ໃນຕອນເຊົ້າຂອງວັນທີ 29 ພະຈິກ 2022 ທີ່ ກະຊວງການຕ່າງປະເທດ, ທ່ານ ໂພໄຊ ໄຂຄຳພິທູນ, ຮອງລັດຖະມົນຕີ ກະຊວງການຕ່າງປະເທດ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂ່ຳນັບຂອງ ທ່ານ ນາງ ຊິນດີ ເມັກເຄນ (Cindy McCain), ເອກອັກຄະລັດຖະທູດ ສ. ອາເມລິກາ ປະຈຳ ຫ້ອງການ ສປຊ ທີ່ ອີຕາລີ, ພ້ອມດ້ວຍຄະນະ ໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ໃນລະຫວ່າງວັນທີ 28-29 ພະຈິກ 2022.
ທ່ານຮອງລັດຖະມົນຕີ ໄດ້ຕີລາຄາສູງ ຕໍ່ການມາຢ້ຽມຢາມ ຂອງ ທ່ານເອກອັກຄະລັດຖະທູດ ເຊິ່ງເປັນການມາຢ້ຽມຢາມ ສປປ ລາວຄັ້ງທໍາອິດ ເພື່ອມາຕິດຕາມ ແລະ ຊຸກຍູ້ ການຮ່ວມມືລະຫວ່າງ ສ. ອາເມລິກາ ແລະ ສປປ ລາວ. ພ້ອມກັນນັ້ນ, ທ່ານຍັງໄດ້ສະແດງຄວາມຂອບໃຈຕໍ່ ລັດຖະບານ ສ. ອາເມລິກາ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອ ສປປ ລາວ ຕະຫຼອດໄລຍະທີ່ຜ່ານມາ ອັນເປັນການປະກອບສ່ວນທີ່ສໍາຄັນ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ຂອງ ສປປ ລາວ, ໂດຍສະເພາະການແກ້ໄຂຄວາມທຸກຍາກ, ວຽກງານເກັບກູ້ລະເບີດບໍ່ທັນແຕກທີ່ຕົກຄ້າງ, ວຽກງານດ້ານສາທາລະນະສຸກ ກໍ່ຄືວຽກງານຄ້ຳປະກັນສະບຽງອາຫານ ແລະ ໂພຊະນາການ ແລະ ອື່ນໆ.
ການພົບປະໃນຄັ້ງນີ້ໄດ້ດໍາເນີນໄປດ້ວຍບັນຍາກາດອັນອົບອຸ່ນ, ເຊິ່ງໄດ້ປະກອບສ່ວນເຂົ້າໃນການເສີມຂະຫຍາຍການພົວພັນຮ່ວມມືສອງຝ່າຍ ລະຫວ່າງ ສປປ ລາວ ແລະ ສ. ອາເມລິການ ເວົ້າລວມ, ເວົ້າສະເພາະ ວຽກງານການຮ່ວມມືດ້ານການຄ້ຳປະກັນສະບຽງອາຫານ, ໂພຊະນາການ, ສາທາລະນະສຸກ, ວຽກງານສຳຫຼວດ ແລະ ເກັບກູລະເບີດທີ່ບໍ່ທັນແຕກ, ການຊ່ວຍເຫຼືອດ້ານມະນຸດສະທໍາ, ໂດຍຜ່ານການຈັດຕັ້ງປະຕິບັດແຜນງານ, ໂຄງການ ແລະ ກິດຈະກຳຕ່າງໆ ທີ່ໄດ້ຮັບການສະໜັບສະໜູນຈາກ ສ. ອາເມລິກາ ຕະຫຼອດໄລຍະຜ່ານມາ.
ໃນໂອກາດມາຢ້ຽມຢາມ ສປປ ລາວ ໃນຄັ້ງນີ້, ທ່ານ ນາງ ຊິນດີ ເມັກເຄນ ໄດ້ເດີນທາງໄປຢ້ຽມຢາມ ໂຄງການຄ້ຳປະກັນສະບຽງອາຫານ ຂອງ ອົງການ WFP ຢູ່ ທີ່ແຂວງຈຳປາສັກ ແລະ ໄດ້ເຂົ້າຢ້ຽມຂໍ່ານັບການນຳຂັ້ນສູງຂອງ ແຂວງຈຳປາສັກ ແລະ ມີແຜນຈະເດີນທາງໄປຢ້ຽມຢາມໂຄງການຮ່ວມມື ຂອງຂະແໜງກະສິກຳ ຮ່ວມກັບອົງການ FAO, ແລະ ໂຄງການສຳຫຼວດ ແລະ ເກັບກູ້ລະເບີດ ຂອງ ອົງການ MAG ຢູ່ ນະຄອນຫຼວງວຽງຈັນກ່ອນຈະເດີນທາງກັບຄືນປະເທດ.