ວັນທີ 17 ກຸມພາ 2018, ທ່ານ ແສງ ສຸຂະທິວົງ, ເອກອັກຄະລັດຖະທູດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈໍາ ຣາຊະອານາຈັກໄທ ໄດ້ໃຫ້ກຽດເຂົ້າຮ່ວມງານສືບສານປະເພນີວັດທະນະທໍາໄທພວນ ແລະ ທອດຜ້າປ່າສາມາຄີ ຄັ້ງທີ່ 60 ປະຈໍາປີ 2018 ຈັດຂຶ້ນທີ່ວັດບ້ານໃໝ່ທະນາລາມ, ຕາແສງ ຫາດສ້ຽວ, ເມືອງສີສັນຊະນາໄລ, ຈັງຫວັດ ສຸໂຂໄທ, ຣາຊະອານາຈັກໄທ; ມີທ່ານ ພິພັດ ເອກພາພັນ, ເຈົ້ແຂວງສຸໂຂໄທ, ທ່ານ ພົນໂທ ທະນະພັດ ສີກຸນໄຊພັດ, ປະທານຊົມລົມໄທພວນແຫ່ງປະເທດໄທ, ມີອໍານາດການປົກຄອງເມືອງ, ຕາແສງ, ບ້ານ, ຕະຫລອດຮອດພໍ່ແມ່ປະຊາຊົນຊາວ ຈັງຫວັດສຸໂຂໄທ ແລະ ຊາວໄທພວນ ຈາກ 23 ຈັງຫວັດ, 25 ຊົມລົມຂອງປະເທດໄທເຂົ້າຮ່ວມ 3.000 ກວ່າຄົນ.

ໃນໂອກາດກ່າວຄໍາປາໄສໃນພິທີເປີດບຸນປະເພນີປະຈໍາປີໄທພວນແຫ່ງປະເທດໄທເທື່ອນີ້; ທ່ານເອກອັກຄະລັດຖະທູດ ແສງ ສຸຂະທິວົງ ໄດ້ກ່າວສະແດງຄວາມຂອບໃຈເປັນຢ່າງສູງມາຍັງພີນ້ອງໄທພວນຈັງຫວັດສຸໂຂໄທ ໂດຍສະເພາະ ທ່ານຜູ້ວ່າຣາຊະການຈັງຫວັດ ທີ່ໃຫ້ການຕ້ອງຮັບອັນອົບອຸ່ນ ແລະ ກ່າວສະແດງຍໍ້ຍ້ອງຍໍຊົມເຊີຍການຈັດບຸນດັ່ງກ່າວ ເຊິ່ງໄດ້ສ່ອງແສງໃຫ້ເຫັນເຖິງຄວາມສາມັກຄີຮັກແພງ ແລະ ການປຸ້ມລຸມຕູ້ມຫໍ່ກັນແໜ້ນໜາຂອງຊາວໄທພວນຕະຫລອດໄລຍະຜ່ານມາ. ປີນີ້ສະມາຄົມໄທພວນມີສະມາຊິກລວມທັງໝົດທົ່ວປະເທດຫລາຍກວ່າ 2 ລ້ານກວ່າຄົນ, ອັນພົ້ນເດັ່ນແມ່ນຍັງສາມາດຮັກສາເອກະລັກທາງວັດທະນະທໍາ, ຂະໜົບທໍານຽມ ແລະ ຮີດຄອງປະເພນີດັ້ງເດີມເອົາໄວ້ໄດ້, ເປັນຄວາມປະທັບໃຈທີ່ໄດ້ພົບພໍ້ພີ່ນ້ອງພວນທີ່ບໍ່ລືມຮີດເກົ່າຄອງຫລັງ, ຍັງບໍ່ລືມແຜ່ນດິນບັນພະບຸລຸດ; ຜ່ານມາພີ່ນ້ອງໄທພວນຫລາຍຄົນກໍ່ໄດ້ຫວນຄືນໄປຢ້ຽມຢາມຖາມຂ່າວພີ່ນ້ອງພວນຢູ່ ສປປ ລາວ ເຊິ່ງໄດ້ສະແດງເຖິງຄວາມຮັກຕໍ່ແຜ່ນດິນບັນພະບຸລຸດ, ເປັນການປະກອບສ່ວນເຮັດໃຫ້ ການພົວພັນອັນດີງາມລະຫວ່າງ ສປປ ລາວ ແລະ ຣາຊະອາ ນາຈັກໄທນັບມື້ຂະຫຍາຍຕົວຢ່າງຕໍ່ເນື່ອງ; ຂໍຮຽກຮ້ອງຈົ່ງພ້ອມກັນສືບຕໍ່ປົກປັກຮັກສາການພົວພັນອັນດີງາມລະຫວ່າງ ລາວ-ໄທ ເວົ້າລວມ, ເວົ້າສະເພາະລະຫວ່າງພີ່ນ້ອງພວນຂອງສອງປະເທດໃຫ້ນັບມື້ພັດທະນາ ແລະ ຍືນຍົງຕະຫລອດໄປ. ທ່ານ ຍັງເຊີນຊວນພີນ້ອງໄທພວນ ກໍຄືຊາວໄທທັງຫລາຍ ໄປທ່ຽວຊົມທຳມະຊາດຢູ່ ສ.ປ.ປ ລາວ ທີ່ຍັງຄົງຮັກສາໄວ້ໄດ້ເໝືອນເດີມ ໂດຍສະເພາະຊາວໄທພວນ ໄປຢ້ຽມຢາມ ແຂວງຊຽງຂວາງ ເຊິ່ງເປັນແຂວງໜື່ງທີ່ມີຄົນພວນອາໃສຢູ່ຢ່າງຫລວງຫລາຍ.

  ໄທພວນແຫ່ງປະເທດໄທ ແມ່ນມີຖິ່ນກຳເນີດທີ່ ແຂວງຊຽງຂວາງ ສປປ ລາວ ມາຫຼາຍກວ່າ 1164 ປີ ແລະ ໄດ້ເຂົ້າມາຕັ້ງຖິ່ນຖານ ຢູ່ໃນປະເທດໄທ ໄດ້ຫຼາຍກວ່າ 400 ປີ. ບຸນປະເພນີສືບສານປະເພນີວັດທະນະທໍາໄທພວນ ຖືກຈັດຂຶ້ນທຸກປີ ເຊິ່ງມີສະມາຄົມໄທພວນແຫ່ງປະເທດໄທເປັນເສົາຫລັກ, ປ່ຽນຜຽນກັນໄປແຕ່ລະຈັງຫວັດຕາມເງື່ອນໄຂສະເພາະປີນີ້ຈັດຂຶ້ນຢູ່ເມືອງສີສັນຊະນາໄລ, ແຂວງສຸໂຂໄທມີຄົນເຊື້ອສາຍພວນອາໄສຢູ່ຫຼາຍເປັນອັນດັບທີສອງຂອງປະເທດໄທ.  ໃນໂອກາດເດີນທາງໄປເຂົ້າຮ່ວມງານດັ່ງກ່າວນີ້, ທ່ານເອກອັກຄະລັດຖະທູດລາວ ພ້ອມດ້ວຍຄະນະຍັງໄດ້ເດີນທາງໄປທ່ຽວຊົມສະຖານທີ່ທາງວັດທະນາທຳທາງປະຫວັດສາດ ແລະ ພຸດທະສາດສະໜາອີກຈຳນວນໜື່ງ ເຊິ່ງໃນແຕ່ລະບ່ອນແມ່ນໄດ້ຮັບການຕ້ອນຮັບຢ່າງອົບອຸ່ນຈາກປະຊາຊົນ ແລະ ອຳນາດການປົກຄອງຢ່າງເປັນກັນເອງ.