮ່ວມຂອງ ໄທ (ປະເທດປະສານງານ) ແລະ ອິນເດຍ.

ກອງປະຊຸມ ໄດ້ຕີລາຄາສູງ ຕໍ່ຜົນການຈັດຕັ້ງປະຕິບັດການຮ່ວມມື ອາຊຽນ-ອິນເດຍ ໃນໄລຍະຜ່ານມາ ໂດຍສະເພາະ ການຈັດຕັ້ງປະຕິບັດແຜນປະຕິບັດງານ ອາຊຽນ-ອິນເດຍ ໄລຍະ 2016-2020 ແລະ ການຜັນຂະຫຍາຍຜົນຂອງກອງປະຊຸມສຸດຍອດ ອາຊຽນ-ອິນເດຍ ຄັ້ງທີ 16 ໃນເດືອນ ພະຈິກ 2019 ທີ່ ປະເທດໄທ, ເຊິ່ງກວມເອົາສາມເສົາຄ້ຳ ຂອງການສືບຕໍ່ສ້າງປະຊາຄົມອາຊຽນ (ການເມືອງຄວາມໝັ້ນຄົງ, ເສດຖະກິດ ແລະ ວັດທະນະທຳ-ສັງຄົມ):ການຄ້າ ແລະ ການລົງທຶນ, ການເງິນ, ວິທະຍາສາດ, ເຕັກໂນໂລຊີ ແລະ ນະວັດຕະກຳ, ການສຶກສາ, ສາທາລະນະສຸກ, ການເຊື່ອມຈອດ ອາຊຽນ-ອິນເດຍ, ການຮັດແຄບຄວາມແຕກໂຕນດ້ານການພັດທະນາ, ການພັດທະນາແບບຍືນຍົງ, ແລະ ອື່ນໆ. ພິເສດ, ກອງປະຊຸມ ໄດ້ແລກປ່ຽນຂໍ້ມູນຂ່າວສານ, ມາດຕະການ ແລະ ບົດຮຽນທີ່ດີໃນການຮ່ວມມືກັນ ເພື່ອສະກັດກັ້ນ, ເຝົ້າລະວັງ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19. ນອກຈາກນີ້, ກອງປະຊຸມຍັງໄດ້ແລກປ່ຽນຄຳຄິດຄຳເຫັນ ກ່ຽວກັບ ບັນຫາພາກພື້ນ ແລະ ສາກົນ ທີ່ພົ້ນເດັ່ນ ແລະ ມີຄວາມສົນໃຈຮ່ວມກັນ ເປັນຕົ້ນການຊ່ວງຊີງຂອງປະເທດມະຫາອຳນາດ, ໂຄງສ້າງເສດຖະກິດພາກພື້ນ, ຂໍ້ລິເລີ່ມຂອງອິນເດຍ ກ່ຽວກັບ ອິນໂດປາຊີຟິກ ແລະ ອື່ນໆ.

ສຳລັບທິດທາງໃນຕໍ່ໜ້າ, ກອງປະຊຸມ ໄດ້ເຫັນດີເປັນເອກະພາບ ເພື່ອເລັ່ງລັດການຮ່າງ ແຜນປະຕິບັດງານການຮ່ວມມື ອາຊຽນ-ອິນເດຍ ສະບັບໃໝ່ 2021-2025 ໃຫ້ສຳເລັດ ເພື່ອນຳສະເໜີຕໍ່ກອງປະຊຸມສຸດຍອດ ອາຊຽນ-ອິນເດຍ   ທີ່ຈະມາເຖິງໃນເດືອນ ພະຈິກ 2020 ຮັບຮອງເອົາ. ກອງປະຊຸມຄັ້ງນີ້, ຍັງໄດ້ປຶກສາຫາລືການກະກຽມທາງດ້ານເນື້ອໃນ, ພະລາທິການ ແລະ ພິທີການ ໃຫ້ແກ່ກອງປະຊຸມລັດຖະມົນຕີຕ່າງປະເທດ ແລະ ກອງປະຊຸມສຸດຍອດ ອາຊຽນ-ອິນເດຍ      ທີ່ຈະມີຂຶ້ນໃນເດືອນ ກັນຍາ 2020 ແລະ ເດືອນ ພະຈິກ 2020 ຕາມລຳດັບ.