ໃນວັນທີ 3 ພະຈິກ 2016, ​ສະຖານ​ເອກ​ອັກຄະລັດຖະທູດ​ແຫ່ງສປປລາວ​ ປະຈໍາ ປະເທດມາເລເຊຍ ​ໄດ້​ຈັດງານລ້ຽງສະ​ເຫລີ​ມສະຫລອງ​ ວັນສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ມາເລເຊຍ ຄົບຮອບ 50 ປີ​ ທີ່ໂຮງແຮມ ເດິຣິດ - ຄາເຕິນ, ນະຄອນຫຼວງ ກົວລາລໍາເປີ, ໂດຍມີ ທ່ານ ດາໂຕະ ດຣ. ອາຊ໌ຣາບ ວາດີ ບິນ ດາໂຕະ ດູຊຸກີ (Dato’ Dr. Asyraf Wajdi Bin Dato’ Dusuki), ສະມາຊິກວຸດທິສະພາ, ຮອງລັດຖະມົນຕີປະຈຳສຳນັກງານນາຍົກລັດຖະມົນຕີ ຕາງໜ້າລັດຖະບານມາເລເຊຍ ເຂົ້າຮ່ວມເປັນແຂກກິຕິມະສັກ, ພ້ອມກັນນັ້ນ ຍັງມີເຈົ້າໜ້າທີ່ຂັ້ນສູງຈາກກະຊວງການຕ່າງປະເທດ, ບັນດາກະຊວງອົງການກ່ຽວຂ້ອງຂອງມາເລເຊຍ, ບັນດາທູດ ອາຊຽນ, ນັກທຸລະກິດທີ່ລົງທຶນຢູ່ລາວ, ບັນດາເພື່ອນມິດທີ່ມີການພົວພັນໃກ້ຊິດກັບສະຖານທູດ, ຕະຫຼອດທັງຄົນເຊື້ອຊາດລາວ ແລະ ນັກສຶກສາລາວຢູ່ມາເລເຊຍ ກໍໄດ້ເຂົ້າຮ່ວມ.

ໂອກາດອັນມີຄວາມໝາຍດັ່ງກ່າວ, ທ່ານ ຫຸມດາວພອນ ສຸກຂະເສີມ, ເອກອັກຄະລັດຖະທູດ ສປປ ລາວ ປະຈຳ ມາເລເຊຍ ແລະ ທ່ານ ດາໂຕະ ດຣ. ອາຊ໌ຣາບ ວາດີ ບິນ ດາໂຕະ ດູຊຸກີ ກໍໄດ້ຜັດປ່ຽນກັນຂຶ້ນກ່າວຄຳເຫັນ ເຊິ່ງທັງສອງຝ່າຍໄດ້ຕີລາຄາຕໍ່ຜົນສຳເລັດແຫ່ງການພົວພັນຮ່ວມມືລະຫວ່າງສອງລັດຖະບານ ກໍຄື ປະຊາຊົນສອງຊາດ ລາວ-ມາເລເຊຍ, ເຊິ່ງໃນໄລຍະ 50 ປີຜ່ານມາ, ສາຍພົວພັນມິດຕະພາບ ແລະ ການຮ່ວມມືອັນດີລະຫວ່າງສອງປະເທດແມ່ນໄດ້ຮັບການເສີມສ້າງ ແລະ ຂະຫຍາຍຕົວຢ່າງຕໍ່ເນື່ອງບົນພື້ນຖານຄວາມໄວ້ເນື້ອເຊື່ອໃຈ, ເຄົາລົບເຊິ່ງກັນແລະກັນ, ຄວາມປາຖະໜາດີ ແລະ ຄວາມເຂົ້າອົກເຂົ້າໃຈ, ເຊິ່ງສະແດງອອກໃນການພົວພັນຮ່ວມມືທາງດ້ານການເມືອງ, ການທະຫານ, ເສດຖະກິດ, ວັດທະນະທຳ, ການສຶກສາ ແລະ ກິລາ, ການພົວພັນຢ່າງໃກ້ຊິດ ລະຫວ່າງ ປະຊາຊົນສອງຊາດ ແລະ ການແລກປ່ຽນການຢ້ຽມຢາມຂອງຜູ້ນຳຂັ້ນສູງ ແລະ ລະຫວ່າງບັນດາກະຊວງຂະແໜງການຕ່າງໆຂອງສອງປະເທດ.

ທັງສອງຝ່າຍຕ່າງກໍສະແດງຄວາມມຸ້ງຫວັງທີ່ຈະສືບຕໍ່ເສີມສ້າງ ແລະ ຮັດແໜ້ນສາຍພົວ ພັນມິດຕະພາບ ແລະ ການຮ່ວມມືອັນດີ ລະຫວ່າງ ສອງປະເທດ ລາວ-ມາເລເຊຍ ໃຫ້ນັບມື້ແຕກດອກອອກຜົນ ແລະ ເຕີບໃຫຍ່ຂະຫຍາຍຕົວຍິ່ງໆຂຶ້ນໃນຕໍ່ໜ້າ ເພື່ອຜົນປະໂຫຍດຮ່ວມກັນຂອງສອງປະເທດ, ຄວາມຢູ່ດີກິນດີຂອງປະຊາຊົນສອງຊາດ ແລະ ເພື່ອສັນຕິພາບ, ສະຖຽນລະພາບ, ມິດຕະພາບ ແລະ ການຮ່ວມມືເພື່ອການພັດທະນາໃນພາກພື້ນ ແລະ ໃນໂລກ.