ໃນວັນທີ 14 ມີນາ 2017 ນີ້, ທີ່ ໂຮງແຮມລາວພຣາຊາ, ນະຄອນຫຼວງວຽງຈັນ, ເພື່ອສືບຕໍ່ຈັດຕັ້ງຜັນຂະຫຍາຍ ແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີ ກ່ຽວກັບ ການຕົກລົງຂອງທ່ານນາຍົກລັດຖະມົນຕີ ເຫັນດີເປັນປະທານຄະນະຊີ້ນໍາລະດັບຊາດ ໂດຍມີຮອງປະທານ 2 ທ່ານ ຄື: ທ່ານລັດຖະມົນຕີກະຊວງການຕ່າງປະເທດ ເປັນຮອງປະທານ ທັງເປັນຜູ້ປະຈໍາການ ແລະ ທ່ານລັດຖະມົນຕີກະຊວງແຜນການ ແລະ ການລົງທຶນ ເປັນຮອງປະທານຜູ້ທີສອງ,​ ກົມອົງການຈັດຕັ້ງສາກົນ, ກະຊວງການຕ່າງປະເທດ, ໃນນາມກອງເລຂາຄະນະຊີ້ນໍາລະດັບຊາດ ເພື່ອການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ (ປພຍ) ໄດ້ຈັດກອງປະຊຸມບັນດາຈຸດປະສານ ທີ່ມີບັນດາຫົວໜ້າກົມ, ຮອງຫົວໜ້າກົມ ແລະ ວິຊາການຈາກກະຊວງ ແລະ ອົງການທຽບເທົ່າທີ່ກ່ຽວຂ້ອງທັງໝົດ 22 ພາກສ່ວນ ລວມທັງໝົດ 50 ກວ່າທ່ານ. ກອງປະຊຸມ ໄດ້ດໍາເນີນໄປພາຍໃຕ້ການເປັນປະທານຂອງ ທ່ານ ອານຸພາບ ວົງໜໍ່ແກ້ວ,​ ຫົວໜ້າກົມອົງການຈັດຕັ້ງສາກົນ, ທັງເປັນຫົວໜ້າກອງເລຂາຄະນະຊີ້ນໍາລະດັບຊາດເພື່ອການຈັດຕັ້ງປະຕິບັດ ປພຍ ແລະ ມີຄະນະກອງເລຂາ ຮ່ວມເປັນປະທານ ຄື: ທ່ານ ນາງ ພອນວັນ ອຸທະວົງ, ຫົວໜ້າກົມແຜນການ, ກະຊວງ ແຜນການ ແລະ ການລົງທຶນ ແລະ ທ່ານ ນາງ ເພັດສະໝອນ ສອນ, ຫົວໜ້າຫ້ອງການ ສູນສະຖິຕິແຫ່ງຊາດ.

ຈຸດປະສົງຂອງກອງປະຊຸມ ແມ່ນເພື່ອຕິດຕາມການຈັດຕັ້ງປະຕິບັດ ປພຍ ທີ່ຜ່ານມາ ແລະ ປຶກສາຫາລື ກ່ຽວກັບ ກົນໄກການປະສານງານການຈັດຕັ້ງປະຕິບັດເປົ້າໝາຍ ປພຍ ໃນຕໍ່ໜ້າ ໃຫ້ແທດເໝາະກັບເງື່ອນໄຂ ແລະ ສະພາບການຕົວຈິງໃນ ສປປ ລາວ ລວມທັງພິຈາລະນາຕົວຊີ້ວັດແຫ່ງຊາດຂອງເປົ້າໝາຍການພັດທະນາແບບຍືນຍົງ ແລະ ເນື້ອໃນຂອງຮ່າງຂໍ້ຕົກລົງ ວ່າດ້ວຍ ການແຕ່ງຕັ້ງຄະນະຊີ້ນໍາລະດັບຊາດ ເພື່ອການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ, ຄະນະວິຊາການທີ່ເປັນຈຸດປະສານງານ ແລະ ກອງເລຂາຄະນະຊີ້ນໍາລະດັບຊາດ ເພື່ອເປັນນິຕິກໍາໃຫ້ການປະຕິບັດໜ້າທີ່ ແນໃສ່ຮັບປະກັນການເປັນເສນາທິການໃຫ້ແກ່ລັດຖະບານ ພ້ອມທັງປະສານສົມທົບກັບບັນກາຄູ່ຮ່ວມມືທັງພາຍໃນ ແລະ ຕ່າງປະເທດ ໃນການຊຸກຍູ້ຕິດຕາມ ແລະ ລາຍງານ ກ່ຽວກັບ ຄວາມຄືບໜ້າຂອງການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງໃນ ສປປ ລາວ ໃຫ້ໄດ້ຮັບຜົນສໍາເລັດເປັນຢ່າງດີ.

ຜູ້ເຂົ້າຮ່ວມທັງໝົດໄດ້ມີການສົນທະນາປຶກສາຫາລື, ປະກອບຄໍາຄິດເຫັນຢ່າງກົງໄປກົງມາ ກ່ຽວກັບ ການປັບປຸງກົນໄກການປະສານງານ ແລະ ການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ ໃນແຕ່ລະຂະແໜງການ ພ້ອມທັງໃຫ້ມີຄວາມສອດຄ່ອງກັບແຜນພັດທະນາເສດຖະກິດ-ສັງຄົມ ແຫ່ງຊາດ 5 ປິ ຄັ້ງທີ 8, ຍຸດທະສາດການພັດທະນາ ປີ 2025 ແລະ ວິໄສທັດປີ 2030.