ໃນຕອນເຊົ້າຂອງ ວັນທີ 20 ທັນວາ 2021, ສະຖາບັນການຕ່າງປະເທດ, ກະຊວງການຕ່າງປະເທດ ໄດ້ຈັດພິທີເປີດກອງປະຊຸມສຳມະນາ ພາຍໃຕ້ຫົວຂໍ້: “ການວາງແຜນ ແລະ ການຂຽນບົດໂຄງການ”, ໂດຍໃຫ້ກຽດເຂົ້າຮ່ວມເປັນປະທານຂອງ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ.

ຜູ້ເຂົ້າຮ່ວມສໍາມະນາໃນຄັ້ງນີ້ ມີຈຳນວນທັງໝົດ 20 ທ່ານທີ່ມາຈາກບັນດາກົມຕ່າງໆ ພາຍໃນກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກ. ການຈັດກອງປະຊຸມສຳມະນາດັ່ງກ່າວ ຈະໄດ້ດຳເນີນໄປແຕ່ວັນທີ 20-22 ທັນວາ 2021, ໂດຍມີຈຸດປະສົງ ເພື່ອຜັນຂະຫຍາຍແຜນພັດທະນາບຸກຄະລາກອນໃຫ້ແກ່ພະນັກງານກະຊວງການຕ່າງປະເທດ, ເພື່ອນຳໄປໝູນໃຊ້ເຂົ້າໃນໜ້າທີ່ວຽກງານ ໂດຍສະເພາະການພັດທະນາທັກສະ ແລະ ຂີດຄວາມສາມາດຂອງການຂີດຂຽນ, ຮັບປະກັນໃຫ້ຜູ້ເຂົ້າຮ່ວມມີຄວາມສາມາດໃນການວາງແຜນໂຄງການ, ການອ່ານ ແລະ ການຂຽນບົດສະເໜີ ສະໝັກທຶນ (ພາສາອັງກິດ) ໃຫ້ມີປະສິດທິພາບສູງສຸດ ແລະ ໃຫ້ເປັນລັກສະນະວິຊາການ (Academic Standard Writing). ນອກຈາກນັ້ນ, ຍັງເປັນການເພີ່ມຂີດຄວາມສາມາດຂອງພະນັກງານກະຊວງການຕ່າງປະເທດ ໃນການຂຽນບົດສະເໜີໂຄງການຕ່າງໆ ເພື່ອປະກອບ ສ່ວນເຂົ້າໃນການເຄື່ອນໄຫວວຽກງານການຕ່າງປະເທດ ແລະ ເພື່ອຍາດແຍ່ງການຊ່ວຍເຫຼືອຈາກສາກົນ.