ໃນຕອນເຊົ້າວັນທີ 24 ພະຈິກ 2022, ທີ່ກະຊວງການຕ່າງປະເທດ, ທ່ານ ບຸນເຫຼືອ ພັນດານຸວົງ, ຮອງລັດຖະມົນຕີ ກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ສະຈວດ ຊິມສັນ (Stuart Simpson), ຮອງຜູ້ອຳນວຍການພາກພື້ນອາຊີ-ປາຊີຟິກ ຂອງອົງການຈັດຕັ້ງສາກົນເພື່ອການເຄື່ອນຍ້າຍຖິ່ນຖານ (IOM) ພາຍຫຼັງທີ່ໄດ້ຖືກແຕ່ງຕັ້ງໃນເດືອນສິງຫາ 2022 ຜ່ານມາ.

       ທ່ານ ບຸນເຫຼືອ ພັນດານຸວົງ, ໄດ້ສະແດງຄວາມຊົມເຊີຍ ຕໍ່ການເຂົ້າຮັບຕຳແໜ່ງ ແລະ ສະແດງຄວາມຍິນດີຕ້ອນຮັບທ່ານ ສະຈວດ ຊິມສັນ ຢ່າງອົບອຸ່ນ ໃນໂອກາດມາເຂົ້າຢ້ຽມຂໍ່ານັບເພື່ອແນະນຳຕົນເອງ ແລະ ເດີນທາງມາເຮັດວຽກຢູ່ ສປປ ລາວ ເປັນປະເທດທຳອິດ ໃນຈຳນວນ 40 ປະເທດ ທີ່ຫ້ອງການປະຈຳພາກພື້ນອາຊີ-ປາຊີຟິກ ຮັບຜິດຊອບ. ພ້ອມນີ້, ທ່ານ ຮອງລັດຖະມົນຕີ ໄດ້ຕີລາຄາສູງຕໍ່ການຮ່ວມມື ແລະ ການຊ່ວຍເຫຼືອ ຂອງອົງການ IOM ຕໍ່ ສປປ ລາວ ໃນໄລຍະຜ່ານມາ ເປັນຕົ້ນການຊ່ວຍອຳນວຍຄວາມສະດວກໃຫ້ແຮງງານລາວທີ່ຕົກຄ້າງຢູ່ຕ່າງປະເທດໄດ້ເດີນທາງກັບ ສປປ ລາວ ໃນໄລຍະການລະບາດຂອງ ພະຍາດໂຄວິດ-19, ໂຄງການຮ່ວມມືເພື່ອຕ້ານການຄ້າມະນຸດ ແລະ ການຊ່ວຍເຫລືອດ້ານການສຶກສາໃຫ້ແກ່ແຮງງານເຄື່ອນຍ້າຍ ແລະ ປະຊາຊົນທົ່ວໄປ. ໃນອະນາຄົດ, ສປປ ລາວ ແລະ ອົງການ IOM ຈະສືບຕໍ່ຮ່ວມມືກັນ ພາຍໃຕ້ສັນຍາຮ່ວມມື ລະຫວ່າງ ສປປ ລາວ ແລະ ອົງການ IOM ເຊິ່ງຖືກລົງນາມໃນເດືອນກັນຍາ ປີ 2021, ແລະ ພາຍໃຕ້ ແຜນຍຸດທະສາດ ອົງການ IOM ສຳລັບ ສປປ ລາວ ສົກປີ 2022-2026.

       ອົງການຈັດຕັ້ງສາກົນເພື່ອການເຄື່ອນຍ້າຍຖິ່ນຖານ ເປັນໜຶ່ງໃນເຄືອຂ່າຍອົງການ ສະຫະປະຊາຊາດ, ໄດ້ຖືກສ້າງຕັ້ງຂຶ້ນໃນປີ 1951, ປະຈຸບັນມີສະມາຊິກທັງໝົດ 174 ປະເທດ. ອົງການ IOM ໄດ້ເລີ່ມເຂົ້າມາເຄື່ອນໄຫວ ຢູ່ ສປປ ລາວ ໃນປີ 2001 ແລະ ປີ 2007 ໄດ້ສ້າງຕັ້ງຫ້ອງການໂຄງການອົງການ IOM, ສປປ ລາວ ເຂົ້າເປັນສະມາຊິກອົງການ IOM ໃນເດືອນ ມິຖຸນາ 2018.