ຫວ່າງບໍ່ດົນຜ່ານມານີ້, ທ່ານ ຄໍາອິນ ຄິດຈະເດດ ໄດ້ເຂົ້າຍື່ນສານຕາຕັ້ງຕໍ່ ພະນະທ່ານ ນາງ Doris Leuthard, ປະທານາທິບໍດີ ແຫ່ງສະມາພັນທະລັດສະວິດ ທີ່ ນະຄອນຫຼວງເບີນ, ເພື່ອດໍາລົງຕໍາແຫຼ່ງເປັນເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ສປປ ລາວ ປະຈໍາ ສະມາພັດທະລັດສະວິດ, ໂດຍຊ້ອງໜ້າຜູ້ຕາງໜ້າລັດຖະບານສະວິດ ແລະ ພະນັກງານການທູດຈາກສະຖານທູດລາວ ທີ່ເຊີແນວ.
ພາຍຫຼັງພິທີຍື່ນສານຕາຕັ້ງ, ທ່ານທູດລາວຄົນໃໝ່ກໍ່ໄດ້ພົບປະໂອ້ລົມກັບ ທ່ານ ນາງ Doris Leuthard ດ້ວຍບັນຍາກາດອັນສະໜິດສະໜົມ ແລະ ໄດ້ນໍາເອົາຄວາມຢື້ຢາມຖາມຂ່າວອັນອົບອຸ່ນ, ພອນໄຊອັນປະເສີດ ແລະ ຄວາມຮັກແພງຖານເພື່ອນມິດຈາກ ພະນະທ່ານ ບຸນຍັງ ວໍລະຈິດ, ປະທານປະເທດແຫ່ງ ສປປ ລາວ ສົ່ງເຖິງ ທ່ານ ນາງ Doris Leuthard ແລະ ຜ່ານພະນະທ່ານໄປຍັງລັດຖະບານ ແລະ ປະຊາຊົນສະວິດທຸກຖ້ວນໜ້າ.
ໃນໂອກາດນີ້, ທ່ານທູດກໍ່ໄດ້ແຈ້ງໂດຍຫຍໍ້ກ່ຽວກັບການພັດທະນາເສດຖະກິດ-ສັງຄົມຂອງ ສປປ ລາວ, ລວມທັງການຜັນຂະຫຍາຍເປົ້າໝາຍການພັດທະນາທີ່ຍນຍົງ ແລະ ເປົ້າໝາຍການພັດທະນາທີ່ຈະນໍາເອົາປະເທດຫຼຸດພົ້ນອອກຈາກຄວາມດ້ອຍພັດທະນາໃນປີ 2020; ໄດ້ສະແດງຄວາມຂອບໃຈຕໍ່ການຊ່ວຍເຫຼືອຂອງລັດຖະບານ ແລະ ປະຊາຊົນສະວິດໃຫ້ແກ່ ສປປ ລາວ ໃນໄລຍະຜ່ານມາ, ເຊິ່ງເປັນການປະກອບສ່ວນອັນສໍາຄັນເຂົ້າໃນການພັດທະນາເສດຖະກິດ-ສັງຄົມ ກໍ່ຄືການຫຼຸດຜ່ອນຄວາມທຸກຍາກຂອງ ສປປ ລາວ; ທ່ານທູດໄດ້ໃຫ້ຄໍາໝັ້ນສັນຍາໃນການປະຕິບັດໜ້າທີ່ການທູດຂອງຕົນ ເພື່ອຊຸກຍູ້ສົ່ງເສີມສາຍພົວພັນມິດຕະພາບ ແລະ ການຮ່ວມມືອັນດີລະຫວ່າງ ສະມາພັນທະລັດສະວິດ ແລະ ສປປ ລາວ ແລະ ເພີ່ມທະວີການຮ່ວມມືຂອງສອງປະເທດໃຫ້ມີບາດກ້າວຂະຫຍາຍຕົວໃນຕໍ່ໜ້າ.
ໃນໂອກາດດັ່ງກ່າວ, ທ່ານ ນາງ Doris Leuthard ກໍໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ການມາດໍາລົງຕໍາແໜ່ງຂອງທ່ານເອກອັກຄະລັດຖະທູດແຫ່ງ ສປປ ລາວ ປະຈໍາສະມາພັນທະລັດສະວິດຄົນໃໝ່; ໄດ້ສະແດງຄວາມຊົມເຊີຍຕໍ່ລັດຖະບານແຫ່ງ ສປປ ລາວ ທີ່ມີການເຕີບໃຫຍ່ຂະຫຍາຍຕົວທາງດ້ານການພັດທະນາເສດຖະກິດສັງຄົມ ແລະ ສາມາດຮັກສາລະດັບການເຕີບໂຕທາງເສດຖະກິດໃນລະດັບສະເລ່ຍ 8% ຕໍ່ປີ; ສະເໜີໃຫ້ມີການສືບຕໍ່ພົບປະກັບພາກສ່ວນທີ່ກ່ຽວຂ້ອງໃນການສືບຕໍ່ການຮ່ວມມືໃນຂະແໜງການຕ່າງໆ ແລະ ໄດ້ສະແດງຄວາມເຊື່ອໝັ້ນວ່າ ການພົວພັນມິດຕະພາບ ແລະ ການຮ່ວມມືອັນດີລະຫວ່າງສອງປະເທດ ຈະມີການຂະຫຍາຍຕົວໃນຕໍ່ໜ້າ. ທ່ານ ນາງ Doris Leuthard ໄດ້ສົ່ງຄວາມຢື້ຢາມຖາມຂ່າວ ແລະ ຄວາມຮັກແພງມາຍັງ ປະທານປະເທດແຫ່ງ ສປປ ລາວ ແລະ ປະຊາຊົນລາວທຸກທົ່ວໜ້າ.
ການຍື່ນສານ ແລະ ພົບປະລະຫວ່າງ ທ່ານ ນາງ Doris Leuthard ແລະ ທ່ານເອກອັກຄະລັດຖະທູດແຫ່ງ ສປປ ລາວ ໃນຄັ້ງນີ້ ໄດ້ດໍາເນີນໄປດ້ວຍໄມຕີຈິດມິດຕະພາບຄວາມອົບອຸ່ນ ແຕ່ຕົ້ນຕະຫຼອດປາຍ. ສະມາພັນທະລັດສະວິດ ແລະ ສປປ ລາວ ສ້າງຕັ້ງສາຍພົວພັນການທູດນໍາກັນໃນວັນທີ 03 ກັນຍາ 1957.