ໃນວັນທີ 17 ມີນາ 2021, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ທັງເປັນຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ໄດ້ນຳພາຄະນະ ເຂົ້າຮ່ວມກອງປະຊຸມປຶກສາຫາລື ອາຊຽນ-ອົດສະຕາລີ ຄັ້ງທີ 33 ແບບທາງໄກ ທີ່ ກະຊວງການຕ່າງປະເທດ ພາຍໃຕ້ການເປັນປະທານຮ່ວມ ຂອງ ມາເລເຊຍ ແລະ ອົດສະຕາລີ. ເຂົ້າຮ່ວມກອງປະຊຸມຄັ້ງນີ້ຍັງມີບັນດາຫົວໜ້າເຈົ້າໜ້າທີ່ອາວຸໂສອາຊຽນ, ຮອງເລຂາທິການໃຫຍ່ອາຊຽນ ແລະ ວິຊາການກ່ຽວຂ້ອງຈຳນວນນຶ່ງ.
ກອງປະຊຸມໄດ້ຕີລາຄາສູງຕໍ່ຜົນການຈັດຕັ້ງປະຕິບັດການຮ່ວມມື ອາຊຽນ-ອົດສະຕາລີ ໃນໄລຍະຜ່ານມາ, ເຊິ່ງສະແດງອອກໃນການຈັດຕັ້ງປະຕິບັດແຜນປະຕິບັດງານການຮ່ວມມື ອາຊຽນ-ອົດສະຕາລີ ໄລຍະ 2020-2024 ໂດຍກວມເອົາທັງສາມເສົາຄ້ຳການສ້າງປະຊາຄົມອາຊຽນ: ການເມືອງ-ຄວາມໝັ້ນຄົງ, ເສດຖະກິດ ແລະ ວັດທະນະທຳ-ສັງຄົມ. ພ້ອມນີ້, ກອງປະຊຸມຍັງໄດ້ປຶກສາຫາລື ແລະ ເປັນເອກະພາບກັນ ຕໍ່ທິດທາງແຜນການຮ່ວມມື ອາຊຽນ-ອົດສະຕາລີ ໃນຕໍ່ໜ້າ ໂດຍສະເພາະ ຈະສຸມໃສ່ບາງຂົງເຂດບູລິມະສິດຄື: ການແກ້ໄຂການແຜ່ລະບາດຂອງພະຍາດໂຄວິດ-19; ການເຊື່ອມຈອດອາຊຽນ; ການຈັດຕັ້ງປະຕິບັດສັນຍາເຂດການຄ້າເສລີ ອາຊຽນ-ອົດສະຕາລີ-ນິວຊີແລນ ຫຼື AANZFTA ແລະ ສັນຍາການຮ່ວມມືເສດຖະກິດຮອບດ້ານລະດັບພາກພື້ນ ຫຼື RCEP; ການຫັນໄປສູ່ເສດຖະກິດດິຈິຕອນ; ການຮັດແຄບຄວາມແຕກໂຕນດ້ານການພັດທະນາ; ການສຶກສາ (ການສະໜອງທຶນສຶກສາທັງໄລຍະສັ້ນ ແລະ ໄລຍະຍາວ); ການໄປມາຫາສູ່ລະຫວ່າງປະຊາຊົນກັບປະຊາຊົນ ລວມທັງ ການທ່ອງທ່ຽວ; ບັນຫາການປ່ຽນແປງຂອງດິນຟ້າອາກາດ ແລະ ສິ່ງແວດລ້ອມ; ການຮ່ວມມືຂອບອະນຸພາກພື້ນແມ່ນໍ້າຂອງ; ແລະ ອື່ນໆ.
ໃນກອງປະຊຸມຄັ້ງນີ້, ທ່ານ ຮອງລັດຖະມົນຕີ ທອງຜ່ານ ສະຫວັນເພັດ ໄດ້ສະແດງຄວາມຂອບໃຈ ຕໍ່ການຊ່ວຍເຫຼືອຂອງ ລັດຖະບານ ອົດສະຕາລີ ໃຫ້ແກ່ ສປປ ລາວ ໃນໄລຍະຜ່ານມາ ໂດຍສະເພາະການຊ່ວຍເຫຼືອຢາວັກແຊັງ ຕ້ານພະຍາດໂຄວິດ-19 ທັງໃນຂອບສອງຝ່າຍ ແລະ ຂອບຫຼາຍຝ່າຍ ຜ່ານໂຄງການຢາວັກແຊັງສາກົນ ໂຄແວັກ (COVAX) ແລະ ການພັດທະນາຊັບພະຍາກອນມະນຸດ ດ້ວຍການສະໜອງທຶນສຶກສາໄລຍະຍາວ ແລະ ໄລຍະສັ້ນ. ພ້ອມນີ້, ໄດ້ສະເໜີໃຫ້ສືບຕໍ່ຊ່ວຍເຫຼືອ ໃນວຽກງານການຮັດແຄບຄວາມແຕກໂຕນດ້ານການພັດທະນາ; ການເຊື່ອມຈອດອາຊຽນ; ການຫັນໄປສູ່ເສດຖະກິດດິຈິຕອນ; ແລະ ການພັດທະນາຕົວເມືອງອັດສະລິຍະ.
ນອກຈາກນີ້, ກອງປະຊຸມຄັ້ງນີ້ ຍັງໄດ້ແລກປ່ຽນຄວາມຄິດເຫັນ ຕໍ່ບັນຫາພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ ເປັນຕົ້ນ: ການສົ່ງເສີມລະບົບການຄ້າຫຼາຍຝ່າຍ; ໂຄງສ້າງພາກພື້ນທີ່ອາຊຽນເປັນຜູ້ນຳພາ; ເອກະສານແນວຄວາມຄິດ ອາຊຽນ ວ່າດ້ວຍ ອິນໂດ-ປາຊີຟິກ; ການຮ່ວມມືທາງທະເລ; ແລະ ບັນຫາອື່ນໆ.
ທ້າຍສຸດ, ກອງປະຊຸມໄດ້ປຶກສາຫາລື ການກະກຽມໃຫ້ແກ່ກອງປະຊຸມລັດຖະມົນຕີຕ່າງປະເທດອາຊຽນ ແລະ ອົດສະຕາລີ ແບບທາງໄກ ທີ່ຈະມີຂຶ້ນ ໃນເດືອນສິງຫາ 2021 ແລະ ກອງປະຊຸມສຸດຍອດຜູ້ນໍາ ອາຊຽນ-ອົດສະຕາລີ ຄັ້ງທໍາອິດ ໃນເດືອນຕຸລາ ປີນີ້ ພາຍໃຕ້ການເປັນປະທານ ຂອງ ບຣູໄນ.
---------//--------