ວັນທີ 9 ​ມິຖຸນາ 2022, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີຕ່າງປະເທດ ທັງເປັນຫົວໜ້າເຈົ້າໜ້າທີ່ອາວຸໂສເວທີພາກພື້ນອາຊຽນຂອງ ສປປ ລາວ ໄດ້ນຳພາຄະນະຜູ້​ແທນ​ລາວ ເຂົ້າຮ່ວມກອງ​ປະ​ຊຸມ​ເຈົ້າໜ້າທີ່ອາວຸໂສເວທີພາກພື້ນອາຊຽນ (ASEAN Regional Forum Senior Officials’ Meeting ຫຼື ARF SOM) ຈັດຂຶ້ນໃນຮູບແບບທາງໄກ, ພາຍໃຕ້ການເປັນປະທານຂອງ ກໍາປູເຈຍ ໃນຖານະປະທານອາຊຽນ ປີ 2022 ແລະ ປະທານເວທີພາກພື້ນອາຊຽນ ໂດຍມີບັນດາເຈົ້າໜ້າທີ່ອາວຸໂສ ຈາກ ປະເທດເຂົ້າຮ່ວມເວທີພາກພື້ນອາຊຽນ, ຮອງເລຂາທິການໃຫຍ່ອາຊຽນ ພ້ອມດ້ວຍຄະນະເຂົ້າຮ່ວມ.

        ກອງປະຊຸມ ໄດ້ຮັບຊາບຜົນການ​ຈັດ​ຕັ້ງ​ປະ​ຕິ​ບັດ​ບັນດາກິດຈະກໍາ​ຮ່ວມມືເວທີພາກພື້ນອາຊຽນ ສຳລັບໄລຍະ​ສົກປີ 2021-2022 ແລະ ການຈັດຕັ້ງປະຕິບັດແຜນປະຕິບັດງານຮ່າໂນ້ຍ ສະບັບທີ 2 (2020-2025) ທີ່ຮັບຮອງໃນປີ 2020 ເຊິ່ງເຫັນວ່າ ມີຄວາມຄືບໜ້າໃນລະດັບດີ ເຖິງວ່າຈະໄດ້ຮັບຜົນກະທົບຈາກການລະບາດຂອງພະຍາດໂຄວິດ-19 ແລະ ໄດ້ປຶກສາຫາບັນດາກິດຈະກໍາ ສໍາລັບສົກປີ 2022-2023.

         ກອງ​ປະ​ຊຸມ ໄດ້ປຶກ​ສາ​ຫາ​ລືການກະກຽມດ້ານຕ່າງໆໃຫ້ແກ່ກອງປະຊຸມລັດຖະມົນຕີເວທີພາກພື້ນອາ ຊຽນ ຄັ້ງທີ 29, ຊຶ່ງຈະຈັດຂຶ້ນໃນຕົ້ນເດືອນ ສິງຫາ 2022 ທີ່ພະນົມເປັນ, ກໍາປູເຈຍ.

         ໃນໂອກາດນີ້, ບັນດາເຈົ້າ​ໜ້າ​ທີ່​ອາ​ວຸ​ໂສ​ເວ​ທີ​ພາກ​ພື້ນອາຊຽນ ຍັງໄດ້ແລກປ່ຽນຄວາມຄິດເຫັນກ່ຽວກັບບັນຫາພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ.

        ພາຍໃຕ້ຂອບການຮ່ວມມືເວທີພາກພື້ນອາຊຽນ, ສປປ ລາວ, ການາດາ ແລະ ສປ ຈີນ ໄດ້ສໍາເລັດການເປັນປະທານຮ່ວມກອງປະຊຸມກາງສະໄໝເວທີພາກພື້ນອາຊຽນ ກ່ຽວກັບການບັນທຸກໄພພິບັດ ສໍາລັບໄລຍະ 2019-2022. ໃນໂອກາດນີ້, ສປປ ລາວ ໄດ້ສະແດງຄວາມຂອບໃຈຕໍ່ການຮ່ວມມື ແລະ ສະໜັບສະໜູນຈາກບັນດາປະເທດເຂົ້າຮ່ວມຕະຫຼອດໄລຍະການເປັນປະທານຮ່ວມກອງປະຊຸມດັ່ງກ່າວ.

--------------------------------