ໃນວັນທີ 29 ເມສາ 2022 ທີ່ໂຮງແຮມ ແລນມາກ ຣີເວີຊາຍ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ, ຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ໄດ້ເປັນປະທານຮ່ວມ ກອງປະຊຸມປຶກສາຫາລືອາຊຽນ ຮ່ວມກັບ ທ່ານ ເຈດສະດາ ກະຕະເວທິນ, ເອກອັກຄະລັດຖະທູດ ແຫ່ງ ຣາຊະອານາຈັກ ໄທ ປະຈໍາ ສປປ ລາວ. ກອງປະຊຸມຄັ້ງນີ້ ຈັດຂຶ້ນໂດຍການເປັນເຈົ້າພາບຂອງສະຖານທູດໄທ ປະຈໍາ ສປປ ລາວ ໃນນາມປະທານໝູນວຽນ, ມີບັນ ດາເອກອັກຄະລັດຖະທູດ ແລະ ຜູ້ຕາງໜ້າຈາກສະຖານທູດປະເທດສະມາຊິກອາຊຽນ ປະຈຳ ສປປ ລາວ ເຂົ້າຮ່ວມ.
ໃນວັນທີ 27 ເມສາ 2022 ສະຖາບັນການຕ່າງປະເທດ ໃນນາມປະທານໝູນວຽນຂອງເຄືອຂ່າຍຄັງປັນຍາອາຊີຕາເວັນອອກ ( Network of East Asia Think Tanks /NEAT ) ໄດ້ເປັນເຈົ້າພາບຈັດກອງປະຊຸມຜູ້ປະສານງານລະຫວ່າງປະເທດຂອງເຄືອຂ່າຍ ຫລື ເອີ້ນວ່າ NEAT Country Coordinators Meeting ຄັ້ງທີ 35 ໂດຍໃຫ້ກຽດເຂົ້າຮ່ວມເປັນປະທານກ່າວເປີດຂອງ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ພ້ອມດ້ວຍຄະນະສະຖາບັນ, ຄະນະພະແນກ ແລະ ວິຊາການ ຈຳນວນ 20 ທ່ານ. ກອງປະຊຸມໄດ້ດຳເນີນໄປເປັນເວລາ ເຄິ່ງວັນ ໃນຮູບແບບກອງປະຊູມທາງໄກ (Zoom platform).
ໃນວັນທີ 28 ເມສາ 2022, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ທັງເປັນຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ, ໃນນາມທີ່ ສປປ ລາວ ເປັນປະເທດປະສານງານ ສໍາລັບການຮ່ວມມື ອາຊຽນ-ອົດສະຕຣາລີ, ໄດ້ເປັນປະທານຮ່ວມກອງປະຊຸມປຶກສາຫາລື ອາຊຽນ-ອົດສະຕຣາລີ ຄັ້ງທີ 34 ແບບທາງໄກ ທີ່ ກະຊວງການຕ່າງປະເທດ ຮ່ວມກັບ ທ່ານ ນາງ Katrina Cooper, ຮອງລັດຖະມົນຕີກະຊວງການຕ່າງປະເທດ ແລະ ການຄ້າ, ຫົວໜ້າເຈົ້າໜ້າທີ່ອາວຸໂສອາຊຽນ ຂອງອົດສະຕຣາລີ. ເຂົ້າຮ່ວມກອງປະຊຸມຄັ້ງນີ້ ມີບັນດາຫົວໜ້າເຈົ້າໜ້າທີ່ອາວຸໂສອາຊຽນ ແລະ ຮອງເລຂາທິການໃຫຍ່ອາຊຽນ.