ໃນວັນທີ 7 ມິຖຸນາ 2022, ທີ່ ກະຊວງການຕ່າງປະເທດ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ, ທັງເປັນຫົວໜ້າເຈົ້າໜ້າທີ່ອາວຸໂສອາຊຽນຂອງ ສປປ ລາວ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສອາຊຽນ (ASEAN Senior Officials’ Meeting) ແລະ ກອງປະຊຸມຄະນະກຳ ມະການວ່າດ້ວຍເຂດປອດອາວຸດນິວເຄລຍອາຊີຕາເວັນອອກສ່ຽງໃຕ້ (Meeting of the executive Committee of the Southeast Asia Nuclear-Weapon-Free Zone (SEANFWZ) Commission) ແບບທາງໄກ ພາຍໃຕ້ການເປັນປະທານຂອງກໍາປູເຈຍ ໃນນາມປະທານອາຊຽນ ປີ 2022.
ໃນກອງປະຊຸມເຈົ້າໜ້າທີ່ອາວຸໂສອາຊຽນ, ບັນດາປະເທດສະມາຊິກອາຊຽນ ໄດ້ຮັບຊາບຄວາມຄືບໜ້າໃນຂະບວນການສ້າງປະຊາຄົມອາຊຽນ ກໍຄືການຈັດຕັ້ງປະຕິບັດບັນດາບູລິມະສິດການເປັນປະທານອາຊຽນຂອງ ກໍາປູເຈຍ ໃນປີ 2022 ເປັນຕົ້ນແມ່ນການກະກຽມຮ່າງຖະແຫຼງການຜູ້ນໍາອາຊຽນ ວ່າດ້ວຍຄົບຮອບ 55 ປີ ແຫ່ງການສ້າງ ຕັ້ງອາຊຽນ ແລະ ຮ່າງຖະແຫຼງການອື່ນໆ ທີ່ຈະນໍາສະເໜີໃຫ້ຜູ້ນໍາພິຈາລະນາຮັບຮອງເອົາ ໃນໂອກາດກອງປະຊຸມສຸດຍອດອາຊຽນ ຄັ້ງທີ 40 ແລະ 41 ແລະ ກອງປະຊຸມສຸດຍອດທີ່ກ່ຽວຂ້ອງ, ຊຶ່ງຈະຈັດຂຶ້ນໃນວັນທີ 10-13 ພະຈິກ 2022 ທີ່ພະນົມເປັນ, ຣາຊະອານາຈັກ ກໍາປູເຈຍ. ນອກຈາກນີ້, ກອງປະຊຸມ ກໍໄດ້ຮັບຊາບຄວາມຄືບໜ້າໃນການກະກຽມຮ່າງວິໄສທັດປະຊາຄົມອາຊຽນ ຫຼັງປີ 2025, ໄດ້ປຶກສາຫາລື ແລະ ຮັບຊາບການລາຍງານຄວາມຄືບໜ້າໃນການຮ່ວມມືລະຫວ່າງ ອາຊຽນ ກັບແຕ່ລະຄູ່ເຈລະຈາ ແລະ ການພິຈາລະນາຂໍ້ສະເໜີຂອງປະເທດຕ່າງໆ ເພື່ອເຂົ້າເປັນພາຄີສົນທິສັນຍາໄມຕີຈິດ ແລະ ການຮ່ວມມືໃນອາຊີຕາເວັນອອກສ່ຽງໃຕ້. ກອງປະຊຸມ ຍັງໄດ້ປຶກສາຫາລືເພື່ອກະ ກຽມດ້ານຕ່າງໆ ໃຫ້ແກ່ກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 55 (AMM) ແລະ ກອງປະຊຸມລັດຖະ ມົນຕີທີ່ກ່ຽວຂ້ອງ, ທີ່ຈະຈັດຂຶ້ນໃນຕົ້ນເດືອນ ສິງຫາ 2022 ທີ່ ພະນົມເປັນ, ຣາຊະອານາຈັກ ກໍາປູເຈຍ.
ກອງປະຊຸມຄະນະກຳມະການວ່າດ້ວຍເຂດປອດອາວຸດນິວເຄລຍ ອາຊີຕາເວັນອອກສ່ຽງໃຕ້ (Meeting of the executive Committee of the Southeast Asia Nuclear-Weapon-Free Zone (SEANFWZ) Commission) ໄດ້ທົບທວນຄືນຄວາມຄືບໜ້າຂອງການຈັດຕັ້ງປະຕິບັດແຜນປະຕິບັດງານຂອງສົນທິສັນຍາ ວ່າດ້ວຍ ເຂດປອດອາວຸດນິວເຄລຍ ອາຊີຕາເວັນອອກສ່ຽງໃຕ້ ສະບັບປີ 2018-2022 ແລະ ການຂະຫຍາຍເວລາການຈັດຕັ້ງປະຕິບັດແຜນປະຕິບັດງານດັ່ງກ່າວ.