ໃນຕອນເຊົ້າວັນທີ 21 ກໍລະກົດ 2020, ທີ່ ກະຊວງການຕ່າງປະເທດ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງ​ການ​ຕ່າງ​ປະ​ເທດ ທັງເປັນຫົວໜ້າເຈົ້າໜ້າທີ່ອາວຸໂສອາຊຽນຂອງ ສປປ ລາວ ໄດ້​ນຳພາຄະນະ ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສເວທີພາກພື້ນອາຊຽນ ASEAN Regional Forum Senior Officials’ Meeting (ARF SOM) ແບບທາງໄກ, ພາຍໃຕ້ການເປັນປະທານຂອງ ສສ. ຫວຽດນາມ ໃນຖານະປະທານໝູນວຽນອາຊຽນປີ 2020.

ກອງປະຊຸມຄັ້ງນີ້ ໄດ້ຮັບຊາບຜົນການຈັດຕັ້ງປະຕິບັດການພົວພັນຮ່ວມມືຂອບ​ເວທີ​ພາກ​ພື້ນໃນໄລຍະຜ່ານມາ ໂດຍສະເພາະ ການຈັດບັນດາກອງປະຊຸມ ແລະ ກິດຈະກໍາທີ່​ຮັບຮອງ​ເອົາ​ນໍາ​ກັນ ສໍາລັບ​ໄລຍະກາງສະໄໝ 2019-2020, ເຊິ່ງໂດຍລວມກິດຈະກໍາສ່ວນໃຫຍ່ແມ່ນໄດ້ຖືກເລື່ອນ ເນື່ອງຈາກການແຜ່ລະບາດຂອງພະຍາດໂຄວິດ-19. ສໍາລັບທິດທາງໃນຕໍ່ໜ້າ, ກອງປະຊຸມເຫັນດີຈະສືບຕໍ່ຈັດຕັ້ງປະຕິບັດບາງໜ້າວຽກບູລິມະສິດຄື: ການທູດປ້ອງກັນເຫດ, ການຕ້ານການກໍ່ການຮ້າຍ ແລະ ອາດຊະຍາກໍາຂ້າມຊາດ, ຄວາມໝັ້ນຄົງ ແລະ ການນໍາໃຊ້ຂໍ້ມູນ-ຂ່າວສານ ​ແລະ ​ເທັກ​ໂນ​ໂລ​ຊີ, ການບັນເທົາທຸກໄພພິບັດ, ຄວາມໝັ້ນຄົງທາງທະເລ ແລະ ການບໍ່ແຜ່ຜາຍ ແລະ ຫຼຸດຜ່ອນອາວຸດ. ພິເສດ, ກອງປະຊຸມໄດ້ເຫັນດີຕໍ່ຮ່າງ​ແຜນ​ປະຕິ​ບັດ​ງານ​ເວທີ​ພາກ​ພື້ນ​ອາຊຽນສະບັບ​ໃໝ່ (ແຜນປະຕິບັດງານຮ່າໂນ້ຍ ​II) ​ໄລຍະ 2020-2025 ລວມທັງຮ່າງລະບຽບຂັ້ນຕອນ ເລັ່ງໃສ່ສືບຕໍ່ຈັດຕັ້ງປະຕິບັດຂອບການຮ່ວມມື​ເວທີພາກພື້ນອາຊຽນ ໃຫ້ມີປະສິດທິພາບ, ປະສິດທິຜົນ ແລະ ແທດເໝາະກັບສະພາບຕົວຈິງໃນປັດຈຸບັນ. ຂັ້ນຕອນຕໍ່ໄປ, ຮ່າງແຜນປະຕິບັດງານເວທີພາກພື້ນອາຊຽນ ສະບັບ​ໃໝ່ ໄລຍະ 2020-2025 ແລະ ລະບຽບຂັ້ນຕອນນີ້ຈະໄດ້ນໍາສະເໜີຕໍ່ກອງປະຊຸມລັດຖະມົນຕີຕ່າງປະເທດເວທີພາກພື້ນອາຊຽນ ທີ່ຈະມີຂຶ້ນໃນເດືອນ ກັນຍາ 2020 ພິຈາລະນາຮັບຮອງເອົາ. ພ້ອມນີ້, ກອງປະຊຸມຍັງໄດ້ແລກປ່ຽນຄວາມຄິດຄວາມເຫັນຕໍ່ກັບບັນຫາພາກພື້ນ ແລະສາກົນ ທີ່ມີຄວາມສົນໃຈຮ່ວມກັນ.

ນອກຈາກນີ້, ກອງປະຊຸມ ຍັງໄດ້ປຶກສາຫາລືການກະກຽມທັງທາງດ້ານເນື້ອໃນ ແລະ ພາລະທິການ ໃຫ້ແກ່ກອງປະຊຸມລັດຖະມົນຕີຕ່າງປະເທດເວທີພາກພື້ນອາຊຽນ ຄັ້ງທີ 27, ທີ່ຈະມີຂຶ້ນໃນເດືອນ ກັນຍາ 2020.