ໃນວັນ​ທີ 18 ທັນວາທີ່​ຜ່ານ​ມານີ້, ທ່ານ ກິ່ງໂພແກ້ວ ພົມມະຫາໄຊ, ຫົວໜ້າຫ້ອງການສະຖານທູດພ້ອມດ້ວຍ ຄະນະໄດ້ໃຫ້​ກຽດ​ເຂົ້າຮ່ວມ​ງານຮ້ອຍໃຈໄທພວນ ຄັ້ງທີ 33 ທີ່​ຈັດ​ຂຶ້ນ​ທີ່ສະໂມສອນທະຫານ ປືນໃຫ່ຍ ເຂດກຸງເທບມະຫານະຄອນ ໂດຍ ມີ​ທ່ານ​ພ​ົນ​ໂທ ທະ​ນະ​ພັດ ສີ​ຄຸນ​ໄຊ​ພັດ, ປະ​ທານ​ສະ​ມາ​ຄົມ​ໄທ​ພວນ​ແຫ່ງ​ປະ​ເທດ​ໄທ ພ້ອມດ້ວຍພີນ້ອງ ຊາວໄທພວນ ຈາກ 23 ຈັງຫວັດເຂົ້າ​ຮ່ວມ​ຢ່າງ​ຫຼວງ​ຫຼາຍ.

ການ​ຈັດ​ງານ​ຄັ້ງ​ນີ້​ແມ່ນ​ເປັນ​ການ​ເຕົ້າ​ໂຮມ​ຄວາມ​ສາ​ມາ​ຄີ​ສຶບ​ທອດ​ວັດ​ທະ​ນາ​ທຳ​ຂອງ​ຊົນ​ເຜົ່າ​ໄທ​ພວນ​ທີ່​ມີ​ຕົ້ນ​ກຳ​ເນີດ​ບັນ​ພະ​ບຸ​ລຸດ​ຈາກຊາວ​ພວນ​ແຂວງ ຊຽງ​ຂວາງ.

ໃນ​ໂອ​ກາດ​​ດັ່ງ​ກ່າວ, ທ່ານ ກິ່ງ​ໂພ​ແກ້ວ ພົມ​ມະ​ຫາ​ໄຊ ໄດ້​ກ່າວ​ສະ​ແດງ​ຄວາມ​ດີ​ໃຈ ແລະ ຕີ​ລາ​ຄາ​ສູງ​ການ​ຈັດ​ບຸນ​ສຶບ​ທອດ​ປະ​ເພ​ນີ​ວັດ​ທະ​ນາ​ທຳ​ໄທ​ພວນ; ຊົມ​ເຊີຍ​ຄວາມ​ສາ​ມາ​ຄີ ແລະ ​ເຕົ້າ​ໂຮມ​ເປັນ​ປຶກ​ແຜ່ນ​ຂອງ​ເຜົ່າ​ພວນ ທີ່​ມີ​ສະ​ມາ​ຄົມ​ໄທ​ພວນ​ແຫ່ງ​ປະ​ເທດ​ໄທ​ເປັນ​ສູນ​ກາງ​ເຕົ້າ​ໂຮມ​ເພື່ອ​ພ້ອມ​ກັນ​ອ​ະ​ນຸ​ລັກ​ຮັກ​ສົ່ງ​ເສີມ​ຮີດ​ຄອງ​ປະ​ເພ​ນີ​ວັດ​ທະ​ນາ​ທຳ​ອັນ​ດີ​ງາມ​ຂອງ​ບັນ​ພະ​ບຸ​ລຸດ​ເອົາ​ໄວ້​ຢ່າງ​ໝັ້ນ​ຄົງ. ນອກ​ນັ້ນ, ທ່ານ ກິ່ງໂພແກ້ວ ພົມມະຫາໄຊ ຍັງ​ໄດ້​ຖື​ໂອ​ກາດ​ເຊີນ​ຊວນ ພີ​ນ້ອງ​ຊາວ​ພວນ​ຢູ່​ໄທ​ໃຫ້​ໄປ​ຢ້ຽມ​ຢາມ ສ.ປ.ປ ລາວ ໂດຍ​ສະ​ເພາະ​ແຂວງ​ຊຽງ​ຂວາງ​ທີ່​ເປັນ​ຖິ່ນ​ກຳ​ເນີດ​ຂອງ​ບັນ​ພະ​ບຸ​ລຸດ​ຊາວ​ພວນ​ດ້ວຍ.

ໃນ​ງານ​ບຸນ​ດັ່ງ​ກ່າວ​ໄດ້​ມີ​ການ​ສະ​ແດງ​ສີ​ລະ​ປະ​ຂັບ​ລຳ ແລະ ຟ້ອນ​ຂອງ​ຄົນ​ພວນ​ຢ່າງ​ມ່ວນ​ຊື່ນ​ແຕ່​ຕົ້ນ​ຕະ​ຫຼອດ​ປາຍ​ເຊິ່ງ​ສາ​ມາດ​ສະ​ທ້ອນ​ພາບ​ແຫ່ງ​ຄວາມ​ເປັນ​ເອ​ກະ​ລັກ​ການ​ຂັບ​ລຳ-ຟ້ອນ ແລະ ການ​ນຸງ​ຖຶ​ແບບ​ພວນ​ຊຽງ​ຂວາງ​ໄດ້​ດີ​ພໍ​ສົມ​ຄວນ.