ໃນ​ວັນ​ທີ 18 ພຶດສະພາ 2016, ກະຊວງ​ການ​ຕ່າງປະ​ເທດ ໄດ້ຈັດ​ປາຖະກະ​ຖາ ຫວນຄືນວັນ​ປະ​ຫວັດ​ສາດສຳຄັນ​ຂອງ​ຊາດ ​ແລະ ສາກົນ ຂຶ້ນ​, ​ເຊິ່ງ​ເອກະສານ​ທີ່​ນຳ​ມາ​ເຜີຍ​ແຜ່ ​ປະກອບ​ມີ 6 ​ເອກະສານ​ ຄື: ວັນ​ຜ່າ​ວົງ​ປິດ​ລ້ອມ ​ຂອງ​ກອງພັນ​ທີ 2 ວິລະ​ຊົນ ທີ່​ທົ່ງ​​ໄຫ​ຫີນ ຊຽງຂວາງ ຄົບຮອບ 57 ປີ (18/5/1960-18/5/2016), ວັນ​ວິລະ​ກຳ​ໂຕນ​ຄຸກ​ ຢ່າງ​ມະຫັດສະຈັນ ​ຂອງ​ບັນດາ​ຜູ້ນຳ​ພັກ ​ແລະ ​ແນວ​ລາວ​ສ້າງ​ຊາດ​ ຄົບຮອບ 56 ປີ (24/5/1960-24/5/2016), ວັນ​ເກີດ​ຂອງ​ປະທານ ໂຮ່ຈີ່ມິນ ຄົບຮອບ 126 ປີ (19/5/1890-19/5/2016), ວັນ​​ເກີ​ດ ທ່ານ ກາກ​ມາກ ຄົບຮອບ 198 ປີ (5/5/1818-5/5/2016), ວັນ​ໄຊຊະນະ ດຽນບຽນຟູ ຄົບຮອບ 62 ປີ (7/5/1954-7/5/2016) ​ແລະ ວັນ​ໄຊຊະນະ ຂອງສະ​ຫະພາບ​ໂຊ​ວຽດ ​ເໜືອຟາດ​ຊິດ​ເຢຍລະ​ມັນ ​ໃນ​ສົງ​ຄົມ​ໂລກ​ຄັ້ງ​ທີ II ຄົບຮອບ 71 ປີ (9/5/1945-9/5/2016), ​ໃຫ້ກຽດ​ເຜີຍ​ແຜ່​ເອກະສານ ​ໂດຍ ​ທ່ານ ​ນາງ ຄຳ​ເພົາ ​ເອີນ​ທະ​ວັນ, ຮອງ​ລັດຖະມົນຕີ​ກະຊວງ​ການ​ຕ່າງປະ​ເທດ, ພ້ອມ​ດ້ວຍພະນັກງານ​​ ເຂົ້າຮ່ວມ​ຫລາຍ​ກວ່າ 400 ທ່ານ.

ທ່ານ​ ນາງ ຄຳ​ເພົາ ​ເອີນ​ທະ​ວັນ ​ໄດ້​ຍົກ​ໃຫ້​ເຫັນ ສະພາບ​ການ ​ທີ່​ກອງ​ພັນ​ທີ 2 ຖືກ​ປິດ​ລ້ອມ, ການຜ່າ​ວົງ​ປິດ​ລ້ອມ ​ແລະ ປັດ​​ໄຈ​ພື້ນຖານ ​ ທີ່​ເຮັດ​ໃຫ້​ກອງພັນ​ທີ 2 ສາມາ​ດຜ່າ​ວົງ​ປິດ​ລ້ອມ ​ໄດ້​ຢ່າງ​ມີ​ໄຊ, ການ​ເຄື່ອນ​ໄຫວ​ ປະຕິວັດ​ຂອງ​ຜູ້ນຳ​ພັກ ​ແລະ ​ແນວ​ລາວ​ສ້າງ​ຊາດ, ​ແຜນການ​ໂຕນ​ອອກ​ຈາກ​ຄຸກ, ການ​ກະກຽມ ​ແລະ ສາ​ເຫດ ການ​ໂຕນ​ຄຸກ ຢ່າງ​ມະຫັດສະຈັນຂອງ​ບັນດາ​ຜູ້ນຳ ໄປ​ສູ່​ເຂດ​ທີ່ໝັ້ນປະຕິວັດ​ຢ່າງ​ປອດ​ໄພ, ພ້ອມ​ທັງ ຍົກ​ໃຫ້​ເຫັນ​ເຖິງ​ຊີວິດ ແລະ ການ​ເຄື່ອນ​ໄຫວ​ປະຕິວັດ, ຄຸນ​ງານ​ຄວາມ​ດີ ​ແລະ ຜົນງານ​ອັນ​ຍິ່ງ​ໃຫຍ່, ຄຸນສົມບັດ​ສິນ​ທຳ​ປະຕິວັດຂອງ​ປະທານ ​ໂຮ່ຈີ່ມິງ ​ແລະ ທ່ານ ​ກາກ​ມາກ.

ນອກ​ນັ້ນ,​ ຍັງ​ໄດ້​ເລົ່າຄືນ​ກ່ຽວກັບ ​ເຫດການ​ປະຫວັດ​ສາດຂອງ​ສາກົນ ​ໂດຍ​ສະ​ເພາະ​​ແມ່ນ​ສາ​ເຫດ​ ພາ​ໃຫ້​ເກີດ​ສົງຄາມ​ໂລກ ​ຄັ້ງ​ທີ II, ການ​ບຸກ​ໂຈມຕີລ້າງ​ຜານ​ຂອງ​ພວກ​ຟາດ​ຊິດ, ມະຫາ​ສົງຄາມ​ປ້ອງ​ກັນ ​ປິ​ຕິ​ພູມ​ຂອງ​ກອງທັບ ​ແລະ ປະຊາຊົນ​ໂຊ​ວຽດ, ຜົນ​ເສຍ​ຫາຍ ​ແລະ ຜົນ​ສະທ້ອນ​ຂອງ ​ໄຊຊະນະ​ຟາດ​ຊິດ ​ຕໍ່​ຊາວ​ໂລກ, ການສະໜັບສະໜູນຊ່ວຍ​ເຫ​ລືອຂອງ​ ສະຫະພາບ​ໂຊ​ວຽດ ຕໍ່ ສປປ ລາວ, ​ແຜນ​ຍຸດ​ທະ​ສາດປົດ​ປ່ອຍ​ດຽນບຽນຟູຂອງ ​ພັກ​ກ​ອມມູນິດ ​ຫວຽດນາມ ​ແລະ ຄວາມ​ສຳຄັນຂອງ​ໄຊຊະນະ​ ດຽນບຽນຟູ ຕື່ມອີກ​.