ໃນຕອນບ່າຍຂອງວັນ​ທີ 10 ພຶດສະພາ 2023, ທີ່ ກະຊວງການຕ່າງປະເທດ, ​ທ່ານ ໂພໄຊ ໄຂຄໍາພິທູນ, ຮອງລັດຖະມົນຕີ ກະຊວງການຕ່າງປະເທດ ແຫ່ງ ສ​ປ​ປ ລາວ ໄດ້​ຕ້ອນ​ຮັບການເຂົ້າຢ້ຽມຂໍ່ານັບຂອງ ທ່ານ ນາງ ອຸຣີຣັດ ຈະເລີນໂຕ, ຫົວໜ້າກົມຄວາມຮ່ວມມືລະຫວ່າງປະເທດ, ກະຊວງການຕ່າງປະເທດ ແຫ່ງ ຣາຊະອານາຈັກໄທ  ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມເຮັດວຽກທີ່ ສປປ ລາວ ແລະ ມອບ-ຮັບເຄື່ອງອຸປະກອນຮັບໃຊ້ ໃນການ ຈັດຕັ້ງປະຕິບັດໂຄງການຮ່ວມມື ຂອງສູນພັດທະນາ ແລະ ບໍລິການດ້ານການກະເສດ ຫ້ວຍຊອນ-ຫ້ວຍຊົ້ວ, ກະຊວງກະສິກໍາ ແລະ ປ່າໄມ ແລະ ເຄື່ອງອຸປະກອນຮັບໃຊ້ຫ້ອງການ ໃຫ້ແກ່ ກົມອາຊີ-ປາຊີຟິກ ແລະ ອາຟຣິກາ, ກະຊວງການຕ່າງປະເທດ ກໍ່ຄືເປັນການຈັດຕັ້ງປະຕິບັດໝາກຜົນຂອງກອງປະຊຸມຮ່ວມມືດ້ານວິຊາການ ຄັ້ງທີ 24 ທີ່ ແຂວງຫຼວງພະບາງ, ໃນເດືອນສິງຫາ 2022 ຜ່ານມາ.

ທ່ານ ໂພໄຊ ໄຂຄໍາພິທູນ ໄດ້ສະແດງຄວາມຂອບໃຈ ແລະ ຕີລາຄາສູງຕໍ່ການຊ່ວຍເຫຼືອຂອງ ຣາຊະອານາຈັກໄທ ທີ່ພະບໍລົມວົງສານຸວົງ ມີໂຄງການພະລາດສະດໍາລິຕ່າງໆ ລວມທັງລັດຖະບານ ແລະ ປະຊາຊົນ ແຫ່ງ ຣາຊະອານາ ຈັກໄທ ໄດ້ໃຫ້ການສະໜັບສະໜູນ ແລະ ຊ່ວຍເຫຼືອ ສປປ ລາວ ທາງດ້ານການພັດທະນາ ໂດຍຜ່ານກົນໄກການຮ່ວມມືດ້ານຕ່າງໆ, ໂດຍສະເພາະແມ່ນຜ່ານໂຄງການຮ່ວມມືທາງດ້ານວິຊາການ, ນັບຕັ້ງແຕ່ໄດ້ມີການສ້າງກົນໄກການຮ່ວມມືດັ່ງກ່າວແຕ່ ໃນປີ 1992 ເປັນຕົ້ນມາ. ສິ່ງດັ່ງກ່າວ ໄດ້ສະແດງເຖິງຄວາມເອົາໃຈໃສ່ ຂອງຝ່າຍໄທ ໂດຍສະເພາະ ກະຊວງການຕ່າງປະເທດ ກໍ່ຄືກົມຄວາມມືລະຫວ່າງປະເທດ ແລະ ສະຖານເອກອັກຄະຣາຊະທູດ ແຫ່ງ ຣາຊະອານາຈັກໄທ ປະຈໍາ ສປປ ລາວ ໃນການຈັດຕັ້ງ ແລະ ຜັນຂະຫຍາຍຂໍ້ຕົກລົງທີ່ໄດ້ເຊັນຮ່ວມກັນ ຜ່ານກົນໄກການຮ່ວມມືຂອງທັງສອງປະເທດ. ອຸປະກອນທີ່ມອບ-ຮັບ ທີ່ ກະຊວງການຕ່າງປະເທດໃນຄັ້ງນີ້ ປະກອບມີຕູ້ເກັບມ້ຽນເອກະສານແບບຕິດຝາ (Build in), ຄອມພິວເຕີຕັ້ງໂຕະ, ຄອມພິວເຕີໂນດບຸກ ແລະ ເຄື່ອງພິມເອກະສານຈໍານວນໜຶ່ງ. ອຸປະກອນດັ່ງກ່າວ, ຈະເປັນສິ່ງອໍານວຍຄວາມສະດວກໃນການປະຕິບັດໜ້າທີ່ຂອງ ກົມອາຊີ-ປາຊີຟິກ ແລະ ອາຟຣິກາ, ກະຊວງການຕ່າງ ປະເທດລາວ ໃນຖານະເປັນກອງເລຂາຄະນະກໍາມະການຮ່ວມມື ລາວ-ໄທ ໃນການເພີ່ມທະວີສາຍພົວພັນມິດຕະພາບຂອງສອງປະເທດ ໃຫ້ນັບມື້ ແໜ້ນແຟ້ນຍິ່ງຂຶ້ນ ໃຫ້ສົມຄູ່ກັບການຍົກລະດັບສາຍພົວພັນຂອງສອງປະເທດ ເປັນຄູ່ຮ່ວມຍຸດທະສາດເພື່ອການຈະເລີນເຕີບໂຕ ແລະ ການພັດທະນາແບບຍືນຍົງ.

ໃນຂະນະດຽວກັນ, ທ່ານ ນາງ ອຸຣີຣັດ ຈະເລີນໂຕ, ຫົວໜ້າກົມຄວາມຮ່ວມມືລະຫວ່າງປະເທດ, ກະຊວງການຕ່າງປະເທດ ແຫ່ງ ຣາຊະອານາຈັກໄທ ໄດ້ລາຍງານຄວາມຄືບໜ້າໃນການຈັດຕັ້ງປະຕິບັດໂຄງການຮ່ວມມືທາງດ້ານວິຊາການຕ່າງໆ ລະຫວ່າງ ລາວ-ໄທ ແລະ ແຜນການຈັດຕັ້ງປະຕິບັດໃນຕໍ່ໜ້າ ແລະ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນໃນຄັ້ງນີ້, ພ້ອມທັງສະແດງຄວາມຍິນດີຈະສືບຕໍ່ປະກອບສ່ວນຊຸກຍູ້ສົ່ງເສີມສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສອງປະເທດ ໃຫ້ນັບມື້ໄດ້ຮັບການເສີມຂະຫຍາຍ ແລະ ແຕກດອກອອກຜົນຍິ່ງຂຶ້ນ ໃນຊຸມປີຕໍ່ໜ້າ.