ໃນວັນທີ 18 ກໍລະກົດ 2017, ສປປ ລາວ ແລະ ອົດສະຕາລີ ໄດ້ຈັດກອງປະຊຸມສົນທະນາດ້ານສິດທິມະນຸດ ຄັ້ງທີ 5 ທີ່ ນະຄອນຫຼວງວຽງຈັນ. ຝ່າຍລາວນຳໂດຍ ທ່ານ ພູໂຂງ ສີສຸລາດ, ຫົວໜ້າກົມສົນທິສັນຍາ ແລະ ກົດໝາຍ, ກະຊວງການຕ່າງປະເທດ ໂດຍມີເຈົ້າໜ້າທີ່ຂັ້ນສູງຈາກ ສະພາແຫ່ງຊາດ, ກະຊວງຍຸຕິທຳ, ກະຊວງປ້ອງກັນຄວາມສະຫງົບ, ສານປະຊາຊົນສູງສຸດ, ສານປະຊາຊົນນະຄອນຫຼວງວຽງຈັນ, ກະຊວງພາຍໃນ, ສູນກາງແນວລາວສ້າງຊາດ, ສູນກາງສະຫະພັນແມ່ຍິງລາວ, ກະຊວງແຮງງານ ແລະ ສະຫວັດດີການສັງຄົມ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ແລະ ບັນດາກົມກ່ຽວຂ້ອງໃນກະຊວງການຕ່າງປະເທດ. ຝ່າຍອົດສະຕາລີ ນຳໂດຍ ທ່ານ ດຣ. ແລກລານ ສຕຣາຮັນ (Lachlan Strahan), ຜູ້ຊ່ວຍລັດຖະມົນຕີ, ຫົວໜ້າກົມນະໂຍບາຍຫຼາຍຝ່າຍ, ກະຊວງການຕ່າງປະເທດ ແລະ ການຄ້າ ພ້ອມດ້ວຍເຈົ້າໜ້າທີ່ຂັ້ນສູງຈາກ ກະຊວງການຕ່າງປະເທດ ແລະ ການຄ້າ, ຄະນະກຳມາທິການສິດທິມະນຸດອົດສະຕຣາລີ, ທ່ານ ຈອນ ວິນລຽມ, ເອກອັກຄະລັດຖະທູດອົດສະຕຣາລີ ແລະ ພະນັກງານສະຖານທູດອົດສະຕຣາລີປະຈຳລາວ ເຂົ້າຮ່ວມ.

ໃນກອງປະຊຸມດັ່ງກ່າວ ສອງຝ່າຍໄດ້ແລກປ່ຽນຫຼາຍຫົວຂໍ້ ກ່ຽວກັບ ການສົ່ງເສີມ ແລະ ປົກປ້ອງສິດທິມະນຸດ ທີ່ສອງຝ່າຍມີຄວາມສົນໃຈ ເຊັ່ນ: ຄວາມຄືບໜ້າໃນການປະຕິບັດສິດທິມະນຸດ ຢູ່ ສປປ ລາວ ແລະ ອົດສະຕຣາລີ, ການຕ້ານການຈຳແນກເຊື້ອຊາດ, ສິດທິແມ່ຍິງ ແລະ ເດັກນ້ອຍ, ຄົນພິການ, ການເຂົ້າເຖິງຂະບວນຍຸຕິທຳ, ການປົກຄອງລັດດ້ວຍກົດໝາຍ, ເສລີພາບໃນການສະແດງຄວາມຄິດເຫັນ, ນະໂຍບາຍຊົນເຜົ່າ, ເສລີພາບດ້ານສາສະໜາ, ການປະຕິບັດຂໍ້ສະເໜີແນະການທົບທວນປະຈຳໄລຍະ UPR, ການສ້າງຕັ້ງສະມາຄົມ, ສິດທິຂອງຜູ້ອົບພະຍົບ,        ຜູ້ເຄື່ອນຍ້າຍຖິ່ນຖານ, ສະພາບເງື່ອນໄຂຄ້າຍຄຸມຂັງ-ດັດສ້າງ ແລະ ສິດທິດ້ານທີ່ດິນ ຢູ່ ສປປ ລາວ ແລະ ອົດສະຕຣາລີ ແລະ ຫົວຂໍ້ອື່ນໆອີກ ກ່ຽວກັບ ການປົກປ້ອງ ແລະ ສົ່ງເສີມ ສິດທິມະນຸດ.

ກອງປະຊຸມສົນທະນາດັ່ງກ່າວໄດ້ດຳເນີນໄປດ້ວຍບັນຍາກາດກົງໄປກົງມາ ກ່ຽວກັບ ການປະຕິບັດສິດທິມະນຸດ ອີງຕາມພັນທະສາກົນ, ລັດຖະທຳມະນູນ, ກົດໝາຍ ແລະ ບົນພື້ນຖານເງື່ອນໄຂຈຸດພິເສດຂອງແຕ່ລະປະເທດ. ການສົນທະນາດ້ານສິດທິມະນຸດ ໄດ້ເຮັດໃຫ້ສອງປະເທດມີຄວາມເຂົ້າອົກເຂົ້າໃຈເຊິ່ງກັນ ແລະ ກັນຫຼາຍຂຶ້ນຕື່ມ ອັນເປັນການປະກອບສ່ວນເພີ່ມທະວີການພົວພັນ ແລະ ຮ່ວມມື ລະຫວ່າງສອງປະເທດ ສປປ ລາວ-ອົດສະຕຣາລີ ເຊິ່ງໃນປີ 2017 ສອງປະເທດສະເຫຼີມສະຫຼອງການສ້າງຕັ້ງສາຍພົວພັນການທູດ ຄົບຮອບ 65 ປີ.

