ທ່ານ ສົງການ ຫຼວງມຸນິນທອນ, ຫົວໜ້າກົມເສດຖະກິດ, ຫົວໜ້າເຈົ້າໜ້າທີ່ອາວຸໂສ ສປປ ລາວ ໄດ້ນໍາພາຄະນະຜູ້ແທນ ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສຟີແລັກ ຄັ້ງທີ 17 (17^th Forum for East Asia-Latin America Coorperation Senior Officials’ Meeting), ຊຶ່ງຈັດຂຶ້ນໃນລະຫວ່າງວັນທີ 24-26 ສິງຫາ 2016, ທີ່ປະເທດ ກົວເຕີມາລາ, ມີບັນດາຄະນະຜູ້ແທນຈາກປະເທດສະມາຊິກ ຟີແລັກ ເຂົ້າຮ່ວມກອງປະຊຸມຄັ້ງນີ້ ຈຳນວນ 36 ປະເທດ ຈາກພາກ​ພື້ນອາຊີຕາເວັນອອກ ແລະ ອາເມລິກາລາຕິນ.

ກອງປະຊຸມເຈົ້າໜ້າທີ່ອາວຸໂສຟີແລັກ ຄັ້ງທີ 17, ໄດ້ດຳເນີນໄປພາຍໃຕ້ການເປັນປະທານ ຂອງປະເທດຜູ້ປະສານງານຮ່ວມ ກົວເຕີມາລາ ແລະ ສາທາລະນະ​ລັດ ເກົາຫລີ. ໃນກອງປະຊຸມຄັ້ງນີ້, ບັນດາຫົວໜ້າເຈົ້າໜ້າທີ່ອາວຸໂສ ໄດ້ປຶກສາຫາລື ແລະ ແລກ ປ່ຽນຄໍາຄິດຄໍາເຫັນ ກ່ຽວກັບ ການປັບປຸງກົນໄກລະບົບການເຮັດວຽກ, ການສ້າງຟີແລັກໃຫ້ມີຄວາມເຂັ້ມແຂງ, ການຍົກສູງບົດບາດ, ການຕີລາຄາຄວາມຄືບໜ້າ ແລະ ທົບທວນຄຶນ ບັນດາໂຄງການ ແລະ ຂໍ້ລິເລີ່ມກິດຈະກໍາຂອງການຮ່ວມມືຟີແລັກ ສົກປີ 2015-2016ໂດຍຜ່ານ 4 ໜ່ວຍງານຍ່ອຍຟີແລັກ (1.ໜ່ວຍງານສັງຄົມການເມືອງ ແລະ ການພັດທະນາແບບຍືນຍົງ, 2. ໜ່ວຍງານການຄ້າ, ລົງທຶນ, ທ່ອງທ່ຽວ ແລະ ວິສາຫະກິດຈຸລະພາກ ຂະໝາດນ້ອຍ ແລະ ກາງ, 3. ໜ່ວຍງານ ວັດທະນະທໍາ, ຊາວໜຸ່ມ, ບົດບາດຍິງຊາຍ ແລະ ກິລາ, 4. ໜ່ວຍງານວິທະຍາສາດ, ເຕັກໂນໂລຊີ, ນະວັດຕະກໍາ ແລະ ການສຶກສາ). ໃນນັ້ນກອງປະຊຸມໄດ້ປຶກສາຫາລືສະເພາະກ່ຽວກັບການປະກອບສ່ວນຂອງຟີແລັກເຂົ້າວາລະການພັດທະນາແບບຍືນຍົງຮອດ ປີ 2030 ໃນກອບອົງການສະຫະປະຊາຊາດ, ການສ້າງລະບົບການຈັດຕັ້ງລະບົບ 3 ຝ່າຍ (Troika System), ການສ້າງກອງທຶນຟີແລັກ, ຄວາມເປັນໄປໄດ້ໃນການຈັດກອງປະຊຸມສຸດຍອດ ແລະ ການກະກຽມກອງປະຊຸມລັດຖະມົນຕີຕ່າງປະເທດຟີແລັກ ຄັ້ງທີ 8ທີ່ຈະຈັດຂຶ້ນໃນປີ 2017 ທີ່ ສ. ເກົາຫຼີ.

ກອງປະຊຸມສຸດຍອດຟີແລັກ ຄັ້ງນີ້, ໄດ້ຮັບຮອງເອົາ ແຜນປະຕິບັດງານໃໝ່ຟີແລັກ ໂດຍຜ່ານ 3 ເສົາຄໍ້າ, ບົດສະເໜີສໍາຫລວດຕິດຕາມໂຄງການຂອງການຮ່ວມມືຟີແລັກ, ການສະເໜີປະເທດຜູ້ປະສານງານໃໝ່ ແລະ ປະເທດປະທານຮ່ວມ (Co-chair) ຂອງກອງປະຊຸມ 4 ໜ່ວຍງານຍ່ອຍ ລະຫວ່າງສອງພາກພື້ນອາຊີ ແລະ ອາເມລິກາລາຕິນ. ຮັບຮອງເອົາບົດສະຫລຸບລາຍງານຂອງກອງປະຊຸມເຈົ້າໜ້າທີ່ອາວຸໂສຟີແລັກ ຄັ້ງທີ 17.

ພິເສດໃນໂອກາດເຂົ້າຮ່ວມກອງປະຊຸມດັ່ງກ່າວຂອງ ສປປ ລາວ ໄດ້ຮັບກຽດຈາກບັນດາປະເທດສະມາຊິກ ຟີແລັກ ໃຫ້ເປັນປະເທດປະສານງານຈາກພາກພື້ນ ອາຊີຕາເວັນອອກ ຕໍ່ໄປ ຈາກ ສ. ເກົາຫຼີ ເຊິ່ງແມ່ນໜ້າທີ່ອັນມີກຽດ, ເພື່ອສືບຕໍ່ການຮັດແໜ້ນການພົວພັນ ​ແລະ ຮ່ວມມືລະຫວ່າງອາຊີຕາເວັນອອກ ແລະ ອາເມລິກາລາຕິນໃຫ້ໄດ້ຮັບການເສີມຂະຫຍາຍຍິ່ງໆຂື້ນ, ທັງເປັນໄລຍະທີ່ຈະຄົບຮອບ 20 ປີ ແຫ່ງການສ້າງຕັ້ງຂອບການຮ່ວມມືດັ່ງກ່າວ.