ຫວ່າງບໍ່ດົນມານິ້, ທີ່ ກະຊວງການຕ່າງປະເທດ, ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ນາງ Cait Moran, ເອກອັກຄະລັດຖະທູດ ແຫ່ງ ສາລະນະລັດ ອຽກລັງ ປະຈຳ ສປປ ລາວ ຄົນໃໝ່, ຊຶ່ງມີສຳນັກງານຕັ້ງຢູ່ ຮ່າໂນ້ຍ, ສສ ຫວຽດນາມ.
ໃນໂອກາດນີ້, ຮອງລັດຖະມົນຕີກະຊວງການຕ່າງປະເທດ ໄດ້ສະແດງຄວາມຍິນດີຕ້ອນຮັບທ່ານທູດ ແລະ ຊົມເຊີຍທີ່ຖືກແຕ່ງຕັ້ງໃຫ້ມາດຳລົງຕຳແໜ່ງເປັນເອກອັກຄະລັດຖະທູດ ແຫ່ງ ສາລະນະລັດ ອຽກລັງ ປະຈຳ ສປປ ລາວ. ໃນຂະນະດຽວກັນ ກໍໄດ້ຕີລາຄາການຮ່ວມມື ລະຫວ່າງ ສອງປະເທດ ໃນໄລຍະຜ່ານມາ ພາຍຫຼັງທີ່ ສປປ ລາວ ແລະ ສາທາລະນະລັດ ອຽກລັງ ໄດ້ສ້າງຕັ້ງສາຍພົວພັນການທູດນຳກັນ ໃນວັນທີ 07 ສິງຫາ 1998. ພ້ອມກັນນັ້ນ, ທ່ານຮອງລັດຖະມົນຕີຍັງໄດ້ສະແດງຄວາມເຊື່ອໝັ້ນວ່າ ໃນໄລຍະທີ່ການປະຕິບັດງານການທູດຂອງທ່ານທູດຄົນໃໝ່ ຈະສາມາດເພີ່ມທະວີການພົວພັນຮ່ວມມື ລະຫວ່າງ ສອງປະເທດ ລາວ-ອຽກລັງ ໃຫ້ນັບມື້ນັບຂະຫຍາຍຕົວ ແລະ ແໜ້ນແຟ້ນຍິ່ງຂຶ້ນ.
ທ້າຍສຸດ, ທ່ານຮອງລັດຖະມົນຕີກະຊວງການຕ່າງປະເທດ ໄດ້ອວຍພອນແກ່ທ່ານເອກອັກຄະລັດຖະທູດ ຈົ່ງມີສຸຂະພາບແຂງແຮງ ແລະ ປະສົບຜົນສຳເລັດໃນການປະຕິບັດໜ້າທີ່ການທູດຂອງຕົນຢູ່ ສປປ ລາວ.