ໃນວັນທີ 4 ກໍລະກົດ ນີ້, ທີ່ສະຖານເອກອັກຄະລັດຖະທູດ ແຫ່ງ ສປປ ລາວ ປະຈຳ ຮ່າໂນ້ຍ ສສ ຫວຽດນາມ, ທ່ານ ພົມມາ ສິດເສນາ, ອັກຄະລັດຖະທູດ ໄດ້ຕ້ອນຮັບ ທ່ານ ຮາດຊານ ອາຟ ຊາຄານ, ຮອງຫົວໜ້າສຳນັກງານ ສະຖານເອກອັກຄະລັດຖະທູດ ສາທາລະນະລັດ ອິສລາມ ປາກິດສະຖານ ປະຈຳ ສາທາລະນະລັດ ປະຊາທິປະໄຕ ປະຊາຊົນລາວ, ຊຶ່ງມີສຳນັກງານຕັ້ງຢູ່ ນະຄອນຫລວງ ຮ່າໂນ້ຍ ສສ ຫວຽດນາມ ທີ່ໄດ້ນຳເອົາຄອມພີວເຕີ ມາມອບໃຫ້ສະຖານເອກອັກຄະລັດຖະທູດລາວ ທີ່ ຮ່າໂນ້ຍ ສສ ຫວຽດນາມ ເພື່ອສົ່ງຕໍ່ໃຫ້ບາງກະຊວງຂອງລາວ.
ການຊ່ວຍເຫລືອຄັ້ງນີ້ ມີເຄື່ອງຄອມພີວເຕີຕັ້ງໂຕະ ຈຳນວນ 23 ຊຸດ, ຊຶ່ງເປັນຂອງຂວັນຂອງ ລັດຖະບານປາກິດສະຖານ ມອບໃຫ້ແກ່ລັດຖະບານລາວ ເພື່ອຮັບໃຊ້ເຂົ້າໃນການຈັດກອງປະຊຸມອາຊຽນ ທີ່ ສປປ ລາວ ເປັນເຈົ້າພາບໃນປີນີ້. ໃນໂອກາດນີ້ ທ່ານ ພົມມາ ສິດເສນາ ໄດ້ສະແດງຄວາມຂອບໃຈ ຕໍ່ທ່ານ ຮາດຊານ ອາຟ ຊາຄານ ທີ່ໄດ້ຕາງໜ້າສະຖານທູດມາມອບເຄື່ອງດັ່ງກ່າວ ແລະ ຜ່ານສະຖານທູດ ໄປຍັງ ລັດຖະບານປາກິດສະຖານ ທີ່ໃຫ້ການຊ່ວຍເຫລືອໃນຄັ້ງນີ້, ພ້ອມທັງໃຫ້ຄຳຢືນຢັນທີ່ຈະນຳເອົາເຄື່ອງຊ່ວຍເຫລືອດັ່ງກ່າວ ໄປມອບໃຫ້ບັນດາກະຊວງ ຕາມທີ່ຝ່າຍປາກິດສະຖານ ໄດ້ກຳນົດນັ້ນ.