ໃນວັນທີ 15 ກໍລະກົດ 2021, ທີ່ ກະຊວງການຕ່າງປະເທດ, ໄດ້ມີພິທີລົງນາມ​​ເອ​ກະ​ສານ​ແລກປ່ຽນ (Exchange of Notes - E/N)ເພື່ອຮັບເອົາໂຄງການຊ່ວຍ​ເຫຼືອລ້າໃນແຜນ​ຈາກ ລັດ​ຖະ​ບານ​ຍີ່​ປຸ່ນ. ຕາງໜ້າຝ່າຍລາວ ຮ່ວມລົງນາມ ຄັ້ງນີ້ແມ່ນ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ແລະ ຕາງໜ້າຝ່າຍຍີ່ປຸ່ນ ແມ່ນ ທ່ານ ທາເກວາກະ ເຄໂຊ (TAKEWAKA Keizo), ເອກ​ອັກຄະ​ຣາຊະທູດ ຍີ່ປຸ່ນ ປະຈໍາ ສປປ ລາວ, ມີບັນດາພະນັກງານກ່ຽວຂ້ອງ ຂອງທັງສອງຝ່າຍ ເຂົ້າຮ່ວມຢ່າງພ້ອມພຽງ.

ໂຄງການຊ່ວຍເຫຼືອໃນຄັ້ງນີ້, ແມ່ນໂຄງການທຶນການສຶກສາເພື່ອພັດທະນາຊັບພະຍາກອນມະນຸດ The Project for Human Resource Development Scholarship (JDS), ມູນຄ່າ 313 ລ້ານເຢນ (ປະມານ 3 ລ້ານ ໂດລາສະຫະລັດ), ຊຶ່ງແມ່ນທຶນການສຶກສາລະດັບປະລິນຍາໂທແລະປະລິນຍາເອກທີ່ລັດຖະບານຍີ່ປຸ່ນສະໜອງໃຫ້ແກ່ລັດຖະບານສປປລາວ, ໃນການຍົກລະດັບຂີດຄວາມສາມາດຂອງພະນັກງານລັດຖະກອນລາວນັບແຕ່ສູນກາງລົງຮອດທ້ອງຖິ່ນໃຫ້ນັບມື້ນັບຫລາຍຂຶ້ນ.ນັບແຕ່ປີ 2000 ມາຮອດປີ 2020, ລັດຖະບານຍີ່ປຸ່ນໄດ້ສະໜອງທຶນການສຶກສາດັ່ງກ່າວໃຫ້ແກ່ສປປລວມທັງໝົດ 464 ທຶນ (ປະລິນຍາໂທ 454 ທຶນ, ປະລິນຍາເອກ 10 ທຶນ),ໃນຂະແໜງການສຶກສາ, ສາທາລະນະສຸກ, ກະສິກໍາແລະປ່າໄມ້, ພື້ນຖານໂຄງລ່າງແລະອື່ນໆ.

ໃນໂອກາດນີ້, ທ່ານ ຮອງລັດຖະມົນຕີ ທອງຜ່ານ ສະຫວັນເພັດ ກໍໄດ້ຕີ​ລາ​ຄາ​ສູງ​ ແລະ ສະແດງຄວາມຂອບໃຈຢ່າງຈິງໃຈ ຕໍ່ການ​ສະ​ໜັບ​ສະ​ໜູນແລະ ​ຊ່ວຍ​ເຫຼືອຂອງລັດ​ຖະ​ບານກໍຄືປະ​ຊາ​ຊົນ​ຍີ່​ປຸ່ນຕະຫຼອດ​ໄລ​ຍະ​ທີ່​ຜ່ານ​ມາ, ໂດຍ​ສະ​ເພາະການຊ່ວຍເຫຼືອທາງການເພື່ອການພັດທະນາ (ODA) ຂອງຍີ່ປຸ່ນທີ່ຍັງຢູ່ໃນອັນດັບແຖວໜ້າຂອງການຊ່ວຍເຫຼືອຈາກຕ່າງປະເທດໃຫ້ແກ່ສປປລາວ. ເຖິງແມ່ນວ່າສະພາບການລະບາດຂອງພະຍາດໂຄວິດ-19 ໄດ້ເຮັດໃຫ້ການຈັດຕັ້ງປະຕິບັດແຜນງານແລະໂຄງການຮ່ວມມືຂອງສອງລັດຖະບານລາວ ແລະຍີ່ປຸ່ນຈໍານວນໜຶ່ງມີຄວາມຫຼ້າຊ້າຫຼືຖືກເລື່ອນອອກໄປກໍຕາມ, ແຕ່ວ່າຂະບວນການພິຈາລະນາບັນດາໂຄງການສະເໜີປະຈໍາປີຂອງລັດຖະບານລາວແມ່ນຍັງສືບຕໍ່ໄດ້ຮັບການຊຸກຍູ້ສົ່ງເສີມແລະພິຈາລະນາຢ່າງຕັ້ງໜ້າຈາກພາກສ່ວນກ່ຽວຂ້ອງກໍຄືລັດຖະບານຍີ່ປຸ່ນ. ພ້ອມດຽວກັນນີ້, ທ່ານ ຮອງລັດຖະມົນຕີ ທອງຜ່ານ ສະຫວັນເພັດ ກໍໄດ້ ສະແດງຄວາມເສຍໃຈ ແລະ ເຫັນໃຈຢ່າງສຸດຊຶ້ງ ຕໍ່ເຫດການດິນຕົມເຈື່ອນຮຸນແຮງຢູ່ ເມືອງອາຕາມິ, ແຂວງຊິຊຸໂອໂກະ, ປະເທດ ຍີ່ປຸ່ນ, ໃນວັນທີ 3 ກໍລະກົດ 2021 ຜ່ານມາ.

ໃນໂອກາດດຽວກັນນີ້, ທ່ານເອກອັກຄະລັດຖະທູດ ທາເກວາກະ ເຄໂຊ ໄດ້ສະແດງຄວາມຍິນດີທີ່ໄດ້ຕາງໜ້າໃຫ້ລັດຖະບານຍີ່ປຸ່ນ ຮ່ວມລົງນາມເອກະສານແລກປ່ຽນ ລະຫວ່າງ ສປປ ລາວ ແລະ ຍີ່ປຸ່ນ ໃນຄັ້ງນີ້ ແລະ ເຊື່ອໝັັ້ນວ່າ ໂຄງການຮ່ວມມືດ້ານການພັດທະນາຊັບພະຍາກອນມະນຸດ ໃນຄັ້ງນີ້ ຈະປະກອບສ່ວນອັນສຳຄັນເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ ກໍ່ຄື ປະກອບສ່ວນເຂົ້າໃນການສົ່ງເສີມ ການພົວພັນ-ຮ່ວມມື ສອງຝ່າຍ ລາວ-ຍີ່ປຸ່ນ ໃຫ້ນັບມື້ນັບແໜ້ນແຟ້ນຍິ່ງໆຂຶ້ນ.