ໃນວັນທີ 10 ກໍລະກົດ 2016, ທີ່ ສະຖານເອກອັກຄະລັດຖະທູດ ແຫ່ງ ສປປ ລາວ ປະຈຳ ສ. ເກົາຫຼີ, ທີ່    ເຊອູນ, ໄດ້ມີພິທີຈັດຕັ້ງ ກອງປະຊຸມເຊື່ອມຊຶມມະຕິ ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ X ຂອງ ພັກ ປະຊາຊົນ ປະຕິວັດລາວ ພາຍໃຕ້ການເປັນປະທານ ໂດຍ ສະຫາຍ ຄຳສວຍ ແກ້ວດາລາວົງ, ເລຂາໜ່ວຍພັກ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ສ. ເກົາຫຼີ, ມີບັນດາພະນັກງານສະຖານທູດ, ພະນັກງານຕາງໜ້າຫ້ອງການການບິນລາວ ປະຈຳ ສ. ເກົາຫຼີ ແລະ ນັກສຶກສາລາວ ເຊິ່ງສ່ວນໃຫຍ່ແມ່ນພະນັກງານບັນດາຂະແໜງການຕ່າງໆອ້ອມຂ້າງສູນກາງ ເຂົ້າຮ່ວມປະມານ 50 ກວ່າທ່ານ.

ທີ່ປະຊຸມ ໄດ້ຮັບຟັງ ແລະ ແລກປ່ຽນຄຳຄິດຄຳເຫັນ ກ່ຽວກັບ ເນື້ອໃນເອກະສານສຳຄັນຕ່າງໆຂອງກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ X ແນໃສ່ສ້າງຄວາມຮັບຮູ້ ແລະ ເຂົ້າໃຈຢ່າງເປັນເອກະພາບ ແລະ ເລິກເຊິ່ງໃຫ້ແກ່ຜູ້ເຂົ້າຮ່ວມ ກ່ຽວກັບ ນະໂຍບາຍແນວທາງປ່ຽນແປງໃໝ່ຂອງພັກ-ລັດ ໃນການສ້າງສາພັດທະນາປະເທດຊາດ ແລະ ນຳເອົາເນື້ອໃນຈິດໃຈດັ່ງກ່າວ ໄປຈັດຕັ້ງປະຕິບັດຜັນຂະຫຍາຍຕາມຂະແໜງການທີ່ຕົນຮັບຜິດຊອບຢ່າງເປັນຮູບປະທຳ. ໂດຍສະເພາະແມ່ນວິໄສທັດ ແຕ່ນີ້ເຖິງປີ 2030 ແລະ ຍຸດທະສາດການພັດທະນາຂອງ ສປປ ລາວ ໃນແຕ່ລະໄລຍະ ແຕ່ນີ້ ເຖິງ 2025 ແລະ ແຜນພັດທະນາເສດຖະກິດ-ສັງຄົມ ແຫ່ງຊາດ ຊຸດທີ VIII ແຕ່ນີ້ເຖິງປີ 2020. ສູ້ຊົນເຮັດໃຫ້ຄຳຂວັນ “ສູ້ຊົນພັດທະນາປະເທດເຮົາໃຫ້ຫຼຸດພົ້ນຈາກສະຖານະພາບດ້ອຍພັດທະນາໃນປີ 2020 ແລະ ກ້າວໄປສູ່ປະເທດກຳລັງພັດທະນາທີ່ມີລາຍຮັບປານກາງສູງ ຕາມທິດພັດທະນາສີຂຽວ ແລະ ຍືນຍົງ ເມື່ອເຖິງ 2030” ກາຍເປັນຈິງເທື່ອລະກ້າວ.

ພາຍຫຼັງສຳເລັດພິທີດັ່ງກ່າວ, ໃນວັນດຽວກັນໜ່ວຍສະຫະພັນແມ່ຍິງ ສະຖານທູດ ກໍ່ໄດ້ຈັດຕັ້ງພິທີປາຖະກະຖາເລົ່າມູນເຊື້ອວັນສ້າງຕັ້ງສະຫະພັນແມ່ຍິງລາວ ຄົບຮອບ 61 ປີ (20 ກໍລະກົດ 1955 - 20 ກໍລະກົດ 2016). ກອງປະຊຸມດັ່ງກ່າວ ໄດ້ຊຸກຍູ້, ເຕືອນສະຕິບັນດາເອື້ອຍ-ນ້ອງແມ່ຍິງລາວ ທີ່ຢູ່ ສ. ເກົາຫຼີ ເພີ່ມທະວີການໂຄສະນາເຜີຍແຜ່ຮີດຄອງອັນເປັນເອກະລັກ ແລະ ວັດທະນະທຳ ອັນດີງາມຂອງຊາດລາວຕໍ່ສາກົນ ໃຫ້ກວ້າງຂວາງຂຶ້ນ.