ໃນໂອກາດ ຄົບຮອບ 71 ປີ ວັນການທູດລາວ, 12 ຕຸລາ 1945, ກະຊວງການຕ່າງປະເທດໄດ້ຈັດໃຫ້ພະນັກງານກະຊວງການຕ່າງປະເທດ, ຄູ-ອາຈານ ແລະ ນັກສຶກສາພາກວິຊາພົວພັນສາກົນ, ຄະນະນິຕິສາດ ລັດຖະສາດ, ມະຫາວິທະຍາໄລແຫ່ງຊາດ ເຂົ້າຢ້ຽມຊົມຫ້ອງມູນເຊື້ອການເຄື່ອນໄຫວວຽກງານຕ່າງປະເທດ ໃນວັນທີ 12 ຕຸລາ 2016 ທີ່ ກະຊວງການຕ່າງປະເທດ.
ຈຸດປະສົງຂອງການເປີດໃຫ້ພະນັກງານກະຊວງການຕ່າງປະເທດ, ຄູ-ອາຈານ ແລະ ນັກສຶກສາ ເຂົ້າຢ້ຽມຊົມຫ້ອງມູນເຊື້ອການເຄື່ອນໄຫວວຽກງານການຕ່າງປະເທດ ໃນຄັ້ງນີ້ແມ່ນເພື່ອໃຫ້ຮັບຮູ້ເຖິງຜົນງານການຈັດຕັ້ງປະຕິບັດແນວທາງນະໂຍບາຍການຕ່າງປະເທດຂອງພັກ-ລັດກໍຄືຂະແໜງການຕ່າງປະເທດໃນແຕ່ລະໄລຍະ, ເຫັນໄດ້ຂະບວນການເຄື່ອນໄຫວຕໍ່ສູ້ໃນໄລຍະເຮັດການປະຕິວັດຊາດ ປະຊາທິປະໄຕເພື່ອປົດປ່ອຍປະເທດຊາດຊຶ່ງເປັນການເຄື່ອນໄຫວຕໍ່ສູ້ທາງດ້ານການເມືອງ, ການທູດທີ່ແຫຼມຄົມຂອງພັກ-ລັກ ໄປຄຽງຄູ່ກັບການຕໍ່ສູ້ຢ່າງດຸເດືອດຂ້ຽວຂາດທາງດ້ານການທະຫານທີ່ເຕັມໄປດ້ວຍການເສຍສະຫຼະເລືອດເນື້ອ ຊີວິດຂອງນັກຮົບປະຕິວັດທີ່ນັບບໍ່ຖ້ວນ, ຊຶ່ງໄດ້ເຮັດໃຫ້ການປະຕິວັດລາວສາມາດສ້າງໜ້າປະຫວັດສາດອັນໃໝ່ທີ່ສາກົນຍ້ອງຍໍຊົມເຊີຍ, ອັນເປັນພື້ນຖານອັນໜັກແໜ້ນໃຫ້ແກ່ການລຸກຮື້ຂຶ້ນຢຶດອຳນາດແບບ “ບົວບໍ່ຊ້ຳນ້ຳບໍ່ຂຸ່ນ” ແລະໄດ້ສະຖາປະນາເປັນປະເທດ ສາທາລະນະລັດ ປະຊາທິປະໄຕ ປະຊາຊົນລາວ ຢ່າງສະຫງ່າຜ່າເຜີຍ, ເປີດສັງກາດໃໝ່ແຫ່ງຄວາມເປັນເອກະລາດ, ເປັນເຈົ້າຕົນເອງ ຂອງປະຊາຊົນລາວບັນດາເຜົ່າ.ພ້ອມນີ້,ຫ້ອງມູນເຊື້ອຍັງສະແດງໃຫ້ເຫັນຜົນງານການປະກອບສ່ວນຂອງບັນດາການນຳຂັ້ນສູງຂອງພັກ-ລັດ, ບັນດາພະນັກງານການທູດແລະ ຂະແຫນງການຕ່າງໆໃນການປະຕິບັດສອງໜ້າທີ່ຍຸດທະສາດຄື: ປົກປັກຮັກສາແລະສ້າງສາປະເທດຊາດ, ໂດຍປະຕິບັດຕາມແນວທາງການຕ່າງປະເທດສັນຕິພາບ, ເອກະລາດ, ມິດຕະພາບແລະການຮ່ວມມືຢ່າງສະເໝີຕົ້ນສະເໝີປາຍເປີດກວ້າງການພົວພັນຮ່ວມມື ແບບຫຼາຍທິດ, ຫຼາຍຝ່າຍ ແລະ ຫຼາຍຮູບແບບ ຕາມທິດນຳ “ເພີ່ມມິດຫຼຸດຜ່ອນສັດຕູ” ຊຶ່ງໄດ້ເຮັດໃຫ້ບົດບາດ, ອິດທິພົນແລະຊື່ສຽງຂອງສປປ ລາວສູງເດັ່ນຂຶ້ນໃນເວທີພາກພື້ນແລະສາກົນ.