ໃນຕອນເຊົ້າຂອງ ວັນທີ 7 ທັນວາ 2021 ທີ່ກະຊວງການຕ່າງປະເທດ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ, ຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ໄດ້ນໍາພາຄະນະເຂົ້າຮ່ວມ ກອງປະຊຸມເວທີປຶກສາຫາລື ອາຊີຕາເວັນອອກ ຄັ້ງທີ 19 ແບບທາງໄກ (19^th East Asia Forum) ພາຍໃຕ້ການເປັນປະທານຂອງ ສ.ເກົາຫຼີ, ໂດຍມີບັນດາເຈົ້າໜ້າທີ່ອາວຸໂສອາຊຽນບວກສາມ, ຮອງເລຂາທິການໃຫຍ່ອາຊຽນ, ຜູ້ຊ່ຽວຊານ ແລະ ວິຊາການທີ່ກ່ຽວຂ້ອງຈໍານວນໜຶ່ງເຂົ້າຮ່ວມ.

ກອງປະຊຸມ ໄດ້ຮ່ວມກັນປຶກສາຫາລື ພາຍໃຕ້ຫົວຂໍ້: ການຟື້ນຟູພາຍຫຼັງໂຄວິດ-19 ໃນອາຊີຕາເວັນອອກ ທີ່ກວມລວມ ແລະ ເຂັ້ມແຂງ ເຊິ່ງກວມເອົາສາມຂົງເຂດບູລິມະສິດຄື: 1. ວຽກງານສາທາລະນະສຸກ ແລະ ສຸຂະພາບ, ແຜນການຮ່ວມມືດ້ານຄວາມໝັ້ນຄົງທາງດ້ານສຸຂະພາບພາຍຫຼັງໂຄວິດ-19 ເປັນຕົ້ນແມ່ນການນໍາໃຊ້ກອງທຶນຕ່າງໆ ເພື່ອກຽມພ້ອມໃນການຮັບມືກັບການແຜ່ລະບາດຂອງພະຍາດອື່ນໆໃນອະນາຄົດ, ມາດຕະການຕ່າງໆທາງດ້ານສາທາ ລະນະສຸກໃນພາກພື້ນ, ການຄົ້ນຄວ້າ-ພັດທະນາ ແລະ ຜະລິດຢາວັກຊິນ; 2. ການຫັນເປັນດິຈິຕອນ: ແລກປ່ຽນຄວາມຄິດເຫັນໃນການສຸມໃສ່ການລົງທຶນດ້ານເສດຖະກິດດີຈີຕອນ, ການພັດທະນາຄວາມສາມາດໃນການນໍາໃຊ້ດີຈີຕອນ ແລະ ນໍາໃຊ້ດີຈີຕອນໃນວຽກງານສາທາລະນະສຸກ, ການສຶກສາ ແລະ ອື່ນໆ; ແລະ 3. ການພັດທະນາສີຂຽວ, ໂດຍສະເພາະແມ່ນການຮັບມືກັບການປ່ຽນແປງດິນຟ້າອາກາດ ແລະ ການນໍາໃຊ້ເຕັກໂນໂລຊີທີ່ເປັນມິດກັບສິ່ງແວດລ້ອມ.

ໃນກອງປະຊຸມຄັ້ງນີ້, ທ່ານ ຮອງລັດຖະມົນຕີ ທອງຜ່ານ ສະຫວັນເພັດ ໄດ້ມີຄໍາເຫັນເນັ້ນໜັກໃສ່ການຮ່ວມມືໃນຂົງເຂດດ້ານຄວາມໝັ້ນຄົງທາງດ້ານສຸຂະພາບພາຍຫຼັງໂຄວິດ-19 ເຊັ່ນ: ການສືບຕໍ່ພັດທະນາບັນດາບຸກຄະລາກອນການແພດ, ການແລກປ່ຽນຂໍ້ມູນຂ່າວສານ ແລະ ບົດຮຽນທີ່ດີ ເພື່ອກຽມພ້ອມຕໍ່ການຮັບມືກັບໂລກລະບາດ ແລະ ພະຍາດສາຍພັນໃໝ່. ພ້ອມນີ້, ໄດ້ສະເໜີໃຫ້ສືບຕໍ່ການຮ່ວມມືເພື່ອໃຫ້ປະຊາຊົນເຂົ້າເຖິງການບໍລິການດ້ານສຸຂະພາບ ແລະ ວັນຊິນ ລວມທັງສຶກສາຄວາມເປັນໄປໄດ້ໃນການຄົ້ນຄວ້າ ແລະ ຜະລິດຢາວັກຊິນໃນພາກພື້ນ.