ສ່ວນໃນວັນທີ 19 ກໍລະກົດ 2017 ທັງສອງຝ່າຍໄດ້ຮ່ວມກັນຈັດຕັ້ງກອງປະຊຸມສໍາມະນາ ກ່ຽວກັບ ການມີສ່ວນຮ່ວມໃນສັງຄົມ ໂດຍການເປັນກຽດເຂົ້າຮ່ວມຂອງ ທ່ານ ບຸນເກີດ ສັງສົມສັກ, ລັດຖະມົນຕີປະຈຳສຳນັກງານນາຍົກລັດຖະມົນຕີ, ປະທານຄະນະຊີ້ນຳລະດັບຊາດໃນການປະສານງານດ້ານສິດທິມະນຸດ, ທ່ານ ດຣ. ແລກລານ ສຕຣາຮັນ, ຜູ້ຊ່ວຍລັດຖະມົນຕີ, ຫົວໜ້າກົມນະໂຍບາຍຫຼາຍຝ່າຍ, ກະຊວງການຕ່າງປະເທດ ແລະ ການຄ້າ, ທ່ານ ດຣ. ທິມ ສຸດພົມມະສານ, ກຳມາທິການຕ້ານການຈຳແນກເຊື້ອຊາດຂອງຄະນະກຳມາທິການສິດທິມະນຸດ    ອົດສະຕຣາລີ, ມີການເຂົ້າຮ່ວມຂອງຄະນະຝ່າຍລາວ ແລະ ຄະນະຝ່າຍອົດສະຕຣາລີ ໃນການສົນທະນາດ້ານສິດທິມະນຸດ ຄັ້ງທີ 5, ຜູ້ຕາງໜ້າຈາກ ບັນດາກະຊວງ ແລະ ອົງການລັດທີ່ກ່ຽວຂ້ອງ, ພາກເອກະຊົນ, ອົງການຈັດຕັ້ງສາກົນ, ອົງການຈັດຕັ້ງສາກົນທີ່ບໍ່ຂຶ້ນກັບລັດຖະບານ, ອົງການຈັດຕັ້ງທາງສັງຄົມຂອງ ສປປ ລາວ 80 ກວ່າທ່ານ.

ໃນກອງປະຊຸມສຳມະນາ ຜູ້ເຂົ້າຮ່ວມໄດ້ແລກປ່ຽນ ກ່ຽວກັບ ຄວາມຫຼາກຫຼາຍ ແລະ ການມີສ່ວນຮ່ວມໃນສັງຄົມ, ນະໂຍບາຍການຕ້ານການຈຳແນກເຊື້ອຊາດ, ການສົ່ງເສີມຄວາມສະເໝີພາບ, ການມີສ່ວນຮ່ວມຂອງທຸກເຊື້ອຊາດ, ຊົນເຜົ່າ, ແມ່ຍິງ, ຄົນພິການ ແລະ ກຸ່ມຄົນອ່ອນໄຫວອື່ນໆ ເຂົ້າໃນຊີວິດສັງຄົມ ລວມທັງເຂົ້າໃນວຽກງານທາງດ້ານການເມືອງ, ເສດຖະກິດ, ວັດທະນະທຳ-ສັງຄົມ ຢູ່ ອົດສະຕຣາລີ ແລະ ສປປ ລາວ.

ພ້ອມດຽວກັນນີ້, ກະຊວງການຕ່າງປະເທດ ແລະ ສະຖານທູດອົດສະຕຣາລີ ປະຈຳລາວ ໄດ້ຈັດຕັ້ງພິທີເປີດໂຄງການຮ່ວມມືວິຊາການດ້ານສິດທິມະນຸດ ສຳລັບປີ 2017-2021 ໂດຍແມ່ນລັດຖະບານອົດສະຕຣາລີ ໃຫ້ການຊ່ວຍເຫຼືອແກ່ລັດຖະບານ ສປປ ລາວ ໂດຍຜ່ານຄະນະກຳມາທິການສິດທິມະນຸດອົດສະຕຣາລີ ເປັນມູນຄ່າ 8 ແສນກວ່າໂດລາອົດສະຕຣາລີ. ໂຄງການດັ່ງກ່າວ ຈະຊ່ວຍສ້າງຄວາມສາມາດໃຫ້ແກ່ເຈົ້າໜ້າທີ່ ສປປ ລາວ ໃນການສຶກສາຄົ້ນຄວ້າສົນທິສັນຍາສາກົນດ້ານສິດທິມະນຸດ, ການຈັດຕັ້ງປະຕິບັດພັນທະສາກົນດ້ານສິດທິມະນຸດ, ການເຂົ້າຮ່ວມກອງປະຊຸມລະດັບພາກພື້ນ ແລະ ສາກົນ ແລະ ການສຶກສາດ້ານສິດທິມະນຸດ ຢູ່ຂັ້ນມະຫາວິທະຍາໄລ.