ທ່ານຮອງລັດຖະມົນຕີ ພົບປະກັບ ຮອງເລຂາພັກແຂວງໆຫຼວງພະບາງ

ທ່ານຮອງລັດຖະມົນຕີ ໂອ້ລົມກັບພະແນກການຕ່າງປະເທດແຂວງຫຼວງພະບາງ

ຢ້ຽມຢາມ ມະຫາວິທະຍາໄລ ສຸພານຸວົງ

ກວດ​ກາ​ພື້ນທີ່ໆຈະກໍ່ສ້າງຂົວຂ້າມນໍ້າຂອງ (ຫຼວງພະບາງ-ຊຽງແມນ) ຢູ່ ເມືອງຈອມເພັດ

ສຳຫຼວດທາງຫຼວງແຫ່ງຊາດ ເລກ​ທີ 4B

ເພື່ອເປັນການປະກອບສ່ວນເຂົ້າໃນການສ້າງບັນຍາກາດ ແລະ ສະພາບແວດລ້ອມອັນດີໃຫ້ແກ່ການພົວພັນ ແລະ ຮ່ວມມື ລະຫວ່າງ ລາວ-ໄທ ໃນໂອກາດສະເຫຼີມສະຫຼອງຄົບຮອບ 70 ປີ ແຫ່ງການສ້າງຕັ້ງສາຍພົວພັນການທູດ ລາວ-ໄທ (19 ທັນວາ 1950 - 19 ທັນວາ 2020) ໃນປີ 2020, ທັງເປັນການຕິດຕາມ ແລະ ຊຸກຍູ້ການຈັດຕັ້ງປະຕິບັດບັນດາໂຄງການຮ່ວມມືຕ່າງໆ ລະຫວ່າງ ລາວ ແລະ ໄທ ໃຫ້ມີຄວາມຍືນຍົງ ແລະ ສໍາເລັດຕາມເປົ້າໝາຍ, ໃນລະຫວ່າງວັນທີ 10-16 ມີນາ 2021, ທ່ານ ທອງສະຫວັນ ພົມວິຫານ, ກຳມະການສູນກາງພັກ, ຮອງເລຂາຄະນະພັກກະຊວງ, ຮອງລັດຖະມົນຕີກະຊວງການຕ່າງປະເທດ ໄດ້ນໍາພາຄະນະເຄື່ອນໄຫວຢ້ຽມຢາມ ແລະ ເຮັດວຽກ ຢູ່ ແຂວງຫຼວງພະບາງ ແລະ ແຂວງໄຊຍະບູລີ,ຊຶ່ງເປັນເຂດທີ່ມີໂຄງການຮ່ວມມືພົ້ນເດັ່ນ ລະ​ຫວ່າງ ສ​ປ​ປ ລາວ ແລະ ລາ​ຊະ​ອາ​ນາ​ຈັກໄທ.​

