ໃນວັນທີ 13 ຕຸລາ 2020 ທີ່ຜ່ານມາ, ທີ່ເດີ່ນເຕະບານ ນິວອາລີນາ, ນະຄອນຫຼວງວຽງຈັນ ໄດ້ມີການຈັດກິດຈະກໍາແຂ່ງຂັນກິລາບານເຕະມິດຕະພາບ ລະຫວ່າງ ກະຊວງການຕ່າງປະເທດ, ສະຖານເອກອັກຄະລັດຖະທູດ ແຫ່ງ ສ. ຣັດເຊຍ ປະຈໍາ ສປປ ລາວ, ກະຊວງປ້ອງກັນປະເທດ ແລະ ຄະນະພົວພັນຕ່າງປະເທດສູນກາງພັກ ເພື່ອສະເຫຼີມສະຫຼອງຄົບຮອບ 60 ປີ ແຫ່ງການສ້າງຕັ້ງສາຍພົວພັນການທູດ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສະຫະພັນ ຣັດເຊຍ.
ເຂົ້າຮ່ວມເປັນກຽດໃນການແຂ່ງຂັນກິລາບານເຕະມິດພາບຄັ້ງນີ້ມີ ທ່ານ ບຸນເຫຼືອ ພັນດານຸວົງ, ຮອງລັດຖະມົນ ຕີກະຊວງການຕ່າງປະເທດ; ທ່ານ ສົມດີ ບຸນຄຸ້ມ, ຮອງຫົວໜ້າຄະນະພົວພັນຕ່າງປະເທດສູນກາງພັກ ແລະ ທ່ານ ວະລາດີເມຽ ກາລີນິນ, ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສະຫະພັນ ຣັດເຊຍ ປະຈໍາ ສປປ ລາວ. ນອກຈາກນັ້ນ, ກໍ່ຍັງມີບັນດາຄະນະກົມ ແລະ ນັກກິລາຊາວໜຸ່ມຈາກ 4 ພາກສ່ວນ ລວມທັງພະນັກງານຂອງສະຖານ ທູດ ຣັດເຊຍ ເຂົ້າຮ່ວມຢ່າງພ້ອມພຽງ.
ການແຂ່ງຂັນໃນຮອບຄັດເລືອກ ໄດ້ແບ່ງອອກເປັນ 4 ທີມຊາຍຄື: ທີມກະຊວງການຕ່າງປະເທດ, ທີມສະຖານເອກອັກຄະລັດຖະທູດ ຣັດເຊຍ, ທີມກະຊວງປ້ອງກັນປະເທດ ແລະ ທີມຄະນະພົວພັນຕ່າງປະເທດສູນກາງພັກ. ການແຂ່ງຂັນກິລາຄັ້ງນີ້ ແມ່ນດໍາເນີນໄປດ້ວຍບັນຍາກາດແຫ່ງໄມຕີຈິດມິດຕະພາບ, ມີຄວາມຟົດຟື້ນມ່ວນຊື່ນ ແລະ ເຕັມໄປດ້ວຍຄວາມໝາຍຄວາມສຳຄັນ, ຊຶ່ງຜົນການແຂ່ງຂັນແມ່ນ ທີມຂອງສະຖານເອກອັກຄະລັດຖະທູດ ຣັດເຊຍ ສາມາດເອົາຊະນະ ທີມຂອງກະຊວງການຕ່າງປະເທດ ໄປດ້ວຍຄະແນນ 5-4 ປະຕູ.
ພ້ອມດຽວກັນນີ້, ກະຊວງການຕ່າງປະເທດ ແລະ ສະຖານທູດ ຣັດເຊຍ ຍັງຈະໄດ້ສືບຕໍ່ຈັດປາຖະກະຖາຮ່ວມກັນໃນທ້າຍເດືອນຕຸລາ 2020 ທີ່ ສູນຮ່ວມມື ICTC ເພື່ອເປັນການລະນຶກເຖິງມູນເຊື້ອສາຍພົວພັນມິດຕະພາບ ລາວ ແລະ ຣັດເຊຍ ທີ່ໄດ້ສ້າງຕັ້ງສາຍພົວພັນການທູດນັບແຕ່ວັນທີ 7 ຕຸລາ 1960 - ວັນທີ 7 ຕຸລາ 2020.