ໃນວັນທີ 19 ມີນາ 2021, ທີ່ ແຂວງຫລວງພະບາງ, ກົມເສດຖະກິດ, ກະຊວງການຕ່າງປະເທດ ໄດ້ຈັດກອງປະຊຸມເຜີຍແຜ່ໂຄງການຝຶກອົບຮົມ ສໍາລັບພະນັກງານໜຸ່ມ ຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ໃນຫົວຂໍ້: “ການຮ່ວມມືພາກພື້ນ ແລະ ສາກົນ” ພາຍໃຕ້ການສະໜັບສະໜູນຈາກ ກອງທຶນພິເສດແມ່ນໍ້າຂອງ-ແມ່ນໍ້າລ້ານຊ້າງ ພາຍໃຕ້ການເປັນປະທານຮ່ວມ ຂອງ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ແລະ ທ່ານ ນາງ ສິລິພອນ ສຸພັນທອງ, ຮອງເຈົ້າແຂວງຫຼວງພະບາງ ໂດຍມີຜູ້ເຂົ້າຮ່ວມຈາກສູນກາງ ແລະ ຂະແໜງການທີ່ກ່ຽວຂ້ອງຈາກ ແຂວງຫຼວງນໍ້າທາ, ຜົ້ງສາລີ, ໄຊຍະບູລີ, ຫົວພັນ, ຊຽງຂວາງ, ບໍ່ແກ້ວ ແລະ ອຸດົມໄຊ ເຂົ້າຮ່ວມລວມທັງໝົດ 70 ທ່ານ. ກອງປະຊຸມຄັ້ງນີ້ ຍັງຖືເປັນກິດຈະກໍາໜຶ່ງທີ່ສໍາຄັນທີ່ ສປປ ລາວ ປະກອບສ່ວນເຂົ້າໃນການສະເຫຼີມສະຫຼອງວັນສ້າງຕັ້ງຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ຄົບຮອບ 5 ປີ (23 ມີນາ 2016 - 23 ມີນາ 2021) ແລະ ງານສັບປະດາແມ່ນໍ້າຂອງ-ແມ່ນໍ້າລ້ານຊ້າງ ປະຈໍາປີ 2021.
ຈຸດປະສົງ ຂອງກອງປະຊຸມຄັ້ງນີ້ ແມ່ນແນ່ໃສ່ເພີ່ມທະວີຄວາມເຂົ້າໃຈ ແລະ ການຮ່ວມມືໃນຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ກໍ່ຄືຂອບການຮ່ວມມືພາກພື້ນ ແລະ ອານຸພາກພື້ນແມ່ນໍ້າຂອງ ໂດຍໝູນໃຊ້ທ່າແຮງຂອງການຮ່ວມມືດັ່ງກ່າວ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ ໂດຍສະເພາະຢູ່ບັນດາແຂວງພາກເໜືອທີ່ມີຊາຍແດນຕິດຈອດກັບ ສປ ຈີນ. ນອກນັ້ນ, ທີປະຊຸມຍັງໄດ້ຮັບຟັງໝາກຜົນການຮ່ວມມືພາຍໃຕ້ຂໍ້ລິເລີ່ມ ໜຶ່ງແລວ ໜຶ່ງເສັ້ນທາງ ເຊິ່ງເປັນນະໂຍບາຍ ແລະ ຍຸດທະສາດສໍາຄັນໜຶ່ງ ທີ່ ສປ ຈີນ ກໍາລັງຈັກຕັ້ງປະຕິບັດຢູ່ໃນຫລາຍພາກພື້ນ, ໃນນັ້ນ, ລວມມີພາກພື້ນອານຸແມ່ນໍ້າຂອງ ໂດຍຜ່ານການຮ່ວມມື ທັງຮູບແບບສອງຝ່າຍ ແລະ ຫຼາຍຝ່າຍ ໃນພາກພື້ນ ແລະ ສາກົນ. ຄຽງຄູ່ກັນຜູ້ເຂົ້າຮ່ວມກໍ່ໄດ້ຮັບຟັງ ແລະ ແລກປ່ຽນຄວາມຄິດເຫັນ ກ່ຽວກັບ ການຮ່ວມມືແມ່ນ້ຳຂອງ ກັບຄູ່ຮ່ວມພັດທະນາ ໂດຍລົງເລິກຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ ລວມທັງຂັ້ນຕອນການສະເໜີໂຄງການ ພາຍໃຕ້ກອງທຶນພິເສດແມ່ນ້ຳຂອງ-ແມ່ນ້ຳລ້ານຊ້າງ. ໃນຕອນທ້າຍ ກອງປະຊຸມ ໄດ້ຮັບຟັງການພັດທະນາເສດຖະກິດ-ສັງຄົມ ຂອງບັນດາແຂວງພາກເໜືອ ທີ່ໄດ້ຍົກໃຫ້ເຫັນເຖິງກາລະໂອກາດ ແລະ ສິ່ງທ້າທາຍ ໃນການຮ່ວມມືກັບສາກົນ ໂດຍສະເພາະກັບ ສປ ຈີນ ແລະ ສຸມໃສ່ແລກປ່ຽນຄຳຄິດຄຳເຫັນ ເພື່ອຊອກຫາກາລະໂອກາດ ໃນການໝູນໃຊ້ທ່າແຮງການຮ່ວມມືພາກພື້ນ ແລະ ສາກົນ ຂອງ ສປປ ລາວ ເຂົ້າໃນການພັດທະນາເສດຖະກິດ-ສັງຄົມແຫ່ງຊາດ ກໍ່ຄືຂອງທ້ອງຖິ່ນໃຫ້ມີປະສິດທິພາບ ແລະ ມີປະສິດທິຜົນຍິ່ງໆຂຶ້ນ.