ໃນຕອນເຊົ້າຂອງວັນທີ 27 ເມສາ 2021, ທີ່ກະຊວງການຕ່າງປະເທດ ທ່ານບຸນເຫຼືອພັນດານຸວົງ, ຮອງລັດຖະມົນຕີກະຊວງການຕ່າງປະເທດແຫ່ງ ສປປ ລາວ ໄດ້ນຳພາຄະນະຜູ້ແທນລາວເຂົ້າຮ່ວມກອງປະຊຸມໃຫ່ຍປະຈຳປີຄັ້ງທີ 77 ຂອງຄະນະກຳມາທິການເສດຖະກິດ - ສັງຄົມ ສປຊປະຈຳພາກພື້ນອາຊີ-ປາຊີຟິກ (UNESCAP)ຜ່ານລະບົບປະຊຸມທາງໄກ (Video Conference), ໂດຍການເປັນປະທານຂອງ ທ່ານ ມຸກຕາ ເລີແບດີ, (Mukhtar Tleuberdi), ຮອງນາຍົກລັດຖະມົນຕີ, ລັດຖະມົນຕີຕ່າງປະເທດກາຊັກສະຖານ, ມີຄະນະຜູ້ແທນຈາກປະເທດສະມາຊິກ ແລະ ປະເທດສັງເກດການ, ອົງການເຄືອຂ່າຍສປຊປະຈຳພາກພື້ນເຂົ້າຮ່ວມ. ກອງປະຊຸມຄັ້ງນີ້ດຳເນີນໄປພາຍໃຕ້ຫົວຂໍ້ “ການຟື້ນຟູທຫຼັງຈາກວິກິດການໃຫ້ດີກ່ວາເກົ່າໂດຍຜ່ານການຮ່ວມມືໃນພາກພື້ນອາຊີ ແລະ ປາຊີຟິກ (Building back better from crises through regional cooperation in Asia and the Pacific)”, ຊຶ່ງຈະດຳເນີນໄປຈົນຮອດວັນທີ 29 ເມສາ 2021 ນີ້.
ໃນກອງປະຊຸມດັ່ງກ່າວ ເປັນກອງປະຊຸມປະຈຳປີ ເພື່ອປຶກສາຫາລືການຮ່ວມມືຂອງບັນດາປະເທດໃນພາກພື້ນ ອາຊີ-ປາຊີຟິກ ໃນວຽກງານການພັດທະນາເສດຖະກິດ-ສັງຄົມ. ອີງໃສ່ສະພາບການແຜ່ລະບາດຂອງ COVID-19, ໃນປີນີ້ ກອງປະຊຸມຈະໄດ້ສຸມໃສ່ ປຶກສາຫາລື ການຮ່ວມມືໃນການຮັບມືກັບການແຜ່ລະບາດຂອງພະຍາດ COVID-19 ແລະ ການຟື້ນຟູເສດຖະກິດ ພາຍຫຼັງການລະບາດ. ນອກຈາກນີ້, ບັນດາຄະນະຜູ້ແທນຈະໄດ້ພ້ອມກັນທົບທວນຄືນການຈັດຕັ້ງປະຕິບັດບັນດາຄວາມໝາຍໝັ້ນຕ່າງໆຂອງສາກົນ, ເປັນຕົ້ນ ທົບທວນຄືນການຈັດຕັ້ງປະຕິບັດແຜນງານອິດສະຕັນບູນສຳລັບປະເທດດ້ອຍພັດທະນາ ເພື່ອປະເມີນຄວາມຄືບໜ້າ ແລະ ສິ່ງທ້າທາຍທີ່ ບັນດາປະເທດໃນພາກພື້ນກຳລັງປະເຊີນໜ້າ, ທົບທວນຄືນການຈັດຕັ້ງວາລະ 2030 ເພື່ອການພັດທະນາແບບຍືນຍົງໃນພາກພື້ນອາຊີ - ປາຊີຟິກ. ນອກຈາກນັ້ນ, ກອງປະຊຸມຍັງຈະໄດ້ປຶກສາຫາລື ແລະ ຊອກຫາທາງອອກຮ່ວມກັນໃນການແກ້ໄຂຜົນກະທົບທາງດ້ານເສດຖະກິດ-ສັງຄົມໃຫ້ດີກວ່າເກົ່າ ພາຍຫຼັງການລະບາດຂອງເຊື້ອພະຍາດ ໂຄວິດ-19 ໄດ້ສິ້ນສຸດລົງ.
