ກອງ​ປະຊຸມປຶກສາ​ຫາລື​ດ້ານ​ເຕັກນິກ-​ວິຊາ​ການ ລະຫວ່າງ ລາວ-​ອາ​ເມ​ລິ​ກາ ກ່ຽວ​ກັບ​ ວຽກ​ງານ​ການ​ຊອກ​ຫາ​ຮ່ອງຮອຍ ​ແລະ ສິ່ງ​ເສດ​ເຫຼືອ​ຂອງ​ອະດີດ​ທະຫານ​ອາ​ເມ​ລິ​ກາ ​ທີ່​ຫາຍ​ສາບ​ສູນ​ໃນ​ປາງ​ສົງຄາມ ​ຢູ່ ສປປ ລາວ ປະຈຳ​ປີ 2016, ​​ໄດ້​ຈັດ​ຂຶ້ນ​ໃນ​ວັນ​ທີ 3 ສິງຫາ 2016, ທີ່​ລັດ​ຮາ​ວ່າ​ຍ ສະຫະລັດ ອາ​ເມ​ລິ​ກາ, ​ໂດຍ​ການ​ເຂົ້າ​ຮ່ວມ​ຂອງ​ຄະນະ​ຜູ້​ແທນ​ລາວ ​ນຳ​ໂດຍ ທ່ານ ຂວັນ​ຕາ ຜາ​ລີ​ວົງ, ຫົວໜ້າ​ກົມ​ເອີຣົບ-ອາ​ເມລິກ​າ, ກະຊວງ​ການ​ຕ່າງປະ​ເທດ ພ້ອມ​ດ້ວຍ​ຄະນະ ​ແລະ ຄະນະ​ຜູ້​ແທນ​ຝ່າຍ​ອາ​ເມ​ລິ​ກາ ນຳ​ໂດຍ ທ່ານ ພົນຈັດຕະວາ Mark Spindler, ຮອງຜູ້​ບັນຊາ​ການ​ທະຫານ​ຮ່ວມປະຈຳພາກພຶື້ນອາຊີ-ປາຊີຟິກ, ຮັບຜິດຊອບວຽກ​ງານ​ການ​ຊອກ​ຫາ​ຮ່ອງຮອຍ ​ແລະ ສິ່ງ​ເສດ​ເຫຼືອຂອງ​ທະຫານ​ອາ​ເມ​ລິ​ກາ​ທີ່​ຫາຍ​ສາບ​ສູນ​ໃນ​ປາງ​ສົງຄາມ​ ​ເປັນ​ຫົວໜ້າ​ ​ແລະ ທ່ານ ດານຽວ ຄລູນ, ​ເອກອັກຄະ​ລັດຖະທູດ ​ແຫ່ງ ສະຫະລັດ ອາ​ເມລິກາ ປະຈຳ ສປປ ລາວ.

ໃນ​ກອງ​ປະຊຸມ​ຄັ້ງ​ນີ້, ທັງສອງ​ຝ່າຍ ​ໄດ້​ທົບ​ທວນຄືນ​ການ​ປະຕິບັດ​ແຜນການ​ຮ່ວມມືໃນ​ໄລຍະ 01 ປີ ຜ່ານມາ ກ່ຽວ​ກັບ ​ວຽກ​ງານ​ການ​ສຳ​ຫຼວດ, ​ຂຸດ​ຄົ້ນ​ເພື່ອ​ຊອກ​ຫາ​ຮ່ອງຮອຍ ​ແລະ ສິ່ງ​ເສດ​ເຫຼືອ​ ຂອງ​ອະດີດ​ທະຫານ​ອາ​ເມ​ລິ​ກາ​ທີ່​ຫາຍ​ສາບ​ສູນ​ໃນ​ປາງ​ສົງຄາມ​ຢູ່​ລາວ,​​ ຢູ່​ ແຂວງຫົວພັນ​, ຊຽງ​ຂວາງ, ບໍລິ​ຄຳ​ໄຊ, ​ຄຳ​ມ່ວນ, ສາລະວັນ, ເຊກອງ ແລະ ອັດຕະປື, ​ພ້ອມທັງໄດ້​ປຶກສາ​ຫາລື​ກັນ​ໃນ​ການວາງ​ແຜນ​ການ​ປະຕິບັດ​ງານ​ຮ່ວມ​ລະອຽດ​ໃນສົກປີ​ຕໍ່ໜ້າ. ນອກຈາກ​ນັ້ນ​ແລ້ວ, ທັງສອງ​ຝ່າຍ​ໄດ້​ຕົກລົງ​ຮ່ວມ​ມື​ກັນ​ສືບ​ຕໍ່​ ເພີ້​ມທະວີ​ຂອບ​ຂອງ​ການ​ຮ່ວມ​ມື​ເຊັ່ນ: ການ​ຊອກ​ຫາ​ຂໍ້​ມູນ​ຂ່າວສານ, ການສຳຫຼວດກ່ອນການຂຸດຄົ້ນ ແລະ ​ເຫັນ​ດີ​ໃຫ້​ມີ​ການ​ຮ່ວມມື​ 3 ຝ່າຍ ລາວ-​ຫວຽດນາມ-​ອາ​ເມ​ລິ​ກາ ລະດັບ​ວິຊາ​ການເພື່ອ​ເຮັດ​ໃຫ້ການ​ປະ​ຕິ​ບັດ​ວຽກ​ງານ MIA ​ໃ​ຫ້ມີ​ປະສິດທິ​ຜົນ ​ແລະ ວ່ອງ​ໄວ​ກວ່າ​ເກົ່າ, ລວມທັງ​ການ​ຊ່ວຍ​ເຫຼືອ​ດ້ານ​ມະນຸດສະທຳ​ໃຫ້​ແກ່​ທ້ອງ​ຖິ່ນ​ເຂດ​ທີ່​ມີ​ການ​ປະຕິບັດ​ການສຳ​ຫຼວດ ​ແລະ ຂຸດ​ຄົ້ນ. ໃນໂອກາດນີ້ ຝ່າຍ​ລາວ ​ໄດ້​ຢືນຢັນ​ຄືນ​ທີ່​​ສືບ​ຕໍ່​ໃຫ້ການ​ຮ່​ວມມື​ໃນວຽກງານດັ່ງກ່າວ ບົນ​ຈິດ​​​ໃຈແນວທາງ​ນະ​ໂຍບາຍທາງດ້ານມະນຸດສະທຳ ​ແລະ ອີງຕາມ​ເງື່ອນ​ໄຂ​ຄວາມ​ສາມາດ​ຕົວ​ຈິງ​ຂອງ​ຕົນ. ສ່ວນ​ຝ່າຍ​ອາ​ເມ​ລິ​ກາ​ກໍ່​ໄດ້​ສະ​ແດງ​ຄວາມ​ຂອບ​ໃຈ ​ແລະ ຕີ​ລາຄາ​ສູງຕໍ່​ການ​ຊ່ວຍ​ເຫຼືອ​ຂອງ​ລັດຖະບານ​ລາວ​ ກໍ​ຄື ​ປະຊາຊົນ ​ແລະ ອຳນາດ​ການ​ປົກຄອງ​ທ້ອງ​ຖິ່ນ​ຂອງ​ລາວ ​ໃນ​ວຽກ​ງານ​ການ​ຮ່ວມ​ມື​ດ້ານ​ມະນຸດສະທຳ​ດັ່ງກ່າວ​ນີ້. ຝ່າຍ​ອາ​ເມ​ລິ​ກາ​ໄດ້​ຍົກ​ໃຫ້​ເຫັນ​ເຖິງ​ຄວາມ​ສຳຄັນ​ຂອງ​ການ​ຮ່ວມ​ມື​ຂອງ​ສອງ​ປະ​ເທດ, ​ໂດຍ​ສະ​ເພາະ​ໃນ​ວຽກ​ງານ MIA, ທີ່​​ເປັນ​ສ່ວນ​ປະກອບ​ໃຫ້​ແກ່​ການ​ຂະຫຍາຍ​ການ​ຮ່ວມ​ມື​ຂອງ​ສອງ​ປະ​ເທດ ​ໃນ​ໄລຍະ​ຫຼາຍ​ກວ່າ 30 ປີ ຜ່ານມາ, ພ້ອມ​ທັງ​ໄດ້​ຢືນຢັນ​ຈະ​ສືບ​ຕໍ່​ໃຫ້ການ​ຊ່ວຍ​ເຫຼືອ​ດ້ານ​ມະນຸດສະທຳ​ແກ່​ປະຊາຊົນ​ທ້ອງ​ຖິ່ນ ​ກໍຄື ​ລັດຖະບານ​ລາວ ​ເພື່ອ​ປະກອບສ່ວນ​ເສີມ​ຂະຫຍາຍ​ໃຫ້ການ​ພົວພັນ​ຮ່ວມມື ລະຫວ່າງ​ສອງ​ປະ​ເທດ ລາວ-​ອາ​ເມ​ລິ​ກາ​ ໃຫ້​ມີ​ບັນຍາກາດ​ນັບ​ມື້​ນັບ​ດີ​ຂຶ້ນ,​ ເພື່ອ​ຜົນ​ປະ​ໂຫຍ​ດຊຶ່ງ​ກັນ ​ແລະ ກັນຫຼາຍ​ຂື້ນ​ໃນ​ອະນາຄົດ.

ໂດຍ​ສືບ​ຕໍ່​ປະຕິບັດ​ນະ​ໂຍບາຍ​ມະນຸດສະທຳ ​ອັນ​ສະ​ເໝີ​ຕົ້ນ​ສະ​ເໝີ​ປາຍ​ຂອງ​ລັດຖະບານ ​ແຫ່ງ ສປປ ລາວ, ວຽກ​ງານ​ການ​ຮ່ວມ​ມື, ສຳ​ຫຼວດ ​ແລະ ຂຸດ​ຄົ້ນ ເພື່ອ​ຊອກ​ຫາ​ຮ່ອງຮອຍ ​ແລະ ສິ່ງ​ເສດ​ເຫຼືອ​ຂອງ​ອະດີດ​ທະຫານ​ອາ​ເມ​ລິ​ກາ ​ທີ່​ຫາຍ​ສາບ​ສູນ​ໃນ​ປາງ​ສົງຄາມ​ຢູ່​ລາວ ​ໄດ້​ດຳ​ເນີນ​ມາ​ແຕ່​ປີ 1982 ມາ​ເຖິງ​ປະຈຸ​ບັນ​ນີ້​ເປັນ​ເວລາ 34 ປີ​ແລ້ວ, ຊຶ່ງ​ສອງ​ຝ່າຍ​ສາມາດ​ຊອກ​ຫາ, ຂຸດ​ຄົ້ນ​ສິ່ງ​ເສດ​ເຫຼືອ​ຂອງ​ອະດີດ​ທະຫານ​ອາ​ເມ​ລິ​ກາ ທີ່​ຫາຍ​ສາບ​ສູນ​ໃນ​ປາງ​ສົງຄາມ​ຢູ່​ລາວ, ສຳ​ເລັດ​ໄປ​​​ແລ້ວ ຈຳນວນ 272 ກໍລະນີ ​ໃນຈຳນວນ 573 ກໍລະນີ ​ແລະ ຍັງ​ເຫຼືອ​ຈະ​ສືບ​ຕໍ່​ຊອກ​ຫາ​ຂຸດ​ຄົ້ນ​ອີກ 301 ກໍລະນີ. ການ​ຮ່ວມ​ມື​ດັ່ງກ່າວ ​ເປັນ​ການສະ​ແດງ​ໃຫ້​ເຫັນ​​ເຖິງ​ຄວາມ​ເອົາ​ໃຈ​ໃສ່​ຂອງ​ລັດຖະບານ ​ກໍ​ຄື​ ການ​ຮ່ວມ​ມື​ເປັນ​ຢ່າງ​ດີ​ຂອງ​ປະຊາຊົນ​ລາວ ທີ່ມີ​ຕໍ່​ລັດຖະບານ​ ກໍ​ຄື​ ປະຊາຊົນ​ອາ​ເມ​ລິ​ກາ.