ໃນວັນທີ 17 ຕຸລາ 2022 ທີ່ ກະຊວງການຕ່າງປະເທດ, ທ່ານ ໂພໄຊ ໄຂຄຳພິທູນ, ຮອງລັດຖະມົນຕີກະຊວງການຕ່າງປະເທດ ໄດ້ຕາງໜ້າໃຫ້ລັດຖະບານ ແຫ່ງ ສປປ ລາວ ປະດັບຫຼຽນກາມິດຕະພາບ ໃຫ້ແກ່ທ່ານ ພິພັດພົນ ສາຣະໂນທະຍານ, ນັກທຸລະກິດໄທ ທີ່ຜູ້ກ່ຽວໄດ້ມີຜົນງານດີເດັ່ນ ໃນການສົ່ງເສີມສາຍພົວພັນມິດຕະພາບ ລະຫວ່າງ ສປປ ລາວ ແລະ ຣາຊະອານາຈັກໄທ ລວມທັງການປະກອບສ່ວນຊ່ວຍເຫຼືອທາງດ້ານວັດຖຸ, ປັດໄຈ ແລະ ຂົນຂວາຍທຶນຊ່ວຍເຫຼືອຕ່າງໆ ເພື່ອປະກອບສ່ວນໃນ ມາດຕະການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ - 19 ທີ່ຜ່ານມາ ເປັນຕົ້ນແມ່ນໂຄງການຊ່ວຍເຫຼືອປິ່ນປົວຮັກສາພົນລະເມືອງລາວ ທີ່ດຳລົງຊີວິດ ຢູ່ປະເທດໄທ, ໂຄງການລະດົມເຄື່ອງອຸປະໂພກ ແລະ ບໍລິໂພກ ໃຫ້ແກ່ພົນລະເມືອງລາວ ທີ່ ພົບກັບຄວາມຫຍຸ້ງຍາກໃນການດຳລົງຊີວິດຢູ່ ໄທ ໃນໄລຍະການລະບາດຂອງພະຍາດໂຄວິດ-19 ແລະ ໂຄງການຂົນຂວາຍໃນການຈັດສັນວັກແຊັງ ເພື່ອນໍາມາສັກໃຫ້ຄົນລາວທີ່ອາໃສຢູ່ໄທ ໃນຊ່ວງທີ່ວັກແຊັງ ຍັງມີປະລິມານຈຳກັດ ແລະ ໂຄງການການຈິດອາສາຮັກສາຜູ້ປ່ວຍພະຍາດ ໂຄວິດ - 19 ແບບປິ່ນປົວ ແລະ ຮັກສາໂຕຢູ່ເຮືອນ. ຈາກຜົນງານດັ່ງກ່າວຂອງຜູ້ກ່ຽວ ລັດຖະບານ ແຫ່ງ ສປປ ລາວ, ຈຶ່ງຕົກລົງເຫັນດີມອບຫຼຽນກາມິດຕະພາບ ເພື່ອຈາລຶກຄຸນງາມຄວາມດີຂອງຜູ້ກ່ຽວ.
ທ່ານ ພິພັດພົນ ສາຣະໂນທະຍານ ໄດ້ສະແດງຄວາມຍິນດີ ແລະ ພາກພູມໃຈເປັນຢ່າງຍິ່ງ ທີ່ໄດ້ຮັບການຍ້ອງຍໍຈາກລັດຖະບານ ແຫ່ງ ສປປ ລາວ, ຊຶ່ງຖືວ່າເປັນກຽດຢ່າງຍິ່ງຕໍ່ຕົນເອງ ແລະ ວົງຕະກຸນ. ທ່ານໄດ້ກ່າວອີກວ່າ ການປະກອບສ່ວນຄັ້ງນີ້ ກໍ່ເພື່ອເປັນການສະແດງຄວາມຮູ້ບຸນຄຸນຕໍ່ ລັດຖະບານ ແລະ ປະຊາຊົນລາວ ທີ່ໄດ້ໃຫ້ໂອກາດແກ່ຜູ້ກ່ຽວ ແລະ ຄອບຄົວ ໄດ້ດໍາເນີນທຸລະກິດ ແລະ ດໍາລົງຊີວິດ ຢູ່ ລາວ ເປັນເວລາຫຼາຍກວ່າ 20 ປີ ແລະ ບັນດາຜົນງານດັ່ງກ່າວ ຈະບໍ່ສາມາດລຸລ່ວງໄປໄດ້ດ້ວຍດີ ຖ້າປາດສະຈາກການໃຫ້ການຊ່ວຍເຫຼືອຂອງໝູ່ຄູ່ທັງ ໄທ ແລະ ລາວ, ການນໍາຂອງກະຊວງການຕ່າງປະເທດ ແລະ ສະຖານທູດລາວ ທີ່ ບາງກອກ ພ້ອມທັງຢືນຢັນ ທີ່ຈະສືບຕໍ່ປະກອບສ່ວນໃນການສົ່ງເສີມສາຍພົວພັນມິດຕະພາບຂອງສອງຊາດ ລາວ-ໄທ ແລະ ການສ້າງສາພັດທະນາປະເທດຊາດຂອງ ສປປ ລາວ. ພ້ອມກັນນີ້, ທ່ານ ໂພໄຊ ໄຂຄໍາພິທູນ ຍັງໄດ້ຊຸກຍູ້ໃຫ້ຜູ້ກ່ຽວສືບຕໍ່ໃຫ້ການຊ່ວຍເຫຼືອແກ່ ສປປ ລາວ ໃນອະນາຄົດຕາມຄວາມສາມາດ ແລະ ຂົນຂວາຍນັກທຸລະກິດໄທ ເຂົ້າມາລົງທຶນ ຢູ່ ສປປ ລາວ ໃຫ້ນັບມື້ນັບຫຼາຍຂຶ້ນ.