ໃນຕອນເຊົ້າວັນທີ 02 ກັນຍາ 2021, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ, ໄດ້ຕ້ອນຮັບການເຂົ້າຢ້ຽມຂໍ່ານັບ ແລະ ຍື່ນສານແຕ່ງຕັ້ງຂອງ ທ່ານ Alexander Kremer, ເພື່ອມາເປັນຫົວໜ້າຫ້ອງການທະນາຄານໂລກ (WB) ຜູ້ໃໝ່ ປະຈຳ ສປປ ລາວ.

ໃນໂອກາດນີ້, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ, ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ຊົມເຊີຍ ທ່ານ Alexander Kremer ທີ່ຖືກແຕ່ງຕັ້ງມາເປັນ ຫົວໜ້າຫ້ອງການທະນາຄານໂລກ (WB) ຜູ້ໃໝ່ ປະຈໍາ ສປປ ລາວ ແລະ ພ້ອມກັນນັ້ນ ກໍ່ໄດ້ສະແດງຄວາມຂອບໃຈ ແລະ ຕີລາຄາສູງ ຕໍ່ທະນາຄານໂລກ ທີ່ໄດ້ປະກອບສ່ວນອັນສໍາຄັນ ເຂົ້າໃນການຊ່ວຍເຫຼືອພັດທະນາເສດຖະກິດ-ສັງຄົມ ຂອງ ສປປ ລາວ ໃນຫຼາຍຂະແໜງການຕະຫຼອດໄລຍະ 60 ປີ ຜ່ານມາ ແລະ ເຊື່ອໝັ້ນວ່າ ທະນາຄານໂລກ ຍັງຈະສືບຕໍ່ປະກອບສ່ວນຊ່ວຍເຫຼືອ ສປປ ລາວ ເພື່ອໃຫ້ສາມາດບັນລຸເປົ້າໝາຍທີ່ວາງໄວ້ ໃນແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ VIII ທ້າຍສະໄໝ ແລະ ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX, ຍຸດທະສາດການເປັນຄູ່ຮ່ວມມືໃໝ່ ລະຫວ່າງ ສປປ ລາວ ແລະ ທະນາຄານໂລກ, ລວມທັງການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ ຂອງອົງການສະຫະປະຊາຊາດ ຮອດປີ 2030.

ໃນໂອກາດດຽວກັນນີ້, ທ່ານ Alexander Kremer ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນຂອງ ທ່ານ ທອງຜ່ານ ສະຫວັນເພັດ, ໄດ້ໃຫ້ຄໍາໝັ້ນສັນຍາວ່າ ທະນາຄານໂລກ ຈະສືບຕໍ່ໃຫ້ການຮ່ວມມືກັບ ລັດຖະບານ ສປປ ລາວ ເພື່ອຈັດຕັ້ງປະຕິບັດແຜນການຮ່ວມມື ລະຫວ່າງ ທະນາຄານໂລກ ແລະ ລັດຖະບານ ສປປ ລາວ, ໂດຍສະເພາະໃນໂອກາດທີ່ ທ່ານ Alexander Kremer ປະຕິບັດໜ້າທີ່ ຢູ່ ສປປ ລາວ ຈະໃຫ້ການຮ່ວມມືຢ່າງໃກ້ຊິດ ແລະ ສືບຕໍ່ໃຫ້ການສະຫນັບສະຫນູນ ການພັດທະນາເສດຖະກິດ-ສັງຄົມ ຂອງ ສປປ ລາວ ໂດຍສະເພາະການຟື້ນຟູເສດຖະກິດໃນໄລຍະ ແລະ ຫລັງການແຜ່ລະບາດຂອງພະຍາດ COVID -19 ໃຫ້ໄດ້ຮັບໝາກຜົນເປັນຮູບປະທໍາຫຼາຍຂຶ້ນ.

ໃນຕອນທ້າຍ, ທ່ານ ທອງຜ່ານ ສະຫວັນເພັດ ໄດ້ກ່າວອວຍພອນ ທ່ານ Alexander Kremer ຈົ່ງປະສົບຜົນສຳເລັດໃນການປະຕິບັດໜ້າທີ່ວຽກງານໃໝ່ ແລະ ຫວັງຢ່າງຍິ່ງວ່າ ທະນາຄານໂລກ ຈະສືບຕໍ່ໃຫ້ການຮ່ວມມື ແລະ ສະໜັບສະໜູນ ສປປ ລາວ ໃນຕໍ່ໜ້າຕື່ມອີກ.

ນັບແຕ່ ສປປ ລາວ ​ໄດ້​ເຂົ້າ​ເປັນ​ສະມາຊິກ​ທະນາຄານໂລກ ​​ໃນ​ປີ 1960 ເປັນຕົ້ນມາ ​​ ທະນາຄານໂລກ ໄດ້ສະໜັບສະໜູນ ​ສປປ ລາວ ທາງ​ດ້ານ​ການ​ເງິນ ​ແລະ ການ​ຊ່ວຍ​ເຫລືອ​ດ້ານ​ວິຊາ​ການ ​ເພື່ອ​ຊຸກຍູ້​ການ​ພັດທະນາ​ເສດຖະກິດ-ສັງຄົມ ​ແກ່ ສປປ ລາວ ໃນຫຼາຍ​ດ້ານເຊັ່ນ: ດ້ານ​ກະສິກຳ, ດ້ານ​ພື້ນຖານ​​ໂຄງ​ລ່າງ​, ດ້ານ​ການ​ສຶກສາ ​ໂດຍ​ສະ​ເພາະ ການພັດທະນາດ້ານພະລັງງານ​ໄຟຟ້າ ​ແລະ ການ​ກໍ່ສ້າງ​ຖະໜົນ​ຫົນທາງ​ ເພື່ອ​ຊຸກຍູ້​ການ​ຂະຫຍາຍຕົວ​ທາງ​ດ້ານ​ເສດຖະກິດ ​ແລະ ຫຼຸດຜ່ອນ​ຄວາມທຸກ​ຍາກ ຢູ່​ໃນ ສປປ ລາວ.