ໃນວັນທີ 20 ມິຖຸນາ 2022, ທີ່ ກະຊວງການຕ່າງປະເທດ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ສົນທະນາຜ່ານທາງໂທລະສັບກັບ ທ່ານ ວາລີດ ອິວເຄີຣີຈີ (Waleed ELKHEREJI), ຮອງລັດຖະມົນຕີກະຊວງການຕ່າງປະເທດ ແຫ່ງ ຣາຊະອານາຈັກ ຊາອຸດິ ອາຣັບບີ, ເພື່ອເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສປປ ລາວ ແລະ ຊາອຸດິ ອາຣັບບີ.
ໃນການສົນທະນາທາງໄກຄັ້ງນີ້, ສອງຝ່າຍ ໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືອັນດີນຳກັນ ນັບຕັ້ງແຕ່ສອງປະເທດ ໄດ້ສ້າງຕັ້ງສາຍພົວພັນການທູດນຳກັນ ໃນວັນທີ 29 ພຶດສະພາ 1990 ເປັນຕົ້ນມາ ເຊິ່ງປີນີ້ແມ່ນ ຄົບຮອບ 32 ປີ. ສອງຝ່າຍ ໄດ້ຕີລາຄາສູງຕໍ່ຜົນການພົບປະສອງຝ່າຍ ລະຫວ່າງ ລັດຖະມົນຕີຕ່າງປະເທດ ລາວ ແລະ ຊາອຸດິ ອາຣັບບີ ໃນວັນທີ 18 ມີນາ 2022 ຜ່ານມາ, ເຊິ່ງໄດ້ປະກອບສ່ວນເຂົ້າໃນການສົ່ງເສີມສາຍພົວພັນມິດຕະພາບ ແລະ ການຮ່ວມມືອັນດີຂອງສອງປະເທດ ໃຫ້ນັບມື້ມີບາດກ້າວອັນໃຫມ່. ພ້ອມດຽວກັນນີ້, ສອງຝ່າຍ ກໍ່ໄດ້ແລກປ່ຽນຄຳຄິດເຫັນ ແລະ ປຶກສາຫາລື ກ່ຽວກັບ ແຜນການຮ່ວມມືໃນຕໍ່ໜ້າ ໃຫ້ມີປະສິດທິຜົນສູງຂຶ້ນ ເປັນຕົ້ນແມ່ນ ເຫັນດີສືບຕໍ່ຊຸກຍູ້ໃຫ້ມີການພົບປະແລກປ່ຽນ ຂອງຄະນະຜູ້ແທນຂັ້ນສູງຂອງສອງປະເທດ ແລະ ເຫັນດີການສ້າງຕັ້ງກົນໄກການຮ່ວມມືສອງຝ່າຍ ລະຫວ່າງ ສປປ ລາວ ແລະ ຊາອຸດິ ອາຣັບບີ ເພື່ອຊຸກຍູ້ການຮ່ວມມືສອງຝ່າຍໃຫ້ເປັນຮູບປະທໍາ ແລະ ນັບມື້ຂະຫຍາຍຕົວຍິ່ງໆຂຶ້ນ. ພ້ອມກັນນີ້, ທັງສອງຝ່າຍ ຍັງໄດ້ປຶກສາປຶກສາຫາລື ກ່ຽວກັບບັນຫາພາກພື້ນ ແລະ ສາກົນຈໍານວນນຶ່ງ
ໃນໂອກາດນີ້, ທ່ານຮອງລັດຖະມົນຕີ ວາລີດ ອິວເຄີຣີຈີ ໄດ້ສະເໜີຝ່າຍລາວ ໃນການສະໜັບສະໜູນ ການລົງສະໝັກເປັນເຈົ້າພາບ ງານວາງສະແດງໂລກ ຂອງ ຊາອຸດິ ອາຣັບບີ ພາຍໃຕ້ຫົວຂໍ້: “ຍຸກແຫ່ງການປ່ຽນແປງ: ການນໍາພາໂລກ ໄປສູ່ອະນາຄົດຂ້າງໜ້າ” ຫຼື the Era of Change: Leading the Planet towards a Foresighted Tomorrow, ຊຶ່ງຝ່າຍລາວ ໄດ້ສະແດງຄວາມຊົມເຊີຍ ຕໍ່ການຕັດສິນໃຈຂອງລັດຖະບານ ຊາອຸດິ ອາຣັບບີ ໃນການລົງສະມັກເປັນເຈົ້າພາບງານວາງສະແດງດັ່ງກ່າວ ແລະ ຝ່າຍລາວ ຈະນໍາໄປພິຈາລະນາ ຕໍ່ການສະມັກດັ່ງກ່າວ ຂອງ ຊາອຸດິ ອາຣັບບີ.
ການສົນທະນາຄັ້ງນີ້ ໄດ້ດຳເນີນໄປດ້ວຍບັນຍາກາດແຫ່ງໄມຕີຈິດມິດຕະພາບ ແລະ ສະໜິດສະໜົມກັນເປັນຢ່າງດີ ເຊິ່ງໄດ້ສ່ອງແສງໃຫ້ເຫັນເຖິງ ສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສອງລັດຖະບານ ກໍ່ຄື ປະຊາຊົນສອງປະເທດ ລາວ ແລະ ຊາອຸດິ ອາຣັບບີ ທີ່ນັບມື້ໄດ້ຮັບການເສີມຂະຫຍາຍກ້າວຂຶ້ນຢ່າງຫມັ້ນທ່ຽງ.