ໃນໂອກາດເຄື່ອນໄຫວຢ້ຽມຢາມທາງລັດຖະກິດ ສປປ ລາວ ລະຫວ່າງວັນທີ 13-14 ພະຈິກ 2017 ນີ້, ໃນເວລາ 10.00 ໂມງຂອງວັນທີ 14 ພະຈິກ 2017, ສະຫາຍ ສີ ຈິ້ນຜິງ, ເລຂາທິການໃຫຍ່ຄະນະກຳ ມະການສູນກາງພັກກອມມູນິດຈີນ, ປະທານປະເທດ ແຫ່ງ ສາທາລະນະລັດ ປະຊາຊົນຈີນ ແລະ ຄະນະຜູ້ແທນຂັ້ນສູງພັກ, ລັດ ສປ ຈີນ ໄດ້ໄປວາງພວງມາລາ ຢູ່ອານຸສາວະລີນັກຮົບນິລະນາມ ທີ່ສະໜາມຫລວງ, ນະ ຄອນຫລວງວຽງຈັນ.
ສະຫາຍ ສິນລາວົງ ຄຸດໄພທູນ, ກຳມະການກົມການເມືອງສູນກາງພັກ, ເຈົ້າຄອນນະຄອນຫລວງວຽງຈັນ; ສະຫາຍ ສອນໄຊ ສີພັນດອນ, ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ; ສະຫາຍ ນາງ ສູນທອນ ໄຊຍະຈັກ, ກຳມະ ການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ; ແລະ ເຈົ້າໜ້າທີ່ຂັ້ນສູງຈຳນວນໜຶ່ງຂອງ ສປປ ລາວ ໄດ້ໃຫ້ກຽດຕິດຕາມຄະນະຜູ້ເແທນຈີນ ທີ່ນໍາໂດຍ ສະຫາຍເລຂາທິການໃຫຍ່ ສີ ຈິ້ນຜິງ ໃນການໄປວາງພວງມາລາດັ່ງກ່າວ.
ພາຍຫລັງສຳເລັດພິທີດັ່ງກ່າວ, ສະຫາຍ ສີ ຈິ້ນຜິງ ແລະ ຄະນະ ກໍໄດ້ສືບຕໍ່ແຜນການເຄື່ອນໄຫວຢ້ຽມຢາມລາວ ໄດ້ເດີນທາງໄປພົບປະກັບ ສະຫາຍ ທອງລຸນ ສີສຸລິດ, ກຳມະການກົມການເມືອງສູນກາງພັກ, ນາຍົກ ລັດຖະມົນຕີ ແຫ່ງ ສປປ ລາວ ແລະ ຄະນະ ແລະ ພົບປະກັບ ສະຫາຍ ນາງ ປານີ ຢາທໍ່ຕູ້, ກຳມະການກົມການເມືອງສູນກາງພັກ, ປະທານສະພາ ແຫ່ງ ຊາດ ສປປ ລາວ ແລະ ຄະນະ ທີ່ຫໍປະຊຸມແຫ່ງຊາດ, ເພື່ອປຶກສາຫາລືກ່ຽວກັບການຊຸກຍູ້ສົ່ງເສີມສາຍພົວພັນ ແລະ ຮ່ວມມືສອງຝ່າຍໃນຍຸກສະໄຫມໃຫມ່, ໂດຍສະເພາະແມ່ນໃນໄລຍະທີ່ ສປປ ລາວ ພວມຈັດຕັ້ງຜັນຂະຫຍາຍມະຕິຄັ້ງທີ 10 ຂອງ ສປປ ລາວ ແລະ ສປ ຈີນ ກໍ່ພວມຈັດຕັ້ງຜັນຂະຫຍາຍມະຕິຄັ້ງທີ 19 ໃຫ້ເກີດດອກອອກຜົນ ແລະ ນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ລາວ ແລະ ຈີນ.