ໃນໂອກາດດັ່ງກ່າວ, ທ່ານ ບຸນເຫຼືອ ພັນດານຸວົງ ໃນນາມຫົວໜ້າຄະນະຜູ້ແທນ ສປປ ລາວ ກໍ່ໄດ້ຂຶ້ນກ່າວຄຳເຫັນຕໍ່ກອງປະຊຸມ ໂດຍທ່ານໄດ້ຍົກໃຫ້ເຫັນເຖິງຄວາມສຳຄັນຂອງການຮ່ວມມືແບບຫຼາຍຝ່າຍ ໃນການຮັບມືກັບການແຜ່ລະບາດຂອງ COVID-19 ແລະ ການຟື້ນຟູເສດຖະກິດ. ທ່ານ ໄດ້ຢືນຢັນ ການສະໜັບສະໜູນຂອງ ສປປ ລາວ ຕໍ່ໂຄງການ COVAX Facilities ເພື່ອເຮັດໃຫ້ທຸກປະເທດສາມາດເຂົ້າເຖິງຢາວັກຊີນ ແລະ ໄດ້ຮຽກຮ້ອງ ໃຫ້ມີການຊ່ວຍເຫຼືອພິເສດຕໍ່ບັນດາປະເທດທີ່ມີຄວາມອ່ອນໄຫວສູງ, ໂດຍສະເພາະ ປະເທດດ້ອຍພັດທະນາ, ປະເທດກຳລັງພັດທະນາທີ່ບໍ່ມີຊາຍແດນຕິດທະເລ ແລະ ປະເທດເກາະດອນນ້ອຍພັດທະນາ. ທ່ານໄດ້ເຫັນດີ ຕໍ່ 4 ຂົງເຂດການຮ່ວມມືທີ່ຈະຕ້ອງໄດ້ເພີ່ມຄວາມເອົາໃຈໃສ່ ທີ່ສະເໜີໂດຍກອງເລຂາ ESCAP: ການປົກປ້ອງສັງຄົມ, ການລົງທຶນເພື່ອການຟື້ນຟູເສດຖະກິດແບບຢືນຍົງ, ການຮັດແໜ້ນການເຊື່ອມຈອດ ເພື່ອຮັບປະກັນຕ່ອງໂສ້ການຕອບສະໜອງສິນຄ້າ ແລະ ການປົກປ້ອງສິ່ງແວດລ້ອມ. ທ່ານໄດ້ຢືນຢັນ ສປປ ລາວ ພ້ອມແລ້ວທີ່ຈະໃຫ້ການຮ່ວມມືກັບວົງຄະນາຍາດສາກົນ ໃນການຮັບມືກັບການແຜ່ລະບາດຂອງ COVID-19 ແລະ ໄດ້ສະແດງຄວາມຂອບໃຈ ຕໍ່ການຊ່ວຍເຫຼືອຂອງປະເທດເພື່ອນມິດ ແລະ ອົງການຈັດຕັ້ງສາກົນ ທີ່ໄດ້ໃຫ້ການຊ່ວຍເຫຼືອອັນລໍ້າຄ່າຕໍ່ ສປປ ລາວ ໃນໄລຍະຜ່ານມາ ແລະ ຫວັງວ່າ ຈະສືບຕໍ່ໄດ້ຮັບການຊ່ວຍເຫຼືອຕື່ມອີກ. .
ຄະນະກຳມາທິການ UNESCAP ແມ່ນອົງກອນພາກພື້ນດ້ານການພັດທະນາຂອງອົງການ ສປຊ, ເຊິ່ງຖືກກໍ່ຕັ້ງຂຶ້ນໃນປີ 1947 ໂດຍມີສຳນັກງານຕັ້ງຢູ່ບາງກອກ, ປະເທດໄທ, ມີສະມາຊິກ 53 ປະເທດ, ເປັນເວທີເພື່ອທົບທວນ ແລະ ປຶກສາຫາລືບັນຫາເສດຖະກິດ-ສັງຄົມຢູ່ໃນພາກພື້ນ, ມີບົດບາດໃນການສົ່ງເສີມການຮ່ວມມືດ້ານຕ່າງໆ ແລະ ມີໜ້າທີ່ລາຍງານຕໍ່ສະພາເສດຖະກິດ-ສັງຄົມ ສປຊ. ນອກນັ້ນ, ກອງເລຂາ UNESCAP ຍັງມີໜ້າທີ່ໃນການຊ່ວຍເຫຼືອດ້ານເຕັກນິກ-ວິຊາການໃຫ້ແກ່ປະເທດສະມາຊິກ, ຊ່ວຍວາງແນວທາງນະໂຍບາຍ ແລະຈັດຕັ້ງປະຕິບັດບັນດາແຜນງານຕ່າງໆອີກດ້ວຍ.