ໃນວັນທີ 09 ມັງກອນ 2020, ທີ່ ກະຊວງການຕ່າງປະເທດ, ທ່ານ ທອງສະຫວັນ ພົມວິຫານ, ຮອງລັດຖະມົນຕີ ກະຊວງການຕ່າງປະເທດ, ໄດ້ໃຫ້ກຽດຕ້ອນຮັບ ແລະ ມອບຫນັງສືຮັບຮອງກົງສຸນ ໃຫ້ແກ່ ທ່ານ ແກ້ວວີສຸກ ດາລາສານ, ເປັນກົງສຸນກິດຕິມະສັກ ແຫ່ງ ແຟັງລັງ ປະຈຳ ສປປ ລາວ, ເຊິ່ງມີສຳນັກງານຕັ້ງຢູ່ ນະຄອນຫລວງວຽງຈັນ. ໃນໂອກາດນີ້, ທ່ານ ຮອງລັດຖະມົນຕີກະຊວງການຕ່າງປະເທດ ໄດ້ສະແດງຄວາມຊົມເຊີຍ ແລະ ອວຍພອນໃຫ້ແກ່ຜູ້ກ່ຽວທີ່ໄດ້ຮັບຫນ້າທີ່ເປັນກົງສຸນກິດຕິມະສັກຂອງຕ່າງປະເທດ ປະຈຳ ສປປ ລາວ ນັ້ນ ປະສົບແຕ່ຜົນສຳເລັດໃນການປະຕິບັດຫນ້າທີ່ອັນມີກຽດດັ່ງກ່າວ, ໃນຂະນະດຽວກັນ, ທ່ານ ຮອງລັດຖະມົນຕີ ຍັງໄດ້ຢ້ຳຕື່ມວ່າ ຕະຫລອດໄລຍະການປະຕິບັດຫນ້າທີ່ດັ່ງກ່າວ, ທ່ານ ກົງສຸນກິດຕິມະສັກ ຈະມີບົດບາດໃນການເປັນຂົວຕໍ່ອັນສຳຄັນໃນການສົ່ງເສີມ, ຂະຫຍາຍສາຍພົວພັນມິດຕະພາບ ແລະ ການຮ່ວມມືລະຫວ່າງ ລາວ-ແຟັງລັງ ໃຫ້ມີບາດກ້າວຂະຫຍາຍ ຕົວຂຶ້ນໄປເລື້ອຍໆ ເພື່ອແນໃສ່ນຳຜົນປະໂຫຍດມາສູ່ປະຊາຊົນສອງຊາດ ພ້ອມນີ້ກໍເປັນການປະກອບ ສ່ວນເຂົ້າໃນພາລະ ກິດ ສັນຕິພາບ, ມິດຕະພາບ ແລະ ການຮ່ວມມື ເພື່ອການພັດທະນາໃນພາກພື້ນ ແລະ ໃນໂລກ.
ຄະນະກຳມາທິການເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ ກະຊວງການຕ່າງປະເທດ ໄດ້ຈັດກອງປະຊຸມຝຶກອົບຮົມ ແລະ ເຜີຍແຜ່ເອກະສານ ເນື່ອງໃນວັນສາກົນເພື່ອລຶບລ້າງການໃຊ້ຄວາມຮຸນແຮງຕໍ່ແມ່ຍິງ 25 ພະຈິກ ຂຶ້ນ ໃນລະຫວ່າງ ວັນທີ 27-28 ທັນວາ 2019, ທີ່ ເມືອງ ວັງວຽງ, ແຂວງ ວຽງຈັນ ພາຍໃຕ້ຫົວຂໍ້: ຄວາມສະເໝີພາບຍຸກໃໝ່ ໂດຍບໍ່ປະໃຜໄວ້ທາງຫຼັງ ແລະ ຢຸດຕິການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ, ພາຍໃຕ້ການເປັນປະທານຂອງ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີ, ປະທານຄະນະກຳມາທິການເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ ກະຊວງການຕ່າງປະເທດ, ມີບັນດາທ່ານຄະນະກົມ, ຄະນະພະແນກ, ພະນັກງານວິຊາການ ຕາງໜ້າຈາກບັນດາກົມ ພາຍໃນກະຊວງການຕ່າງປະເທດ, ຜູ້ຕາງໜ້າຈາກພະແນກການຕ່າງປະເທດ ແລະ ສະຫະພັນແມ່ຍິງ ແຂວງ ວຽງຈັນ.
ໃນຕອນບ່າຍຂອງວັນທີ 7 ມັງກອນ 2020, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ, ໄດ້ຕ້ອນຮັບການຢ້ຽມຂ່ຳນັບຂອງ ທ່ານ ນາງ ເໝົາ ໜິງ, ຮອງຫົວໜ້າກົມອາຊີ, ກະຊວງການຕ່າງປະເທດ ແຫ່ງ ສປ ຈີນ ພ້ອມດ້ວຍຄະນະ, ທີ່ ກະຊວງການຕ່າງເທດ. ຈຸດປະສົງຂອງການຢ້ຽມຂ່ຳນັບໃນຄັ້ງນີ້ ແມ່ນເພື່ອລາຍງານຜົນການປະຕິບັດວຽກງານ ໃນນາມປະທານຮ່ວມຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ ກັບ ສປປ ລາວ ໃນໄລຍະຜ່ານມາ (2018-2020). ພ້ອມດຽວກັນນັ້ນ, ຝ່າຍຈີນ ກໍໄດ້ລາຍງານຄວາມຄືບໜ້າຂອງການກະກຽມດ້ານພະລາທິການ ແລະ ດ້ານເນື້ອໃນຂອງການເປັນເຈົ້າພາບຈັດກອງປະຊຸມລັດຖະມົນຕີຕ່າງປະເທດ ແມ່ນ້ຳຂອງ-ແມ່ນ້ຳລ້ານຊ້າງ ຄັ້ງທີ 5, ຊຶ່ງຈະຈັດຂຶ້ນໃນໄລຍະວັນທີ 19-20 ກຸມພາ 2020, ທີ່ ສົງຊິງ, ສປຈີນ.