ໃນວັນທີ 26 ສິງຫາ 2016, ທີ່ ໂຮງແຮມອ່າງຄຳ, ນະຄອນຫຼວງວຽງຈັນ ໄດ້ຈັດກອງປະຊຸມແລກປ່ຽນບົດຮຽນ ລະຫວ່າງ ກົມການຂ່າວ, ກະຊວງການຕ່າງປະເທດ ແລະ ເຈົ້າໜ້າທີ ປກສ ເພື່ອຮັບໃຊ້ເຂົ້າໃນກອງປະຊຸມສຸດຍອດອາຊຽນ ຄັ້ງທີ 28 ແລະ 29, ໂດຍການເປັນປະທານຂອງ ທ່ານ ພອນທະວີ ບຸດດາລາ, ຫົວໜາກົມການຂ່າວ,ກະຊວງການຕ່າງປະເທດ, ຫົວໜ້າສູນຂ່າວຕ່າງປະເທດ ໃນອານຸກຳມະການໂຄສະນາ, ວັດທະນາທຳ ແລະ ຂ່າວສານ, ມີຄະນະກົມການຂ່າວ, ບັນດາເຈົ້າໜ້າທີ່ ປກສ ແລະ ພະນັກງານທີ່ກ່ຽວຂ້ອງເຂົ້າຮ່ວມ.
ຈຸດປະສົງການຈັດກອງປະຊຸມໃນຄັ້ງນີ້ ແມ່ນເພື່ອຖອດຖອນແລກປ່ຽນບົດຮຽນ ລະຫວ່າງກົມຂ່າວ ແລະ ເຈົ້າໜ້າທີ ປກສ ໃຫ້ຮັບຮູ້ເຖິງຄວາມໝາຍຄວາມສຳຄັນຂອງກອງປະຊຸມສຸດຍອດອາຊຽນທີ່ ສປປ ລາວ ຈະເປັນເຈົ້າພາບ, ຄວາມໝາຍຄວາມສຳຄັນຂອງວຽກງານການຂ່າວ ແລະ ຄຸ້ມຄອງສື່ມວນຊົນຕ່າງປະເທດ ແລະ ອຳນວຍຄວາມສະດວກດ້ານຕ່າງໆໃຫ້ແກ່ນັກຂ່າວຕ່າງປະເທດ ທີ່ຈະມາເກັບກຳຂ່າວໃນກອງປະຊຸມສຸດຍອດອາຊຽນ ຄັ້ງທີ່ 28, 29 ແລະ ກອງປະຊຸມທີ່ກ່ຽວຂ້ອງອື່ນໆ ທີ່ ສປປ ລາວ ເປັນປະທານ ໃນລະຫວ່າງວັນທີ 6-8 ກັນຍາ 2016 ທີ່ຈະມາເຖິງນີ້. ກອງປະຊຸມແລກປ່ຽນໃນຄັ້ງນີ້, ໄດ້ມີການຜັດປ່ຽນການນຳສະເໜີວຽກງານຕ່າງໆເຊັ່ນ: ວຽກງານພາຫະນະ ແລະ ໂຮງແຮມ, ວຽກງານປະຊາສຳພັນ, ວຽກງານຄຸ້ມຄອງສື່ມວນຊົນຕ່າງປະເທດ ແລະ ຖອດຖອນບົດຮຽນຈາກກອງປະຊຸມຕ່າງໆໃນຜ່ານມາ ເພື່ອກຽມຄວາມພ້ອມຮັບໃຊ້ກອງປະຊຸມສຸດຍອດອາຊຽນ ຄັ້ງທີ 28, 29 ແລະ ກອງປະຊຸມທີ່ກ່ຽວຂ້ອງອື່ນໆ ໃຫ້ປະສົມຜົນສຳເລັດຈົບງາມ.