ໃນຕອນເຊົ້າຂອງວັນທີ 10 ສິງຫາ ທີ່ຜ່ານມານີ້, ທ່ານ ຕິ່ງ ສຸກສັນ, ຫົວໜ້າກົມຈັດຕັ້ງ ແລະ ພະນັກງານ, ກະຊວງການຕ່າງປະເທດ, ໄດ້ພົບປະ ແລະ ໂອ້ລົມ ກັບບັນດາພະນັກງານຂອງສະຖານທູດ ສປປ ລາວ, ທີ່ ບາງກອກ, ຣາຊາອານາຈັກໄທ, ເພື່ອແຈ້ງສະພາບ ກ່ຽວກັບ ການພັດທະນາຊັບພະຍາກອນມະນຸດ ພາຍໃນກະຊວງການຕ່າງປະເທດ ແລະ ເປັນການໃຫ້ທິດຊີ້ນຳໃນການປະຕິບັດວຽກງານ ຂອງບັນດາອ້າຍເອື້ອຍນ້ອງພະນັກງານໃນສະຖານທູດ.
ທ່ານ ກິ່ງໂພແກ້ວ ພົມມະຫາໄຊ, ທີ່ປຶກສາທູດ, ທັງເປັນຫົວໜ້າຫ້ອງການສະຖານທູດ, ໄດ້ລາຍງານສະພາບການໂດຍຫຍໍ້ ກ່ຽວກັບ ການຈັດຕັ້ງປະຕິບັດວຽກຂອງສະຖານທູດໃນໄລຍະຜ່ານມາ ໃຫ້ທ່ານຫົວໜ້າກົມຈັດຕັ້ງຮັບຊາບ ແລະ ຈາກນັ້ນບັນດາອ້າຍເອື້ອຍນ້ອງພະນັກງານພາຍໃນສະຖານທູດ ໄດ້ພັດປ່ຽນກັນຂຶ້ນມີຄວາມເຫັນຢ່າງສ້າງສັນ ກ່ຽວກັບ ແນວທາງການພັດທະນາບຸກຄະລາກອນໃນສະຖານທູດລາວ ທີ່ ບາງກອກ ອີກດ້ວຍ.
ໃນໂອກາດນີ້, ກ່ອນອື່ນໝົດ ທ່ານ ຕິ່ງ ສຸກສັນ ໄດ້ແຈ້ງສະພາບການ ກ່ຽວກັບ ການພັດທະນາເສດຖະກິດສັງຄົມຂອງປະເທດລາວ ແລະ ສະພາບການອັນພົ້ນເດັ່ນຂອງໂລກ ໃຫ້ພະນັກງານສະຖານທູດຮັບຊາບ, ໂດຍສະເພາະ ບັນດາເຫດການອັນສຳຄັນທີ່ ສປປ ລາວ ກຳລັງຈັດຕັ້ງປະຕິບັດຢູ່ ພິເສດ ການເປັນປະທານອາຊຽນຂອງລາວໃນປີນີ້ ເຊິ່ງມີຄວາມຮັບຜິດຊອບສູງໃນການຈັດກອງປະຊຸມອັນສຳຄັນຂອງອາຊຽນ.
ນອກຈາກນັ້ນ, ທ່ານຍັງໄດ້ຕີລາຄາສູງ ຕໍ່ຜົນງານຂອງບັນດາອ້າຍນ້ອງພະນັກງານ ທີ່ໄດ້ປະກອບສ່ວນແກ່ວຽກງານຂອງສະຖານທູດໃນໄລຍະຜ່ານມາ ໃນການເຮັດໜ້າທີ່ເປັນເສນາທິການໃຫ້ຂັ້ນເທິງໄດ້ເປັນຢ່າງດີ ແລະ ຮຽກຮ້ອງໃຫ້ພະນັກງານທັງໝົດ ຈົ່ງມີສະຕິກຳໄດ້ມິດສັດຕູ ແລະ ກຳແໜ້ນແນວທາງນະໂຍບາຍຂອງພັກ ແລະ ມີຄວາມສາມັກຄີຮັກແພງກັນ ເພື່ອດຳເນີນວຽກງານທີ່ພັກ ແລະ ລັດມອບໝາຍໃຫ້ບັນລຸໄດ້ຕາມແຜນການ.