ວັນທີ 29 ພະຈິກ 2016, ທ່ານ ຫງວຽນ ຕັດ ທັນ (Nguyen Tat Thanh), ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ສັງຄົມນິຍົມ ຫວຽດນາມ ປະຈຳ ຣາຊະອານາຈັກໄທ ພ້ອມດ້ວຍຄະນະໄດ້ເຂົ້າອວຍພອນ ເອກອັກຄະລັດຖະທູດ ຫລີ ບຸນຄຳ້ ເນື່ອງໂອກາດສະເຫຼີມວັນຊາດທີ່ 2 ທັນວາ ຄົບຮອບ 41 ຂອງ ສປປ ລາວ ( 2 ທັນວາ 1975 - 2 ທັນວາ 2015).
ໃນໂອກາດອັນເປັນມົງຄຸນນີ້, ທ່ານເອກອັກຄະລັດຖະທູດຫວຽດນາມໄດ້ກ່າວສະແດງຄວາມຍ້ອນຍໍຊົມເຊີຍຕໍ່ຜົນງານທີ່ ສປປ ລາວ ຍາດມາໄດ້ໃນໄລຍະ41 ປີຜ່ານມາພາຍໃຕ້ການນຳພາທີ່ສະຫຼາດສ່ອງໃສຂອງພັກປະຊາຊົນ ປະຕິວັດລາວ, ຕີລາຄາສູງສາຍພົວພັນພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ລັດ ແລະ ປະຊາຊົນສອງຊາດ ຫວຽດນາມ ແລະ ລາວ ຕະຫຼອດໄລຍະຜ່ານມາ; ອວຍພອນອັນປະເສີດໃຫ້ແກ່ການນຳພັກ-ລັດ ແລະ ປະຊາຊົນລາວບັນດາເຜົ່າເວົ້າລວມ, ເວົ້າສະເພາະແມ່ນ ທ່ານເອກອັກຄະລັດຖະທູດລາວ ແລະ ພະນັກງານທັງໝົດຈົ່ງມີແຕ່ຄວາມສຸກໂຊກດີຍາດໄດ້ຜົນງານອັນໃໝ່ໃນຊຸມປີຕໍ່ໜ້າ.
ໃນໂອກາດດຽວກັນ, ທ່ານ ຫລີ ບຸນຄ້ຳ ໄດ້ຕາງໜ້າໃຫ້ພະນັກງານທັງໝົດພາຍໃນສະຖານທູດ ກ່າວສະແດງຄວາມຂອບໃຈມາຍັງທ່ານທູດຫວຽດນາມ ແລະ ຄະນະທີ່ມາອວຍພອນແລະເຫັນໄດ້ຜົນສຳເລັດໃນການສ້າງສາພັດທະນາຂອງ ສປປ ລາວ ໃນໄລຍະ 41 ປີຜ່ານມາ, ຂອບໃຈຕໍ່ການສະໜັບສະໜູນ ແລະ ການຊ່ວຍເຫຼືອອັນລ້ຳຄ່າຂອງພັກ-ລັດ ແລະ ປະຊາຊົນຫວຽດນາມເຊິ່ງຕະຫລອດໄລຍະທີ່ຜ່ານມາສອງສະຖານທູດກໍ່ໄດ້ຮ່ວມມື ແລະ ຊ່ວຍເຫຼືອເຊິ່ງກັນ ແລະ ກັນ ເປັນຢ່າງດີ ແລະ ອວຍພອນໃຫ້ສາຍພົວພັນມິດຕະພາບອັນຍິ່ງໃຫຍ່ ແລະ ການຮ່ວມມືຮອບດ້ານຂອງທັງສອງປະເທດຈົ່ງນັບມືນັບໄດ້ຮັບການເພີ່ມພູນຄູນສ້າງໃຫ້ຈະເລີນງອກງາມຂຶ້ນໄປເລື້ອຍໆ.