ໃນວັນທີ 18-19 ພຶດສະພາ 2016 ນີ້, ທ່ານ ນາງ Tone Skogen, ຮອງລັດຖະມົນຕີກະຊວງການຕ່າງປະເທດ ແຫ່ງ ຣາຊະອານາຈັກ ນອກແວ, ພ້ອມດ້ວຍຄະນະ ໄດ້ເດີນທາງຢ້ຽມຢາມສັນທະວະໄມຕີ ຢ່າງເປັນທາງການ ຢູ່ ສາທາລະນະລັດ ປະຊາທິປະໄຕ ປະຊາຊົນລາວ.
ໃນໄລຍະການຢ້ຽມຢາມ, ທ່ານ ນາງ Tone Skogen ແລະ ຄະນະ ໄດ້ມີການພົບປະສອງຝ່າຍກັບ ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ທີ່ ກະຊວງການຕ່າງປະເທດ. ໃນການພົບປະ ທັງສອງຝ່າຍໄດ້ປຶກສາຫາລື ກ່ຽວກັບ ການເສີມຂະຫຍາຍການພົວພັນຮ່ວມມື ລະຫວ່າງ ສອງປະເທດໃນຕໍ່ໜ້າ. ນອກຈາກນັ້ນ, ສອງຝ່າຍຍັງໄດ້ແລກປ່ຽນຄຳຄິດເຫັນຕໍ່ບັນຫາພາກພື້ນ ແລະ ສາກົນ ທີ່ສອງຝ່າຍມີຄວາມສົນໃຈ ເຊັ່ນ: ປຶກສາຫາລື ກ່ຽວກັບ ການຮ່ວມມືດ້ານນິຕິກຳອັນຈຳເປັນຈຳນວນໜຶ່ງ ເພື່ອເປັນພື້ນຖານໃຫ້ແກ່ການເປີດກວ້າງການຮ່ວມມືດ້ານເສດຖະກິດ-ການຄ້າ ແລະ ການລົງທຶນຢູ່ ສປປ ລາວ; ການຮ່ວມມືດ້ານພະລັງງານໄຟຟ້ານໍ້າຕົກ, ສາຍສົ່ງໄຟຟ້າແຮງສູງ, ການພັດທະນາຕົວເມືອງ ແລະ ເກັບກູ້ລະເບີດທີ່ບໍ່ທັນແຕກ (UXO); ການເປັນປະທານອາຊຽນຂອງ ສປປ ລາວ ປີ 2016 ແລະ ການພົວພັນຮ່ວມມື ນອກແວ-ອາຊຽນ ໃນຖານະທີ່ເປັນຄູ່ຮ່ວມເຈລະຈາຂະແໜງການກັບອາຊຽນ.
ໃນໄລຍະຜ່ານມາ, ຣາຊະອານາຈັກ ນອກແວ ໄດ້ໃຫ້ການສະໜັບສະໜູນຊ່ວຍເຫຼືອ ສປປ ລາວ ໃນຫຼາຍຂະແໜງການ, ທັງໃນຂອບສອງຝ່າຍ ແລະ ຫຼາຍຝ່າຍ ໃນນັ້ນມີ: ການພັດທະນາ ພະລັງງານໄຟຟ້າ, ການຄຸ້ມຄອງຊັບພະຍາກອນທຳມະຊາດ, ການສົ່ງເສີມຂະແໜງການເອກະຊົນໃນໄລຍະເສດຖະກິດຂ້າມຜ່ານ, ການພັດທະນາຊັບພະຍາກອນມະນຸດ, ດ້ານສາທາລະນະສຸກຂັ້ນພື້ນຖານ, ການສະໜັບສະໜູນສ້າງຂີດຄວາມສາມາດໃຫ້ແກ່ສະຖາບັນຂອງລັດ.
ພາຍຫຼັງການພົບປະ, ທັງສອງຝ່າຍໄດ້ຮ່ວມກັນລົງນາມໃນບົດບັນທຶກຄວາມເຂົ້າໃຈ ວ່າດ້ວຍ ການສ້າງຕັ້ງກົນໄກການປຶກສາຫາລື ລະຫວ່າງ ສອງກະຊວງການຕ່າງປະເທດລາວ ແລະ ນອກແວ.
ການຢ້ຽມຢາມຢ່າງເປັນທາງການຂອງ ທ່ານ ນາງ Tone Skogen, ຮອງລັດຖະມົນຕີກະຊວງການຕ່າງປະເທດນອກແວ, ພ້ອມດ້ວຍຄະນະໃນຄັ້ງນີ້ ເປັນຂີດໝາຍອັນສຳຄັນໃນການສົ່ງເສີມການພົວພັນ-ຮ່ວມມືຂອງສອງປະເທດໃຫ້ມີບາດກ້າວໃໝ່, ນອກຈາກ ພົບປະກັບການນຳກະຊວງການຕ່າງປະເທດແລ້ວ, ຄະນະຜູ້ແທນນອກແວ ຍັງໄດ້ເຂົ້າພົບປະກັບ ທ່ານ ຄຳມະນີ ອິນທິລາດ, ລັດຖະມົນຕີກະຊວງ ພະລັງງານ ແລະ ບໍ່ແຮ່, ຢ້ຽມຢາມ ໂຄງການຮ່ວມມືດ້ານອົງຄະທຽມ ແລະ ເຄື່ອງຄໍ້າຊູ່ (COPE) ແລະ ໂຄງການຮ່ວມມືສອງຝ່າຍທີ່ກຳລັງຈັດຕັ້ງປະຕິບັດໃນປັດຈຸບັນ.