ໃນວັນທີ 05 ຕຸລາ 2022 ທີ່ ພະນົມເປັນ, ຣາຊະອານາຈັກ ກໍາປູເຈຍ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງ​ການ​ຕ່າງ​ປະ​ເທດ, ທັງເປັນຫົວໜ້າເຈົ້າໜ້າທີ່ອາວຸໂສອາຊຽນຂອງ ສປປ ລາວ ​ໄດ້​ນຳພາຄະນະຜູ້ແທນລາວ ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສອາຊຽນ (ASEAN Senior Officials’ Meeting-SOM) ແລະ ກອງປະຊຸມປຶກສາຫາລືຮ່ວມເຈົ້າໜ້າທີ່ອາວຸໂສສາມເສົາຄໍ້າປະຊາຄົມອາຊຽນ (Joint Consultative Meeting-JCM) ພາຍໃຕ້ການເປັນປະທານຂອງກໍາປູເຈຍ ໃນຖານະປະທານອາຊຽນສົກປີ 2022.

ກອງປະຊຸມເຈົ້າໜ້າທີ່ອາວຸໂສອາຊຽນ ໄດ້ຮັບ​ຊາບ​ຄວາມ​ຄືບ​ໜ້າ​ການ​ຈັດ​ຕັ້ງ​ປະ​ຕິ​ບັດ​ບັນດາບູລິມະສິດ ສໍາລັບການເປັນປະທານອາຊຽນຂອງ ກໍາປູເຈຍ ໃນປີ 2022. ພ້ອມກັນນັ້ນ, ກອງປະຊຸມຍັງໄດ້ປຶກສາຫາລືກ່ຽວກັບການພົວ ພັນກັບພາຍນອກຂອງອາຊຽນ ແລະ ໄດ້ຮັບຊາບຄວາມຄືບໜ້າໃນການຮ່ວມມືລະຫວ່າງ ອາຊຽນ ກັບ 11 ປະເທດ ຄູ່ເຈ ລະຈາ ແລະ ຂອບການຮ່ວມມືອື່ນໆທີ່ອາຊຽນເປັນຜູ້ນໍາພາ ລວມທັງການພິຈາລະນາຂໍ້ສະເໜີຂອງປະເທດຕ່າງໆ ເພື່ອເຂົ້າເປັນພາຄີສົນທິສັນຍາໄມຕີຈິດ ແລະ ການຮ່ວມມືໃນອາຊີຕາເວັນອອກສ່ຽງໃຕ້ ແລະ ການສະເໜີເປັນຄູ່ຮ່ວມມືກັບອາຊຽນ. ກອງປະຊຸມ ຍັງໄດ້ປຶກສາຫາລື ແລະ ຮັບຊາບການກະກຽມໃຫ້ແກ່ກອງປະຊຸມສະພາປະຊາຄົມການເມືອງຄວາມໝັ້ນຄົງອາຊຽນ ຄັ້ງທີ 25 ​ແລະ ກອງປະຊຸມສຸດຍອດອາຊຽນ ຄັ້ງທີ 40 ແລະ 41 ແລະ ກອງປະຊຸມສຸດຍອດອາຊຽນທີ່ກ່ຽວຂ້ອງ, ຊຶ່ງຈະຈັດຂຶ້ນໃນລະຫວ່າງວັນທີ 10-13 ພະຈິກ 2022 ທີ່ ພະນົມເປັນ.

ກອງປະຊຸມປຶກສາຫາລືຮ່ວມເຈົ້າໜ້າທີ່ອາວຸໂສສາມເສົາຄໍ້າປະຊາຄົມອາຊຽນ ໄດ້ຮັບ​ຊາບ​ຄວາມ​ຄືບ​ໜ້າ​ການ​ຈັດ​ຕັ້ງ​ປະ​ຕິ​ບັດ​ບັນດາບູລິມະສິດສໍາລັບການເປັນປະທານອາຊຽນຂອງ ກໍາປູເຈຍ ໃນປີ 2022 ລວມທັງຄວາມຄືບໜ້າຂອງການກະກຽມຮ່າງວິໄສທັດປະຊາຄົມອາຊຽນ ຫຼັງປີ 2025; ໄດ້ຮັບຊາບຄວາມຄືບໜ້າໃນການຈັດຕັ້ງປະຕິບັດບັນດາຂໍ້ລິເລີ່ມອາຊຽນເພື່ອຮັບມືກັບພະຍາດໂຄວິດ-19; ໄດ້ຮັບຊາບຄວາມຄືບໜ້າໃນການຈັດຕັ້ງປະຕິບັດແຜນແມ່ບົດເພື່ອການເຊື່ອມຈອດອາຊຽນ 2025; ໄດ້ຮັບຊາບຄວາມຄືບໜ້າໃນການຈັດຕັ້ງປະຕິບັດແຜນວຽກຂໍ້ລິເລີ່ມເພື່ອການເຊື່ອມໂຍງອາຊຽນ ສະບັບ 4 (2021-2025) ແລະ ບັນຫາອື່ນໆ. ພ້ອມກັນນັ້ນ, ກອງປະຊຸມ ຍັງໄດ້ປຶກສາຫາລືການກະກຽມດ້ານເນື້ອໃນ, ພະລາທິການ ແລະ ພິທີການ ໃຫ້ແກ່ກອງປະຊຸມສະພາປະສານງານອາຊຽນ ຄັ້ງທີ 31 ແລະ ການກະກຽມໃຫ້ແກ່ກອງປະຊຸມສຸດຍອດອາຊຽນ ຄັ້ງທີ 40 ແລະ 41 ແລະ ກອງປະຊຸມສຸດຍອດອາຊຽນທີ່ກ່ຽວຂ້ອງ ເປັນຕົ້ນແມ່ນແຜນການເຄື່ອນໄຫວຂອງຜູ້ນໍາ, ຫົວຂໍ້ປຶກສາຫາລື, ບັນດາເອກະສານຜົນຂອງກອງປະຊຸມ ແລະ ອື່ນໆ.