ເພື່ອ​ເປັນ​ການ​ເສີມ​ຂະຫຍາຍການ​ພົວພັນ​ຮ່ວມ​ມື​ອັນ​ດີງາມ​ ລະຫວ່າງ ສະຫະພັນ​ແມ່ຍິງ​ ກະຊວງ​ການ​ຕ່າງປະ​ເທດ ສປປ ລາວ ​ແລະ ສະຫະພັນ​ແມ່ຍິງ ​ກະຊວງ​ການ​ຕ່າງປະ​ເທດ ສສ. ຫວຽດນາມ. ທ່ານ ນາງ ຫງວຽນ ທິ ຫງຽດ ງາ, ພັນ​ລະ​ຍາ​ທ່ານ​ຮອງ​ນາຍົກລັດຖະມົນຕີ, ລັດຖະມົນຕີ​ກະຊວງ​ການ​ຕ່າງປະ​ເທດ ​ແຫ່ງ ສສ. ຫວຽດນາມ ​ໄດ້​ນຳພາ​ຄະນະ​ຜູ້​ແທນ​ສະຫະພັນ​ແມ່ຍິງ​ກະຊວງ​ການ​ຕ່າງປະ​ເທດ ສສ. ຫວຽດນາມ ເດີນທາງ​ມາ​ຢ້ຽມຢາມ ​ແລະ ​ເຮັດ​ວຽກຢູ່ ສປປ ລາວ ​ໃນ​ລະຫວ່າງ​ວັນ​ທີ 17-18 ຕຸລາ 2016.

ໃນ​ວັນ​ທີ 17 ຕຸລາ 2016,​ ທີ່​ກະຊວງ​ການ​ຕ່າງປະ​ເທດ, ​ໄດ້​ມີ​ພິທີ​ພົບ​ປະ​ສອງ​ຝ່າຍ ລະຫວ່າງ ສະຫະພັນ​ແມ່ຍິງ​ກະຊວງ​ການ​ຕ່າງປະ​ເທດ ສປປ ລາວ ນຳ​ໂດຍ​ທ່ານ ນາງ ອາ​ລຸນ​ນີ ກົມມະ​ສິດ,​ ພັນ​ລະ​ຍາ​ທ່ານ​ລັດຖະມົນຕີ​ຕ່າງປະ​ເທດ ສປປ ລາວ, ປະທານ​ກິດ​ຕິ​ມະ​ສັກ​ສະຫະພັນ​ແມ່ຍິງ​ກະຊວງ​ການ​ຕ່າງປະ​ເທດ ​ແລະ ສະຫະ​ພັນ​ແມ່ຍິງ​ກະຊວງ​ການ​ຕ່າງປະ​ເທດ ສສ. ຫວຽດນາມ ນຳ​ໂດຍ​ທ່ານ ນາງ ຫງວຽນ ທິ ຫງວຽດ ງາ, ພັນ​ລະ​ຍາ​ທ່ານ​ຮອງ​ນາຍົກລັດຖະມົນ ຕີ, ລັດຖະມົນຕີ​ກະຊວງ​ການ​ຕ່າງປະ​ເທດ ​ແຫ່ງ ສສ. ຫວຽດນາມ. ​ໃນ​ການ​ພົບ​ປະ ທ່ານ ນາງ ອາ​ລຸນ​ນີ ກົມມະ​ສິດ​ໄດ້ຊົມ​ເຊີຍ ​ແລະ ​ສະ​ແດງຄວາມຍິນ​ດີ​ຕ້ອນຮັບ​ຄະນະຜູ້​ແທນຫະພັນ​ແມ່ຍິງກະຊວງ​ການ​ຕ່າງປະ​ເທດ ສສ. ຫວຽດນາມ; ທັງ​ສອງ​ຝ່າຍ​ໄດ້​ແລກປ່ຽນກັນ​ລາຍ​ງານ​ສະພາບ​​ໂດຍ​ຫຍໍ້​ສະຫະພັນ​ແມ່ຍິງຂອງ​ຕົນ, ບົດບາດ​ຂອງ​ແມ່ຍິງ​ຕໍ່ກັບການ​ເຄື່ອນ​ໄຫວ​ການ​ທູດ​ໃນ​ໄລຍະ​ຜ່ານ​ມາ​​, ​ແລະ ​ແຜນການ​ຮ່ວມ​ມື​ ລະຫວ່າງ ສະຫະພັນ​ແມ່ຍິງ​ສອງ​ກະຊວງ​ການ​ຕ່າງປະ​ເທດ ​ແລະ ການ​ຮ່ວມ​ມືຂອງ​ແມ່ຍິງ ​ໃນ​ກອບອາຊຽນ. ການ​ຢ້ຽມຢາມ​ຂອງ​ຄະນະ​ພັນ​ລະ​ຍາ​ລັດຖະມົນຕີ​ກະຊວງ​ການ​ຕ່າງປະ​ເທດ ​ແມ່ນ​ກົນ​ໄກ​ອັນໜຶ່ງຂອງ​ສອງ​ກະຊວງ​ ​ໃນ​ການ​ຮັດ​ແໜ້ນການ​ຮ່ວມ​ມື ​ແລະ ສົ່ງ​ເສີມ​ການ​ຮ່ວມ​ມື​ຢ່າງ​ໃກ້ຊິດ.

ໃນ​ໂອກາດ​ຢ້ຽມຢາມ​ເຮັດ​ວຽກຢູ່​ລາວ​ຄັ້ງ​ນີ້ ຄະນະ​ຜູ້​ແທນ​ສະຫະພັນ​ແມ່ຍິງ​ກະຊວງ​ການ​ຕ່າງປະ​ເທດ ສສ. ຫວຽດນາມ ຍັງ​ໄດ້​ເຂົ້າ​ຢ້ຽມຂໍ່ານັບ​ທ່ານ ນາງ ຄຳ​ເມີງ ວໍລະ​ຈິດ, ພັນ​ລະ​ຍາ​ທ່ານ​ປະທານ​ປະ​ເທດ ທີ່ ທຳນຽບປະທານ​ປະ​ເທດ;​ ​ເຂົ້າ​ຢ້ຽມຂໍ່ານັບ ທ່ານ ນາງ ນາລີ ສີ​ສຸ​ລິດ,​ ພັນ​ລະ​ຍາ​ທ່ານ​ນາ​ຍົກ​ລັດຖະມົນຕີ ທີ່ ສຳນັກງານ​ນາ​ຍົກ​ລັດຖະມົນຕີ; ​ແລະ ຊົມ​ການ​ແຂ່ງຂັນ​ເຮືອ​ຊ່ວງ ທີ່​ທ່າວັດ​ຈັນ.