ໃນຕອນເຊົ້າຂອງວັນທີ 30 ກັນຍາ 2021, ທີ່ ກະຊວງການຕ່າງປະເທດ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ທັງເປັນຫົວໜ້າເຈົ້າໜ້າທີ່ອາວຸໂສອາຊຽນຂອງ ສປປ ລາວ ໄດ້ນຳພາຄະນະຜູ້ແທນລາວ ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສອາຊຽນ (ASEAN Senior Officials’ Meeting - SOM) ໃນຮູບແບບທາງໄກ, ພາຍໃຕ້ການເປັນປະທານຂອງ ບຣູໄນ ດາຣູຊາລາມ.

ກອງປະຊຸມ ໄດ້ຮັບຊາບ ແລະ ຕີລາຄາສູງຕໍ່ຄວາມຄືບໜ້າໃນການຈັດຕັ້ງປະຕິບັດກິດຈະກຳບູລິມະສິດພາຍໃຕ້ການເປັນປະທານອາຊຽນຂອງ ບຣູໄນ ດາຣູຊາລາມ ສໍາລັບປີ 2021ເປັນຕົ້ນແມ່ນການຮ່າງຖະແຫຼງການບັນດາ ເສຣິ ເບກາວັນ ວ່າດ້ວຍການຈັດຕັ້ງປະຕິບັດຂໍ້ລິເລີ່ມແບບຍຸດທະສາດ ແລະ ກວມລວມ ເພື່ອເຊື່ອມສານບັນດາຂອບການຮ່ວມມືອາຊຽນ ເພື່ອຮັບມືກັບໄພພິບັດ ແລະ ພາວະສຸກເສີນ (Bandar Seri Begawan Declaration on the Strategic and Holistic Initiative to Link ASEAN Responses to Emergencies and Disasters (ASEAN SHIELD) - ASEAN SHIELD); ຖະແຫຼງການຜູ້ນໍາອາຊຽນ ວ່າດ້ວຍການຍຶດຖືຫຼັກ ການຮ່ວມມືຫຼາຍຝ່າຍ (ASEAN Leaders’ Declaration on Upholding Multilateralism); ແລະ ຖະ ແຫຼງການຜູ້ນໍາອາຊຽນ ວ່າດ້ວຍການຮ່ວມມືເສດຖະກິດສີຟ້າ (ASEAN Leaders’ Declaration on the Blue Economy), ຊຶ່ງກອງປະຊຸມ ໄດ້ເຫັນດີຕໍ່ບັນດາຖະແຫຼງການດັ່ງກ່າວ ແລະ ນໍາສະເໜີໃຫ້ກອງປະຊຸມສະພາປະສານງານອາຊຽນ ຄັ້ງທີ 30 (ACC) ຮັບຮອງເອົາໃນຂັ້ນຕອນຕໍ່ໄປ.

ພ້ອມດຽວກັນນີ້, ກອງປະຊຸມຍັງໄດ້ປຶກສາຫາລືການກະກຽມທັງທາງດ້ານເນື້ອໃນ ແລະ ພະລາທິການໃຫ້ແກ່ກອງປະຊຸມລັດຖະມົນຕີການຕ່າງປະເທດອາຊຽນ (ASEAN Foreign Ministers’ Meeting), ກອງປະຊຸມສະ ພາປະຊາຄົມການເມືອງ-ຄວາມໝັ້ນຄົງອາຊຽນ ຄັ້ງທີ 24(24^th ASEAN Political-Security Community (APSC) Council Meeting), ແລະກອງປະຊຸມສະພາ​ປະສານ​ງານ​ອາຊຽນຄັ້ງທີ 30 (30^th ASEAN Coordinating Council (ACC) Meeting), ຊຶ່ງຈະຈັດຂຶ້ນໃນວັນທີ 4 ຕຸລາ 2021 ໃນຮູບແບບທາງໄກ ແລະ ການກະກຽມໃຫ້ແກ່ກອງປະຊຸມສຸດຍອດອາຊຽນ ຄັ້ງທີ 38 ແລະ 39 ແລະ ກອງປະຊຸມສຸດຍອດທີ່ກ່ຽວຂ້ອງ (38^thand 39^th ASEAN Summits and Related Summits) ທີ່ຈະຈັດຂຶ້ນໃນລະຫວ່າງວັນທີ 26-28 ຕຸລາ 2021 ໃນຮູບແບບທາງໄກ. ນອກຈາກນັ້ນ, ກອງປະຊຸມ ຍັງໄດ້ປຶກສາຫາລືກ່ຽວກັບການຮ່ວມມືອາຊຽນ ກັບບັນດາຄູ່ເຈລະຈາອາຊຽນ. ໃນຕອນທ້າຍ, ກອງປະຊຸມໄດ້ຮັບຮອງເອົາຮ່າງອະນຸສັນຍາອາຊຽນ ກ່ຽວກັບການກຽມຄວາມພ້ອມ ແລະ ຮັບມືກັບເຫດສຸກເສີນທາງດ້ານນິວເຄລຍ ຫຼື ກໍາມັນຕະພາບລັງສີ (ASEAN Protocol for Preparedness and Response to a Nuclear or Radiological Emergency).

-----------------