ໃນຕອນແລງຂອງວັນ​ທີ່ 28 ເມສາ​ຜ່ານ​ມານີ້, ສາມ​ອົງ​ການ​ຈັດ​ຕັ້ງ​ມະ​ຫາ​ຊົນຂອງ​ສະ​ຖານ​ທູດ​ລາວທີ່​ບາງກອກ, ປະ​ເທດໄທໄດ້​ຈັດ​ໃຫ້​ມີ​ຂະ​ບວນ​ການ​ອອກ​ແຮງ​ງານ​ລວມເພື່ອ​ຄຳ​ນັບ​ຮັບ​ຕ້ອນ​ວັນກຳມະກອນສາກົນຄົບຮອບ 131 ປີ (1/5/1886-1/5/2017).

          ໃນໂອກາດນີ້ ທ່ານ ຫລີ ບຸນຄ້ຳ, ເອກອັກຄະລັດຖະທູດ ໄດ້ໃຫ້ກຽດ ເລົ່າຄືນປະຫວັດຄວາມເປັນມາໂດຍຫຍໍ້ ຂອງວັນກຳມະກອນ 1 ພຶດສະພາ ໂດຍທ່ານ ກ່າວວ່າ ພັກ ແລະ ລັດ ຍາມໃດກໍ່ຢຶດໝັ້ນນ້ຳໃຈລັດທິສາກົນກຳມະຊີບ ໂດຍຖືເອົາ ຊົນຊັ້ນກຳມະກອນ ເປັນແກນກາງໃນການພັດທະນາປະເທດຊາດ ດັ່ງນັ້ນພວກເຮົາຈຶ່ງພ້ອມກັນ ເຫັນຄຸນຄ່າຂອງແຮງງານກຳມະກອນ ແລະ ປົກປ້ອງສິດຜົນປະໂຫຍດອັນຊອບທຳຂອງເຂົາເຈົ້າ. ນອກນີ້ ທ່ານຍັງຮຽກຮ້ອງມາຍັງສະມາຊິກກຳມະ ບານທັງໝົດໃນສະຖານ ທູດຈົ່ງສືບຕໍ່ຝຶກຝົນຫລໍ່ຫລອມຕົນເອງ ໃຫ້ກາຍເປັນກຳລັງແຮງງານ ທີ່ມີລະບຽບວິໃນ ໃນການອອກແຮງງານ, ເສີມຂະຫຍາຍຄຸນລັກສະນະອັນດີເລີດ, ທາດແທ້, ມູນເຊື້ອອັນດີງາມຂອງຊົນຊັ້ນກຳມະກອນລາວ.

          ທ່ານບຸນໄຊ ຈັນເສນາ, ​ຄະນະພັກສະຖານທູດ, ຜູ້ຊີ້ນຳສາມອົງການຈັດຕຈັງມະຫາຊົນ​ທັງ​ເປັນຫົວ​ໜ້າ​ຂະ​ບວນ​ການ​ອອກ​ແຮງ​ງານໄດ້​ກ່າວ​ວ່າ: ການ​ອອກ​ແຮງ​ງານ​ຄັ້ງ​ນີ້ແມ່ນ​ສ່ວນ​ໜື່ງ​ຂອງກິດ​ຈະ​ກຳ​ຂອງ​ອ້າຍ​ນ້ອງ​ພະ​ນັກ​ງານ​ໃນ​ສະ​ຖານ​ທູດເພື່ອ​​ຕ້ອນ​ຮັບ​ພິ​ທີສະ​ເຫຼີມ​ສະ​ຫຼອງວັນສ້າງຕັ້ງກຳມະກອນສາກົນ ຄົບຮອບ 131 ປີ ທີ່ຈະໝູນວຽນມາເຖິງໃນວັນທີ 1 ພືດສາ 2017 ນີ້ ເຊິ່ງ​ແຕ່​ລະ​ປີພວກ​ເຮົາກໍ່​ມີ​ການ​ອອກ​ແຮງ​ງານກ່ອນ​ຮອດ​ວັນສຳຄັນຕ່າງໆ ຂອງ​ຊາດ​ເພື່ອ​ປຸກ​ລະ​ດົມ​ນ້ຳ​ໃຈ​ຮັກ​ຊາດຂອງ​ອ້າຍ​ນ້ອງ​ພະ​ນັກ​ງານໃຫ້​ຟົດ​ຟື້ນ​ຂື້ນກວ່າ​ເກົ່າ.​

          ການ​ອອກ​ແຮງ​ງານ​ແມ່ນປະ​ກອບ​ມີ​ໜ້າ​ວຽກ​ຄື: ອາ​ນາ​ໄມ​ອ້ອມ​ຮອບ​ສະ​ຖານ​ທູດ, ເກັບ​ມ້ຽນ​ວັດ​ຖຸ​ເກົ່າ​ແກ່​ທີ່​ເປ​ເພແລະເກັບມ້ຽນຂີ້ເຫຍືອ. ການ​ອອກ​ແຮງ​ງານ​ແມ່ນ​ມີ​ອ້າຍ​ນ້ອງ​ພາຍ​ໃນ​ສະ​ຖານ​ທູດ​ທັງ​ໝົດ​ປະ​ກອບ​ສ່ວນ​ຢ່າງ​ຟົດ​ຟື້ນ. ນອກຈາກນີ້ຍັງມີຂະບວນການແຂ່ງຂັນກິລາອີກຈຳນວນໜື່ງ ເຊັ່ນຕີບູນ ແລະ ການແຂ່ງຂັນຕີດອກປີກໄກ່.