ໃນໂອກາດເຄື່ອນໄຫວເຮັດວຽກທີ່ ແຂວງຫຼວງພະບາງ, ຄະນະໄດ້ຢ້ຽມຢາມມະຫາວິທະຍາໄລ     ສຸພານຸວົງທີ່ໄດ້ຮັບໂຄງການຮ່ວມມືຈາກລັດຖະບານໄທ ໃນໄລຍະຜ່ານມາ ເປັນຕົ້ນແມ່ນ ໂຄງການພັດທະນາ ບຸກຄະລາກອນ, ໂຄງການພັດທະນາຫໍສະໝຸດ ແລະ ໂຄງການພັດທະນາຫຼັກສູດການປຸງແຕ່ງກະສິກຳ. ໂຄງການດັ່ງກ່າວ ແມ່ນໄດ້ຮັບການຈັດຕັ້ງປະຕິບັດຜ່ານກົນໄກການຮ່ວມມືດ້ານວິຊາການ ລາວ-ໄທ ໂດຍມີ ຈຸດປະສົງ ເພື່ອສ້າງຄວາມເຂັ້ມແຂງໃຫ້ແກ່ມະຫາວິທະຍາໄລສຸພານຸວົງ ໃນຖານະເປັນສະຖາບັນການ​ສຶກ​ສາ ເພື່ອກໍ່ສ້າງບຸກຄະລາກອນຮັບໃຊ້ສັງຄົມລາວ. ຈາກນັ້ນ, ຄະນະ ໄດ້ສືບຕໍ່ລົງຢ້ຽມ​ຢາມ ແລະ ກວດ​ກາ​ພື້ນທີ່ໆຈະກໍ່ສ້າງຂົວຂ້າມນໍ້າຂອງ (ຫຼວງພະບາງ-ຊຽງແມນ) ຢູ່ ເມືອງຈອມເພັດ, ຊຶ່ງເປັນໂຄງການທີ່ໄດ້​ຮັບ​ການ​ສະ​ໜັບ​ສະ​ໜູນ​ຈາກສໍານັກງານຮ່ວມມື ເພື່ອການພັດທະນາດ້ານເສດຖະກິດກັບປະເທດເພື່ອນບ້ານ (NEDA) ປະເທດໄທ ໃນການສຶກສາຄວາມເປັນໄປໄດ້ເບື້ອງຕົ້ນໃນ​ການກໍ່​ສ້າງ ເພື່ອກ້າວໄປສູ່ການກໍ່ສ້າງຂົວດັ່ງ​ກ່າວ ໃນໄວໆນີ້. ຄະ​ນະ ຍັງໄດ້ເດີນທາງໄປສຳຫຼວດທາງຫຼວງແຫ່ງຊາດ ເລກ​ທີ 4B ​ເລີ່ມແຕ່ ເມືອງຈອມເພັດ, ແຂວງຫຼວງພະບາງ ເຖິງ ເມືອງຫົງສາ, ແຂວງໄຊຍະບູລີ, ​ຊຶ່ງໄດ້ຮັບການສະໜັບສະໜູນເງິນກູ້ຈາກລັດຖະບານໄທ ອີກດ້ວຍ. ໃນໂອກາດຢ້ຽມຢາມແຂວງຫຼວງພະບາງຄັ້ງນີ້, ທ່ານຮອງລັດຖະມົນຕີ ແລະ ຄະນະ ຍັງໄດ້ພົບປະກັບ ທ່ານ ວົງສະຫວັນ ເທບພະຈັນ, ຮອງເລຂາພັກແຂວງໆຫຼວງພະບາງ ແລະ ໄດ້ໂອ້ລົມກັບ ພະແນກການຕ່າງປະເທດແຂວງດັ່ງກ່າວ ເພື່ອແລກປ່ຽນບົດຮຽນໃນການເຄື່ອນໄຫວວຽກງານຕ່າງປະເທດ ໃຫ້ມີປະສິດທິພາບສູງ ແລະ ສອດຄ່ອງກັບສະພາບການພາຍໃນປະເທດ, ພາກພື້ນ ແລະ ສາກົນ ອີກດ້ວຍ.

ນອກຈາກນັ້ນ, ທ່ານຮອງລັດຖະມົນຕີ ຍັງໄດ້ເປັນປະທານກອງປະຊຸມເຜີຍແຜ່ກົດ​ໝາຍ​ວ່າ​ດ້ວຍ​ຊັ້ນ​ນັກ​ການ​ທູດ​ ທີ່​ຫາກໍ່​ໄດ້​ປະ​ກາດ​ໃຊ້, ​ໄດ້ທົບທວນຄືນ ແລະ ຕິດຕາມກວດກາການຈັດຕັ້ງປະຕິບັດນິຕິກຳຕ່າງໆ ຂອງຂະແໜງການຕ່າງປະເທດ ໃຫ້ແກ່ພະນັກງານຫຼັກແຫຼ່ງອ້ອມຂ້າງ 8 ແຂວງພາກເໜືອ ເຂົ້າ​ຮ່ວມ​ຫຼາຍກວ່າ 100 ທ່ານ ເພື່ອຍົກສູງຄວາມ​ຮັບ​ຜິດ​ຊອບໃນການຈັດຕັ້ງປະຕິ​ບັດ​ບັນ​ດາ​ນິ​ຕິ​ກຳ​ດັ່ງ​ກ່າວ ໃຫ້ມີປະສິດຕິພາບ ແລະ ປະສິດຕິຜົນສູງຂຶ້ນ ທັງລວມສູນ ແລະ ເປັນເອກະພາບ.

