ໃນຕອນເຊົ້າຂອງວັນທີ 29 ສິງຫາ 2017 ທີ່ ໂຮງແຮມ ຄຣາວພາຊາ, ກົມ ຈສກ, ກະຊວງການຕ່າງປະເທດ ໃນນາມກອງເລຂາຄະນະຊີ້ນໍາລະດັບຊາດ ເພື່ອການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ (ປພຍ) ໄດ້ຈັດກອງປະຊຸມຝຶກອົບຮົມຄະນະວິຊາການຈຸດປະສານງານສຳລັບການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ ຢູ່ ສປປ ລາວ, ເຊິ່ງມີບັນດາຜູ້ຕາງໜ້າຈາກກອງເລຂາຄະນະຊີ້ນໍາລະດັບຊາດເພື່ອຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ (ປພຍ), ຈຸດປະ ສານງານຈາກບັນດາກະຊວງ ແລະ ຂະແຫນງການທີ່ກ່ຽວຂ້ອງເຂົ້າຮ່ວມລວມທັງໝົດ 50 ກວ່າທ່ານ.
ຈຸດປະສົງຕົ້ນຕໍຂອງກອງປະຊຸມ ແມ່ນເພື່ອພ້ອມກັນສືບຕໍ່ປຶກສາຫາລື ກ່ຽວກັບການຈັດຕັ້ງປະຕິບັດຜົນຂອງກອງປະຊຸມຄັ້ງປະຖົມມະລຶກຂອງຄະນະຊີ້ນຳລະດັບຊາດ ເພື່ອຈັດຕັ້ງປະຕິບັດ ປພຍ ໃນວັນທີ 10 ສິງຫາ 2017 ທີ່ຜ່ານມາ. ໂດຍສະເພາະລົງເລີກລາຍລະອຽດ ກ່ຽວກັບກົນໄກ ແລະ ແຜນດຳເນີນງານ ສຳລັບການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ ຮອດປີ 2030. ລວມທັງການກະກຽມເຮັດບົດລາຍງານແຫ່ງຊາດ ແບບສະໝັກໃຈ ເພື່ອລາຍງານຄວາມຄືບໜ້າການຈັດຕັ້ງປະ ຕິບັດເປົ້າໝາຍການພັດທະນາແບບຍືນຍົງຂອງ ສປປ ລາວ ໃນກາງປີ 2018 ຢູ່ອົງການ ສປຊ ທີ່ ນິວຢອກ.
ໃນກອງປະຊຸມຄັ້ງນີ້, ຜູ້ເຂົ້າຮ່ວມ ໄດ້ຮັບຟັງການສະເຫນີ ກ່ຽວກັບ ແຜນດຳເນີນງານແຫ່ງຊາດ ໃນການຈັດຕັ້ງປະຕິ ບັດເປົ້າໝາຍການພັດທະນາແບບຍືນຍົງ, ການກຳນົດຕົວຊີ້ບອກແຫ່ງຊາດ ແລະ ການດຳເນີນວຽກງານເກັບກຳຂໍ້ມູນ ແລະ ສະຖິຕິ ກໍ່ຄືຄຳແນະນຳກ່ຽວກັບການຮ່າງບົດລາຍງານແຫ່ງຊາດ ແບບສະໝັກໃຈ, ໃນນັ້ນ, ຜູ້ເຂົ້າຮ່ວມກໍ່ໄດ້ປຶກສາຫາລື ແລະ ປະກອບຄຳຄິດເຫັນຕໍ່ແຜນດຳເນີນງານດັ່ງກ່າວ ໂດຍເນັ້ນໃສ່ກົນໄກການຈັດຕັ້ງປະຕິບັດແຜນການຂອງຂະແໜງການຕ່າງໆ ກໍ່ຄືການເກັບກຳຂໍ້ມູນທາງດ້ານສະຖິຕິ, ການກຳນົດຕົວຊີ້ບອກ ແລະ ການເຮັດບົດລາຍງານປະຈຳປີ ເພື່ອກະກຽມໃສ່ບົດລາຍ ງານແຫ່ງຊາດ ໃນແຕ່ລະໄລຍະໃຫ້ໄດ້ຮັບຜົນດີ.