ໃນວັນທີ 09 ກຸມພາ 2017, ທ່ານ ຄໍາອິນ ຄິດຈະເດດ, ໄດ້ເຂົ້າຍື່ນສານຕາຕັ້ງຕໍ່ ທ່ານ Michael Moller, ຜູ້ອໍານວຍການໃຫຍ່ ຫ້ອງການ ສປຊ ທີ່ ເຊີແນວ, ເພື່ອດໍາລົງຕໍາແໜ່ງເປັນ ເອກອັກຄະລັດຖະທູດ, ຜູ້ຕາງໜ້າຖາວອນ ແຫ່ງ ສປປ ລາວ ປະຈໍາ ຫ້ອງການ ສປຊ ແລະ ອົງການຈັດຕັ້ງສາກົນອື່ນໆ.
ໃນໂອກາດນີ້, ທ່ານທູດ ຄໍາອິນ ຄິດຈະເດດ ໄດ້ນໍາເອົາຄວາມຢື້ຢາມຖາມຂ່າວຂ ອງທ່ານ ສະເຫລີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ຝາກເຖິງທ່ານ Michael Moller, ພ້ອມທັງໄດ້ສະແດງ ຄວາມຂອບໃຈມາຍັງອົງການ ສປຊ ແລະ ອົງການເຄື່ອຂ່າຍທັງໝົດຂອງ ສປຊ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫລືອລັດຖະບານ ແລະ ປະຊາຊົນລາວ ໃນການພັດທະນາເສດຖະກິດ ແລະສັງຄົມ ໃນໄລຍະຜ່ານມາ ແລະ ຫວັງວ່າ ຈະໄດ້ຮັບການຮ່ວມມື ແລະ ສະໜັບສະໜູນ ຈາກອົງການ ສປຊ ຕໍ່ໄປອີກໃນອະນາຄົດ. ລັດຖະບານ ແຫ່ງ ສປປ ລາວ ໄດ້ໃຫ້ຄວາມສໍາຄັນຕໍ່ຂອບການຮ່ວມມື ແລະ ການເຄື່ອນໄຫວວຽກງານຂອງອົງການ ສປຊ, ໂດຍໄດ້ນໍາເອົາເນື້ອໃນສໍາຄັນຂອງເປົ້າໝາຍການພັດທະນາແບບຍືນຍົງ ຫລາຍກ່ວາ 50 % ເຂົ້າໃນແຜນພັດທະນາເສດຖະກິດ ແລະ ສັງຄົມແຫ່ງຊາດ ຂອງຕົນ. ໃນນີ້, ລັດຖະບານ ແຫ່ງ ສປປ ລາວ ໄດ້ກໍານົດເພີ່ມ ແລະ ຮັບຮອງເປົ້າໝາຍທີ່ 18 ກ່ຽວກັບ ການເກັບກູ້ລະເບີດບໍ່ທັນແຕກ, ເຂົ້າໃນເປົ້າໝາຍການພັດທະນາແບບຍືນຍົງດັ່ງກ່າວ. ຈຸດປະສົງຂອງເປົ້າໝາຍທີ 18 ແມ່ນເພື່ອຫລຸດຜ່ອນຈຳນວນຜູ້ບາດເຈັບຈາກລະເບີດບໍ່ທັນແຕກ, ຊ່ວຍເຫລືອຜູ້ຖືກເຄາະຮ້າຍ ແລະ ເກັບກູ້ລະເບີດ ໃນເນື້ອທີ່ທີ່ສ້າງຜົນປະໂຫຍດໃຫ້ແກ່ປະຊາຊົນທຸກຍາກ. ທ່ານ ບັນກີມູນ, ອະດີດ ເລຂາທິການໃຫຍ່ ອົງການ ສປຊ ໄດ້ເຂົ້າຮ່ວມເປັນສັກຂີພິຍານ ໃນການຮັບຮອງເປົ້າໝາຍທີ 18 ຢ່າງເປັນທາງການ, ໃນໂອກາດ ກອງປະຊຸມສຸດຍອດ ອາຊຽນ-ສປຊ ໃນເດືອນກັນຍາ 2016 ທີ່ຜ່ານມາ. ສຸດທ້າຍ, ທ່ານທູດ ໄດ້ໃຫ້ຄໍາໝັ້ນສັນຍາວ່າ ຕົນຈະສຸມທຸກເຫື່ອແຮງ ເພື່ອສົ່ງເສີມການຮ່ວມມືກັບອົງການ ສປຊ ແລະ ອົງການເຄື່ອຂ່າຍຕ່າງໆທັງໝົດ ຂອງ ສປຊ ທີ່ມີສໍານັກງານຕັ້ງຢູ່ ເຊີແນວ. ທ່ານ Michael Moller ໄດ້ສະແດງຄວາມຊົມເຊີຍ ທ່ານທູດ ຄໍາອິນ ຄິດຈະເດດ ທີ່ໄດ້ຖືກແຕ່ງຕັ້ງມາດໍາລົງຕໍາແໜ່ງເປັນ ເອກະອັກຄະລັດຖະທູດ, ຜູ້ຕາງໜ້າຖາວອນ ແຫ່ງ ສປປ ລາວ ຄົນໃໝ່ ປະຈໍາ ຫ້ອງການ ສປຊ ແລະ ອວຍພອນໃຫ້ທ່ານທູດ ຈົ່ງໄດ້ຮັບຜົນສໍາເລັດໃນການເຄື່ອນໄຫວວຽກງານການທູດ ຢ່າງຈົບງາມ.