ກອງປະຊຸມເຜີຍແຜ່ກົດ​ໝາຍ​ວ່າ​ດ້ວຍ​ຊັ້ນ​ນັກ​ການ​ທູດ

ພາຍຫຼັງສຳເລັດການເຄື່ອນໄຫວຢູ່ແຂວງຫຼວງພະບາງ, ຄະນະ ໄດ້ສືບຕໍ່ຢ້ຽມຢາມ ແລະ ເຮັດວຽກ ຢູ່ແຂວງໄຊຍະບູລີ, ໂດຍໄດ້ພົບປະກັບ ທ່ານ ພົງສະຫວັນ ສິດທະວົງ, ເລຂາພັກແຂວງ, ເຈົ້າແຂວງໄຊຍະບູລີ; ໄດ້ຈັດ​ກອງ​ປະ​ຊຸມໂອ້ລົມ​ພະ​ນັກ​ງານພະແນກການຕ່າງປະເທດ ແລະ ພະນັກງານຫຼັກແຫຼ່ງອ້ອມຂ້າງ ແຂວງໄຊຍະບູລີ ​ແລະ ​ມີ​ຜູ້​ເຂົ້າ​ຮ່ວມຫຼາຍກວ່າ 100 ທ່ານ ເພື່ອແລກປ່ຽນບົດຮຽນໃນການເຄື່ອນໄຫວວຽກງານຕ່າງປະເທດ​ ໃຫ້​ມີປະສິດທິພາບ ແລະ ສອດຄ່ອງກັບສະພາບການ​ໃນ​ປັດ​ຈຸ​ບັນ. ພ້ອມທັງໄດ້ເນັ້ນໃຫ້ຍົກສູງຄວາມຮັບຜິດຊອບ ແລະ ຄວາມເປັນເຈົ້າການຂອງພະນັກງານ ໃນການເຄື່ອນໄຫວວຽກ​ງານ​ດັ່ງ​ກ່າວ ຕາມການມອບໝາຍຂອງຂັ້ນເທິງ. ຫຼັງຈາກນັ້ນ, ຄະນະ ໄດ້ລົງຢ້ຽມຢາມພົບປະຄູອາຈານ ແລະ ນ້ອງນັກຮຽນ ທີ່ ໂຮງຮຽນປະຖົມບ້ານສີເມືອງ (ໂຮງຮຽນມິດຕະພາບລາວ-ໄທ ຫຼັງທີ 11), ຊຶ່ງໄດ້ຮັບການຊ່ວຍເຫຼືອຈາກສະມາຄົມ ລາວ-ໄທ, ໄທ-ລາວ ເພື່ອມິດຕະພາບ ໃນການສ້າງອາຄານຮຽນ ຈຳນວນ 2 ຫຼັງ, ຫ້ອງການຄູ 1 ຫຼັງ ແລະ ຫ້ອງນໍ້າ. ພ້ອມນີ້, ທ່ານຮອງລັດຖະມົນຕີ ຍັງໄດ້ນຳພາຄະນະຢ້ຽມຢາມ ແລະ ໃຫ້ກຳລັງໃຈການປະຕິບັດວຽກງານຂອງເຈົ້າໜ້າທີ່ ຢູ່ ດ່ານສາກົນເມືອງນໍ້າເງິນ, ແຂວງໄຊຍະບູລີ (ດ່ານຊາຍແດນ ລະຫວ່າງ ແຂວງໄຊຍະບູລີ, ສປປ ລາວ ແລະ ຈັງຫວັດນ່ານ, ປະເທດໄທ) ໂດຍສະເພາະ ການຈັດຕັ້ງປະຕິບັດວຽກງານ ໃນສະພາບການລະບາດຂອງພະຍາດໂຄວິດ-19. ໃນໂອກາດເຄື່ອນໄຫວ​ຄັ້ງ​ນີ້, ທ່ານຮອງລັດຖະມົນຕີ ຍັງໄດ້ນໍາພາຄະນະ ຢ້ຽມຢາມ ແລະ ຊຸກຍູ້ການຈັດຕັ້ງປະຕິບັດວຽກງງານຢູ່ໂຄງການລົງທຶນຂະໜາດໃຫຍ່ຂອງໄທ ຢູ່ແຂວງໄຊຍະບູລີ ອີກດ້ວຍ ເປັນຕົ້ນແມ່ນ ໂຮງໄຟຟ້າຫົງສາລິກໄນ ແລະ ເຂື່ອນໄຟຟ້າພະລັງງານນໍ້າຂອງໄຊຍະບູລີ, ຊຶ່ງທ່ານຮອງລັດຖະມົນຕີ ໄດ້ເນັ້ນຢໍ້າເຖິງການຈັດຕັ້ງປະຕິບັດໂຄງການດັ່ງ​ກ່າວ ໃຫ້ເປັນກາຍ​ເປັນ​ໂຄງ​ການ​ຕົວ​ແບບ, ຮັບ​ປະ​ກັນ​ໃຫ້ມີຄວາມຍືນຍົງ, ເປັນມິດຕໍ່ສິ່ງແວດລ້ອມ, ຕິດພັນກັບສັງຄົມ ແລະ ສ້າງວຽກເຮັດງານທໍາໃຫ້ປະ​ຊາ​ຊົນທ້ອງຖິ່ນ ນັບມື້ນັບຫຼາຍຂຶ້ນ.

