ໃນວັນທີ 2 ກັນຍາ 2016, ກະຊວງ​ການ​ຕ່າງປະ​ເທດ ໄດ້ຈັດພິທີມອບລາງວັນຊົມເຊີຍ ເງິນສົດຈຳນວນ     9.000.000 ກີບ ໃຫ້ແກ່ທີມຊະນະເລີດການແຂ່ງຂັນ ຖາມ-ຕອບ ຄວາມຮູ້ ກ່ຽວກັບ ອາຊຽນ ລະດັບພາກພື້ນ ຄັ້ງທີ 7 (7^th ASEAN Quiz Regional Level 2016), ຊຶ່ງເປັນກຽດມອບລາງວັນໂດຍ ທ່ານ ພົງສະຫວັນ ສີສຸລາດ, ຫົວໜ້າກົມອາຊຽນ ໂດຍມີຕ່າງໜ້າຈາກບັນດາກົມຕ່າງໆພາຍໃນກະຊວງການຕ່າງປະເທດ ແລະ ບັນດາແຂກທີ່ຖືກ ເຊີນຈາກຄະນະຈັດກິດຈະກຳການແຂ່ງຂັນດັ່ງກ່າວ ​​​ເຂົ້າ​ຮ່ວມ​ໃນ​ພິທີ​ຄັ້ງນີ້ ທີ່ ກະຊວງການຕ່າງປະເທດ.

ກິດຈະກຳການ​ແຂ່ງຂັນດັ່ງກ່າວ ແມ່ນເພືຶ່ອໂຄສະນາເຜີຍແຜ່ ແລະ ສົ່ງເສີມນໍ້າໃຈມິດຕະພາບ ແລະ ຄວາມສາມັກຄີ ລະຫວ່າງ ບັນດາຊາວໜຸ່ມອາຊຽນ ໂດຍຜ່ານເກມການ ແຂ່ງຂັນ ຖາມ-ຕອບ ຊຶ່ງເປັນການສົ່ງເສີມຄວາມຮັບຮູ້ ກ່ຽວກັບ ຄວາມເປັນມາ ແລະ ວິວັດທະນະການທາງດ້ານປະຫວັດສາດ, ສັງຄົມ, ວັດທະນະທຳ, ການເມືອງ ແລະ ເສດຖະກິດ ພາຍໃນຂົງເຂດອາຊີຕາເວັນອອກສ່ຽງໃຕ້. ການ​ແຂ່ງຂັນ​ປະກອບ​ມີ ບັນດາ​ຊາວໜຸ່ມ​ຈາກ 10 ປະ​ເທດອາ​ຊຽນ, ປະ​ເທດ​ລະ 3 ທ່ານ ເຂົ້າຮ່ວມ ​ແລະ ຜົນ​ການ​ແຂ່ງຂັນ​ດັ່ງກ່າວ ​ແມ່ນ​ທີມນັກຮຽນຈາກ ສປປ ລາວ ​ເປັນ​ຜູ້​ຊະນະ​ເລີດ ຄະ​ແນນ​ລວມ 415 ​ແລະ ນັກ​ຮຽນຈາກ​ ປະ​ເທດ​ຟີ​ລິ​ບປິນ ຊະນະ​ອັນ​ດັບ 2 ຄະ​​ແນະ​ລວມ 285 ​ແລະ ນັກ​ຮຽນ​ຈາກ ​ໄທ ຊະນະ​ອັນ​ດັບ 3 ຄະ​ແນນ 270. ທີມນັກຮຽນລາວ ປະກອບມີ ນ. ສິຣິໂສພາ ສິດທິພອນ, ຈາກໂຮງຮຽນ ນິຣະດາ, ນະຄອນຫລວງວຽງຈັນ, ນ. ອັນຕິກາ ໄຊຢາພອນ, ຈາກໂຮງຮຽນ ມສ ປາກເຊ, ແຂວງຈຳປາສັກ ແລະ ທ. ຈັນຈະເລີນ ຣາຊະພົນ, ຈາກໂຮງຮຽນ ມສ ສະຫວັນນະເຂດ, ແຂວງສະຫວັນນະເຂດ. ການມອບລາງວັນຄັ້ງນີ້ ແມ່ນເພື່ອຊຸກຍູ້ຂະບວນຊາວໜຸ່ມເຍົາວະຊົນ ເພື່ອກຳໄດ້ຢ່າງເລິກເຊິ່ງຕໍ່ບົດບາດຂອງ ອາຊຽນ, ບົດບາດ ຂອງ ສປປ ລາວ ກໍຄື ຂະບວນການເຊື່ອມໂຍງພາກພື້ນ ແລະ ສາກົນ ແລະ ທັງເປັນການສຶບຕໍ່ສົ່ງເສີມປູກຈິດສຳນຶກ ແລະ ສ້າງຄວາມຮູ້ຄວາມເຂົ້າໃຈໃຫ້ແກ່ ຊາວໜຸ່ມ, ນັກຮຽນ-ນັກສຶກສາ, ປະຊາຊົນ ແລະ ພະນັກງານ ກ່ຽວກັບ ວຽກງານອາຊຽນ ໃຫ້ຫລາຍຂຶ້ນ. ນອກຈາກນີ້, ກໍເປັນການໂຄສະນາເຜີຍແຜ່ ກ່ຽວກັບ ການເຄື່ອນໄຫວວຽກງານອາຊຽນ ໃນໄລຍະ ທີ່ ສປປ ລາວ ເປັນປະທານໜູນວຽນ ອາຊຽນ ໃນປີ 2016 ນີິ້.