ທ່ານຮອງລັດຖະມົນຕີ ໂອ້ລົມກັບພະແນກການຕ່າງປະເທດແຂວງໄຊຍະບູລີ

ຢ້ຽມຢາມພົບປະຄູອາຈານ ແລະ ນ້ອງນັກຮຽນ ທີ່ ໂຮງຮຽນປະຖົມບ້ານສີເມືອງ (ໂຮງຮຽນມິດຕະພາບລາວ-ໄທ ຫຼັງທີ 11)

ຢ້ຽມຢາມດ່ານສາກົນເມືອງນໍ້າເງິນ, ແຂວງໄຊຍະບູລີ

ຢ້ຽມຢາມໂຮງໄຟຟ້າຫົງສາລິກໄນ

ຢ້ຽມຢາມເຂື່ອນໄຟຟ້າພະລັງງານນໍ້າຂອງໄຊຍະບູລີ

ການເຄື່ອນໄຫວຢ້ຽມຢາມ ແລະ ເຮັດວຽກຢູ່ທັງສອງແຂວງ ໃນຄັ້ງນີ້ ໄດ້ຮັບຜົນສໍາເລັດຢ່າງຈົບງາມ ແລະ ໄດ້ປະກອບສ່ວນອັນສໍາຄັນເຂົ້າໃນການສະເຫຼີມສະຫຼອງ ຄົບຮອບ 70 ປີ ແຫ່ງການສ້າງຕັ້ງສາຍພົວພັນການທູດ ລາວ-ໄທ ກໍຄື ຊ່ວຍສົ່ງເສີມການພົວພັນຮ່ວມມືອັນດີງາມ ຖານປະເທດບ້ານໃກ້ເຮືອນຄຽງ ທີ່ມີມາແຕ່ບູຮານນະການ ລະຫວ່າງສອງປະເທດ ລາວ ແລະ ໄທ ໃຫ້ມີຄວາມແໜ້ນເເຟ້ນ ແລະ ຂະຫຍາຍຕົວຍິ່ງໆຂື້ນໃນອະນາຄົດ ທັງສ້າງໄດ້ຄວາມໃກ້ຊິດຕິດແທດ ລະຫວ່າງສູນກາງ ກໍຄື ກະຊວງການຕ່າງປະເທດ ແລະ ທ້ອງຖິ່ນອີກດ້ວຍ.